ءبىر اپتاعا سوزىلعان ءباسپاسوز تۋرىنىڭ باستى ماقساتى – الەمدىك قاۋىمداستىققا «جاھاندىق الەمدەگى زاماناۋي قازاقستاندىق مادەنيەت» جوباسى اياسىندا ەلىمىزدىڭ باي مادەنيەتى مەن تاريحىن تانىستىرۋ. ساپارعا اۋستريا, گەرمانيا, يتاليا, كورەيا, قىتاي, شۆەتسيا, شۆەيتساريا, فرانتسيا, جاپونيا جانە ت.ب. ەلدەردەن «Le Figaro», «Die Presse», «Global Times», «Korean Broadcasting System», «Specchio Economico» جانە باسقا باسىلىمداردىڭ 15 ءتىلشى قاتىستى.
سىرتقى ىستەر مينيسترلىگى وڭىرلىك اكىمدىكتەردىڭ قولداۋىمەن ۇيىمداستىرعان ءباسپاسوز تۋرىنىڭ بارىسىندا شەتەلدىك باق وكىلدەرى قازاقستاننىڭ زاماناۋي مادەنيەتىمەن, ونەرىمەن, تاريحىمەن جانە كورنەكتى جەرلەرمەن تانىستى.
«وڭتۇستىك استانادا» شەتەلدىك جۋرناليستەر بىرقاتار مادەني جانە تاريحي مەكەمەلەرگە, سونىڭ ىشىندە ءا.قاستەەۆ اتىنداعى ونەر مۇراجايىنا, «Qazaq Oner» قولونەرشىلەر ورتالىعىنا بارىپ, قازاقستاننىڭ كوركەم مادەنيەتىمەن, ءداستۇرلى قازاق مۋزىكالىق اسپاپتارىمەن جانە ءداستۇرلى مۋزىكالىق باعىتتارىمەن تانىستى. ونەر ورتالىعىندا كەلۋشىلەرگە قولونەرشىلەر ءوزىنىڭ شاعىن «شەبەرلىك ساباعىن» وتكىزدى.
كوكتوبەدە سەرۋەندەۋدەن, مەدەۋ مۇز ايدىنى مەن شىمبۇلاق تاۋ-شاڭعى كۋرورتىنان جانە ۇلكەن الماتى كولىنە ساياحاتتان ۇمىتىلماس اسەر العان جۋرناليستەر بولاشاقتا الماتىعا دوستارىمەن جانە وتباسىلارىمەن ورالۋعا ۋادە بەردى. شارىن شاتقالىنا جاسالعان كەلەسى كۇنگى ساياحات تا اسەرلى بولدى.
شىمكەنتتە جانە تۇركىستان وبلىسىندا جەرگىلىكتى اكىمدىكتەردىڭ قولداۋىمەن قوناقتار ەجەلگى وتىرار قالاسىنا, ارىستانباب پەن قوجا احمەت ياسساۋي كەسەنەلەرىنە, سونداي-اق وبلىستىڭ باسقا تۋريستىك ورىندارىنا باردى.
نۇر-سۇلتان قالاسىندا جۋرناليستەر مادەنيەت جانە سپورت ءمينيسترى اقتوتا رايمقۇلوۆا, قازاقستان رەسپۋبليكاسى پارلامەنتى ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى مۇحتار ەرمان جانە ءماجىلىستىڭ وزگە دە بىرقاتار دەپۋتاتتارىمەن كەزدەسۋلەر قازاقستانداعى مادەني مۇرانى ساقتاۋ, دامىتۋعا, سونداي-اق ءتۋريزمدى جانە شەت ەلدەردە تاريحي جانە مۇراعات دەرەكتەرىن زەرتتەۋ ءۇشىن حالىقارالىق قاتىناستاردى نىعايتۋعا باعىتتالعان مەملەكەتتىك ساياسات تۋرالى مولىراق ماعلۇمات الۋعا مۇمكىندىك بەردى.
ەلوردادا جۋرناليستەر «ەكسپو-2017» قازاقستاندىق پاۆيلونى مەن ۇلتتىق مۇراجايدا بولىپ, «استانا وپەرا» تەاترىندا وتەتىن قاراعاندى اكادەميالىق مۋزىكالىق كومەديا تەاترىنىڭ «القىزىل جەلكەندەر» مۋزىكالىق قويىلىمىن تاماشالادى.
جۋرناليستەردىڭ باسىم بولىگى ساپاردىڭ ارقاسىندا تەرەڭ تاريحى مەن باي مادەنيەتى, قوناقجاي حالقى, تازا كوشەلەرى مەن زاماناۋي ينفراقۇرىلىمى بار جاس مەملەكەتپەن تانىسقانىن اتاپ ءوتتى. «بۇل ەلدە تالعامپاز تۋريستكە دە تابىلاتىن قىزىقتار بار» دەگەن قوناقتار قازاقستانعا كەلىپ, ەلدى جاڭا جاعىنان تانۋ كەرەك دەگەن پىكىرگە ءبىراۋىزدان كەلىستى.
