وبلىستىق كاسىپوداقتار ورتالىعىنىڭ توراعاسى ىزتۇرعان بايمۇحانوۆ ەڭبەك ۇيىمدارىنداعى الەۋمەتتىك بازانى نىعايتۋدا كاسىپوداق ۇيىمىنىڭ ءرولى ەرەكشە ەكەنىن ايتادى. كۇندەلىكتى جۇمىس بارىسىندا باستاۋىش كاسىپوداق ۇيىمدارىنىڭ سانى از بولعاندىقتان جۇمىس بەرۋشىلەر تاراپىنان قىزمەتكەرلەردى قۋدالاۋشىلىق دەرەكتەرى انىقتالعان. ەڭبەك جانجالدارىنىڭ باستى سەبەپتەرىنىڭ ءبىرى – ءومىر ءسۇرۋ دەڭگەيىنىڭ تومەندەۋى, ياعني اقشانىڭ قۇنسىزدانۋى, جالاقىنىڭ وسپەۋى. «وبلىستىق كاسىپوداقتار بىرلەستىگىنە ەڭبەكاقىنىڭ ازدىعىنا شاعىمدانىپ, كاسىپوداعى جوق مەكەمەلەردىڭ جۇمىسشىلارى كەلەدى», دەيدى ىزتۇرعان ۇزاقباي ۇلى. «التيەس پەترولەۋم» كومپانياسىنىڭ 100-دەن اسا قىزمەتكەرى وسىنداي سەبەپپەن كومەك سۇراپ كەلگەن. وبلىستىق كاسىپوداقتار ورتالىعى كەلىسسوزدەر ناتيجەسىندە سوت پەن قۇزىرلى ورگاندارعا جۇگىنبەي, جالاقىنى ءوسىرىپ, ەڭبەك جاعدايلارىن جاقسارتۋعا ىقپال جاسادى. بيىلعى جارتىجىلدىقتىڭ وزىندە كاسىپوداقتار باستاماسىمەن 57 وندىرىستىك كاسىپورىن ەڭبەكاقىنى كوتەردى.
ەڭبەك داۋلارىنىڭ تۋىنداۋىنا تاعى ءبىر سەبەپ – جۇمىستان بوساتىلۋ. كوبىنە جۇمىس بەرۋشىلەر قىزمەتكەرلەردى ەشقانداي سەبەپسىز, ەڭبەك كودەكسىنىڭ 50-بابى, 3-تارماعى نەگىزىندە جۇمىستان بوساتادى. ءبىر قاراعاندا ءبارى زاڭدى, بىراق... ايتالىق, «يۋسس سۋپورت سەرۆيسەز» كومپانياسى تەڭىز كەنىشىندە 25 جىلدان بەرى ەڭبەك ەتىپ كەلە جاتقان بىرنەشە جۇرگىزۋشىنى 3 ايلىق وتەماقىمەن جۇمىستان شىعارىپ جىبەرگەن. ال اتىراۋ قالاسىنداعى «بايزار» ساۋدا, ويىن-ساۋىق كەشەنىنىڭ كۇزەت فيرماسى قىزمەتكەرىن 1 ايلىق ەسەپتىك كورسەتكىش كولەمىندە, ياعني 2,5 مىڭ تەڭگە وتەماقىمەن جۇمىستان بوساتقان. زاڭسىز جۇمىستان شىعارىلعان تاعى 10 قىزمەتكەر كاسىپوداقتار كومەگىمەن قايتادان جۇمىسقا ورنالاستى. مۇنداي مىسالدار از ەمەس. قايسىسىن الىپ قاراساق تا, كاسىپوداق ۇيىمىنىڭ ارالاسۋى ناتيجەسىندە ءىس وڭىنان شەشىلىپ, ەڭبەك ادامىنىڭ مۇددەسى قورعالعانىن ايقىن اڭعارۋعا بولادى.
كاسىپوداق ۇيىندە وبلىستىق سوتپەن بىرلەسكەن جوبا تاتۋلاستىرۋ ورتالىعى جۇمىس ىستەيدى. كاسىبي مەدياتورلار جەكە ەڭبەك داۋلارىن قاراپ, ەكى تاراپتى دا ريزا ەتەتىن شەشىمدەردى تابۋدا. «جىل باسىنان بەرى 100-گە جۋىق ەڭبەك داۋى قارالدى. وبلىس بويىنشا كاسىپوداعى بار 500 ۇيىمدا جەكە ەڭبەك داۋلارىن قارايتىن كەلىسۋ كوميسسيالارى قۇرىلدى. جىل سايىن 1500-دەن اسا كوميسسيا مۇشەلەرى ەڭبەك زاڭناماسىنىڭ نەگىزدەرىنە وقىتىلادى», دەيدى وبلىستىق كاسىپوداقتار ورتالىعىنىڭ توراعاسى.
قاراپايىم ەڭبەك ادامىنىڭ تاعدىرىنا قاتىستى تۇيتكىلدى تۇستاردى ءادىل دە ادال جولمەن, زاڭ شەڭبەرىندە شەشۋگە ىقپال ەتۋدە كاسىپوداق ۇيىمدارىنىڭ جۇمىستارى ءتيىمدى ەكەنىن ۋاقىتتىڭ ءوزى دالەلدەپ وتىر. داۋ-جانجالدى بەيبىت كەلىسىم ارقىلى شەشۋگە نيەتتەنگەن ءار ادام قازىر كاسىپوداقتى بەتكە الاتىن بولدى. بۇل – اتالعان ينستيتۋتتىڭ جاڭا دەڭگەيگە كوتەرىلگەنىنىڭ ايقىن ايعاعى.
اتىراۋ
