جوبا جاستار جىلىنا ارنالدى. نەگىزگى ماقساتى – جاستاردىڭ ومىردەن ءوز جولدارىن تابا بىلۋىنە كومەكتەسۋ, كاسىپكەرلىككە ۇيرەتۋ, جاستاردىڭ كاسىبي بىلىكتىلىگىن ارتتىرۋعا, تۇلعالىق دامۋى مەن ءوزىن ءوزى تانۋلارىنا مەنتورينگ ءادىسى (تالىمگەرلىك) ارقىلى جاردەمدەسۋ. باياناۋىلدىڭ جاسىباي كولى جاعاسىنداعى مەنتورلىق لاگەردىڭ اشىلۋىنا ءماجىلىس دەپۋتاتى ارمان قوجاحمەتوۆ, «KAZBRANDS» ۇيىمىنىڭ قامقورشىلار كەڭەسىنىڭ توراعاسى نۇرلان جازىلبەكوۆ, جوبا جەتەكشىسى جاننا قايكەنوۆا, س.تورايعىروۆ اتىنداعى مەملەكەتتىك ۋنيۆەرسيتەت رەكتورى مىندەتىن اتقارۋشى مەيرام بەگەنتاەۆ قاتىسىپ, جاستارعا ارناپ ءسوز سويلەدى.
– بۇگىنگى جيىننىڭ ماقساتى – تالىمگەرلىك يدەيا, تاجىريبەمەن ءبولىسۋ. جالپى تالىمگەرلىك ءاربىر جاستىڭ جەكە تۇلعا بولىپ قالىپتاسۋىنا جول اشادى. تالىمگەرلىك تابىسقا جەتكىزەدى, – دەيدى جوبا جەتەكشىسى جاننا قايكەنوۆا. ونىڭ ايتۋىنشا, قازىر ەلىمىزدىڭ 4 وڭىرىندە جاستارعا تالىمگەرلىك ءادىس جولىن ۇيرەتۋ باستالعان. جاستار لاگەرى الاڭىنا سەرتيفيكاتتالعان قازاقستاندىق تالىمگەرلەر ايدار ابراەۆ, دانيار ايتىشەۆ, بلوگەر ءانۋار ءشارىپوۆ, ليديا تايجانوۆا-ششەربينينا قاتىستى.
مەنتورلىق جاستار لاگەرىندەگى تالىمگەرلىك وقۋلارعا 4 كۇن بويى 13 پەن 29 جاس ارالىعىنداعى جەرگىلىكتى مەكتەپ وقۋشىلارى, ستۋدەنتتەر, كاسىپكەرلەر, جۇمىسشى جاستار جانە اۋىل جاستارى قاتىستى. ءتۇرلى قىزىقتى دەباتتار, سەمينارلار, ترەنينگتەر جانە تالىمگەر جەتەكشىلەرمەن كەزدەسۋلەر ءوتتى.
ال جالپى مەنتورلار, ياعني, تالىمگەرلەر قىزمەتىن عالىمدار, كاسىپكەرلەر, ساراپشىلار, وقۋ ورىندارىنىڭ ۇستازدارى, كاسىپورىن جەتەكشىلەرى, مەملەكەتتىك قىزمەتكەرلەر دە اتقارا الادى. ولار ءوزارا بىرلەسە جۇمىس ىستەپ, تاجىريبە الماسۋ ءادىسى ارقىلى قوعامداعى تالىمگەرلىكتى دامىتا الادى. مىسالى, ءار تالىمگەر 7 جاس ازاماتتى قامقورلىعىنا الىپ, ولاردىڭ العا قويعان ماقساتتارىن جۇزەگە اسىرۋعا كومەكتەسە الادى. اۋىل جاستارىنا نازار ەرەكشە. ال ترەنينگ-سەمينارلاردان ءتالىم الىپ شىققان جاستار تالىمگەرلىك جول ارقىلى ءوز جۇمىستارىن جالعاستىرادى.
– تالىمگەر, مەنتور رەتىندە مەنىڭ تالىمگەرىم وقۋدا, مانساپ جولىندا, بيزنەس سالاسىندا جەتىستىككە جەتۋ جولىن ءوزى تاڭدايدى. پسيحولوگ, كاسىپكەر, جاتتىقتىرۋشى سياقتى ارىپتەستەرىم جاستارعا وزدەرىنىڭ ءومىر تاجىريبەلەرىنەن الىنعان ماقساتقا جەتۋ جولدارىن جەتكىزەدى, – دەيدى تالىمگەر ايدار ابراەۆ.
وبلىس ورتالىعىنداعى زينايدا باگنەنكو باسقاراتىن «سامال» وڭالتۋ ورتالىعىنان كەلگەن مۇمكىندىگى شەكتەۋلى دارىندى بالالارعا مەنتور رەتىندە فاريزا ەسەنباەۆا دا جاقسى كوشباسشى بولا ءبىلدى. مەنتورلىق لاگەر جۇمىسىنا قاتىسقان ءماجىلىس دەپۋتاتى ارمان قوجاحمەتوۆتىڭ ايتۋىنشا, تالىمگەرلىك ينستيتۋتى دەگەن قوعام مەن مەملەكەت ءۇشىن ماڭىزى زور بۇرىننان كەلە جاتقان ءداستۇرلى جول دەۋگە بولادى. قازىرگى كۇنى دە تالىمگەرلىك, جاستارعا جول كورسەتۋ, قولداۋ – وزەكتى. ۇرپاق ساباقتاستىعى – قوعام مەن مەملەكەتتىڭ دامۋىنداعى ماڭىزدى فاكتور. ال جاستار كۇندەلىكتى ۇيرەنشىكتى داعدىدان شىعىپ, جاڭا كوزقاراسقا, ۋاقىتقا, وزگەرىسكە ىلەسە ءبىلۋ كەرەك. وسى ماقساتپەن جينالعان تالىمگەرلەر مەن جاستار تالىمگەرلىك تۇجىرىمداماسىن تالقىلادى. سونىمەن قاتار جوبا جاستاردى تابىسقا جەتەلەۋگە, ىنتالاندىرۋعا, قۇقىقتىق كەڭەس بەرۋگە جانە تالىمگەرلەردىڭ كومەگىمەن جەكە باسىنىڭ وسۋىنە ىقپال ەتەدى.
– جالپى, مەنتورلىق جوبا مەملەكەتتىڭ قولداۋىمەن باستالدى. مەنتورلىق جۇمىس بيزنەسكە عانا ەمەس, بارلىق سالاعا قاجەت. مەملەكەتتىك ورگانداردا دا وزەكتى. قازىرگى جاستار وتە ءبىلىمدى. بىراق ومىرلىك تاجىريبەلەرى از. ال ولارعا باعىت-باعدار بەرەتىن تالىمگەر كەرەك, – دەيدى قوردىڭ جاۋاپتى وكىلى نۇرلان جازىلبەكوۆ.
باياناۋىلدىڭ «تۇما» جاستار قوعامدىق بىرلەستىگىنىڭ جەتەكشىسى باتىربەك ارقارباي ۇلىنىڭ ايتۋىنشا, اۋىل جاستارىن شارۋاشىلىقتاعى جۇمىسپەن شەكتەۋگە بولمايدى. ولارعا زاماناۋي عىلىم-ءبىلىمنىڭ تەتىكتەرىن ۇيرەتۋ قاجەت. وسىنداي ترەنينگتەردى ءجيى ۇيىمداستىرۋ كەرەك. مەنتورلىق ترەنينگتەر اۋىل جاستارىن كاسىپكەرلىككە باۋلۋعا, وسى سالادا ءوز ورنىن تابۋعا مۇمكىندىك بەردى.
– الاڭعا جينالعان جاستاردان تالىمگەرلەر كوماندا جينادى, جوبالارمەن جۇمىس ىستەدىك. تالىمگەرلىك وقۋلار جاستاردى وزدەرىنە تانىس كۇندەلىكتى ورتادان شىعىپ, جان-جاعىنا باسقاشا كوزقاراسپەن قاراۋعا ۇيرەتەدى, – دەيدى باتىربەك.
ال ءبىزدىڭ تۇيگەن ويىمىز مىناداي: وكىنىشتىسى, ادەتتەگىدەي مۇنداي شارا تەك ورىس تىلىندە ءوتتى. قازاق ءتىلى قازاقتىڭ كوركەم مەكەنى باياناۋىلدىڭ جاسىباي كولىنىڭ جاعاسىندا ەستىلمەدى. جاستارعا تاربيە بەرەتىن تالىمگەر-مەنتور بولعان ءتۇرىمىز – وسى. جالپى, تالىمگەرلىك تاجىريبە, مەنتورلار, مەنتورينگ ءادىسى دەگەن دامىعان ەلدەردە بۇرىننان قالىپتاسقان. ءبىزدىڭ ەلىمىزدە دە بولدى, بىراق جوعالتىپ الدىق. قازىر قايتا جاندانۋ جولىنا تۇسكەنى كوڭىل قۋانتادى.
