تاتارستاندا اسقار مامين رف ۇكىمەتىنىڭ توراعاسى دميتري مەدۆەدەۆپەن كەزدەستى. ەكى ەلدىڭ پرەمەر-مينيسترلەرى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن رەسەي پرەزيدەنتى ۆلاديمير پۋتين نەگىزىن سالىپ, دامىتقان ستراتەگيالىق ارىپتەستىك پەن وداقتاستىقتىڭ جوعارى دەڭگەيىن اتاپ ءوتتى. تاراپتار بيىل ءساۋىر ايىندا قر پرەزيدەنتى قاسىم-جومارت توقاەۆتىڭ رەسەيگە رەسمي ساپارى اياسىندا قول جەتكىزىلگەن كەلىسىمدەردى ىسكە اسىرۋ بارىسىن تالقىلادى.
ۇكىمەتارالىق كەلىcسوزدەر ساۋدا-ەكونوميكالىق, ينۆەستيتسيالىق ىنتىماقتاستىقتى, ونەركاسىپتىك كووپەراتسيانى ودان ءارى ارتتىرۋعا, ەنەرگەتيكا, اۋىل شارۋاشىلىعى, كولىك سالالارىنداعى ءوزارا ءىس-قيمىل ماسەلەلەرىنە ارنالدى. كەزدەسۋدە سونىمەن قاتار شەكارا ماڭى جانە ينتەگراتسيالىق ىنتىماقتاستىقتىڭ وزەكتى ماسەلەلەرى قارالدى.
رەسەي — قازاقستاننىڭ باستى ساۋدا سەرىكتەسى. وتكەن جىلى ەكى جاقتى ساۋدا كولەمى 13%-عا ارتىپ, $18,5 ملرد-قا جەتتى. 2019 جىلعى جارتى جىلدىقتىڭ قورىتىندىسى بويىنشا تاۋار اينالىمى $8,8 ملرد قۇرادى.
«جەتكىزىلەتىن تاۋارلار مەن قىزمەتتەردىڭ نومەنكلاتۋراسىن كەڭەيتۋ, ءبىزدىڭ بيزنەس-قاۋىمداستىقتار اراسىندا تىكەلەي بايلانىس ورناتۋ, سونداي-اق, ءۇشىنشى ەلدەر نارىقتارىنا تاۋارلاردى ىلگەرىلەتۋ بويىنشا بىرلەسكەن جۇمىستاردى جالعاستىرۋ قاجەت», — دەپ اسقار مامين, رەسەيلىك نارىققا 60-تان استام پوزيتسيا بويىنشا قازاقستاندىق تاۋارلاردى جەتكىزۋدىڭ جوعارى الەۋەتىن اتاپ ءوتتى.
