جاقىندا ول بەلگىلى سۋرەتشى, «قازاق ەلى» مونۋمەنتىنىڭ اۆتورى سەنبىعالي سماعۇلوۆ باستاپ بارعان قازاقستاندىق سۋرەتشىلەر قۇرامىندا كيپردە بولىپ قايتتى. رەسمي شاقىرتۋ بيىلعى جىلدىڭ مامىر ايىندا Forbes تىزىمىنە كىرگەن تانىمال بيزنەسمەن, كيپرلىق ميللياردەر سۋات گيۋنسەلدەن كەلىپ تۇسكەن. ءبىلىم, دەنساۋلىق, بانك, قوناقۇي قىزمەتى, ەلەكتر جەلىلەرى سەكىلدى بيزنەستىڭ سان تۇرىمەن اينالىساتىن 63 جاستاعى سۋات بەي ساپاردىڭ بار شىعىنىن ءوز موينىنا الىپ, تەك قازاقستان سۋرەتشىلەرىن عانا ەمەس, تۇركى ەلدەرىنىڭ, الەمدەگى مۇسىلمان مەملەكەتتەرىندەگى ونەر وكىلدەرىن دە شاقىرىپ, باسقوسۋدى حالىقارالىق سيمپوزيۋم دەڭگەيىندە وتكىزگەن. باۋىرلاس ەلدەردەگى قىلقالام شەبەرلەرىنىڭ مول شوعىرىن شاقىرۋداعى ماقسات – سۋات گيۋنسەل ەل ۇكىمەتىمەن بىرلەسىپ, ۇلكەن ونەر مۇراجايىن اشۋدى كوزدەيدى.
الەمنىڭ ءار قيىرىنان كەلگەن ارىپتەستەرىمەن بىرگە گۇلنازىم دا ەكى اپتا بويى سۋرەت سالىپ, ءتۇرلى تاقىرىپتا تۋىندى جازعان شەتەلدىك سۋرەتشىلەرمەن تاجىريبە الماسقانى ءۇشىن شەكسىز ريزا. سيمپوزيۋم اياسىندا التى سۋرەتشىنىڭ جەكە كورمەسى ۇيىمداستىرىلىپ, ولاردىڭ قاتارىندا گۇلنازىمنىڭ دا شىعارماشىلىعىن تانىستىرۋعا مۇمكىندىك العانى قازاق سۋرەتشىسىنىڭ ايرىقشا قولتاڭباسىنا كورسەتىلگەن قۇرمەت بولسا كەرەك.
«سۋرەتشىلەر سيمپوزيۋمى كەرەمەت ءوتتى. اقتەڭىز جاعاسىندا ءتۇرلى تاقىرىپتا كارتينالار سالدىق, مەن ءۇشىن قازاقستاندىق جانە شەتەلدىك ايگىلى سۋرەتشىلەرمەن قاتار جۇمىس ىستەۋ ۇلكەن ابىروي بولدى. بار ونەرىمدى سالىپ, ەلىمىزدىڭ نامىسىن قولدان بەرمەس ءۇشىن كۇنى-ءتۇنى ەڭبەك ەتىپ, ءوز كارتينامنىڭ مازمۇندى جازىلۋىنا كوپ كوڭىل ءبولدىم», دەيدى گۇلنازىم. ونىڭ ايتۋىنشا, مارتەبەلى مەيماندار قاتارىندا بەينەلەۋ ونەرىنىڭ بىلگىرلەرى, مينيسترلەر مەن جوعارى دارەجەلى لاۋازىمدى تۇلعالار ارنايى كەلىپ تاماشالاعان كورمە جوعارى دەڭگەيدە ۇيىمداستىرىلعان.
تىنىسى كەڭ, قازاقتىڭ قايتالانباس ۇلتتىق ءداستۇرى نەگىزىندە جاسالعان تۋىندىلارىن الەم كەڭىستىگىندەگى ونەردىڭ بۇگىنگى باعىتتارىمەن توعىستىرۋ – گۇلنازىمنىڭ بالا كۇننەن بەرگى ارمانى. بۋىرقانعان بوياۋلاردىڭ قۇپياسىن اشپاققا قۇشتار بولىپ, شىعارماشىلىق ىڭكارلىكتى كۇندەلىكتى جۇمىس ىرعاعى ەتىپ بەلگىلەگەن ول بۇل ارمانىن بىرتىندەپ باعىندىرىپ كەلەدى دە. ءتۇرلى-ءتۇستى بوياۋ تىلىمەن جان دۇنيەسىنىڭ تولقۋى مەن تەبىرەنىسىن جەتكىزىپ, ونى ۇلتتىق بەدەر-ناقىشپەن ۇيلەستىرە بىلگەن گ.ومىرزاقتىڭ جۇمىستارى بۇگىندە لوندون, ليۋكسەمبۋرگ قالالارى مەن گەرمانيا, فرانتسيا, تۇركيا, رەسەي ەلدەرىندەگى ونەر گالەرەيالارىندا ساقتاۋلى تۇر. تالعاممەن سالىنعان تۋىندىلارى زاماناۋي ديزاين سۇرانىسىنا تولىقتاي ساي بولعاندىقتان بىرقاتار كارتيناسى مەملەكەتتىك مەكەمەلەر مەن قوعامدىق ۇيىمداردىڭ ينتەرەرىنە قويىلعان.
الماتى
