«پارتيا ءوز الدىنا 30 دامىعان ەلدىڭ قاتارىنا كىرەمىز دەپ ماقسات قويدىق. ول ءرولدى ورىنداماساق, ءبىزدىڭ ورنىمىزعا باسقا پارتيا كەلەدى. بارلىق باعدارلامالاردى سول مۇددەنى ىسكە اسىرۋ ءۇشىن جاساپ جاتىرمىز. پارتيا ناقتى جۇمىس ىستەپ, ناقتى شەشىمدەر شىعارۋ كەرەك. سول كەزدە پارتيانىڭ ەل اراسىندا بەدەلى اسادى» دەدى ن. نازارباەۆ.
ەلباسى ەلىمىز دامىعان ەلدەر قاتارىنا قوسىلۋى ءۇشىن قاجەتتى ءۇش شارتتى اتاپ ءوتتى.
«العاشقى, قوعامدا كەلىسىم مەن تاتۋلىق بولۋى كەرەك. ەكىنشىدەن, حالىق سۇرانىسىنا جاۋاپ بەرە الاتىن كوشباسشى مەن پارتيا كەرەك. سونداي-اق جالپى ستراتەگيالىق كۋرستىڭ ساباقتاستىعى مەن بىرىزدىلىگى وتە ماڭىزدى» دەدى پارتيا توراعاسى.
سونداي-اق ەلباسى سايلاۋالدى باعدارلامادا ايتىلعان ۋادەلەردى ورىنداۋدىڭ ماڭىزدىلىعىن, باقىلاۋدى كۇشەيتۋ مەن ناقتى ماسەلەلەردى ۇكىمەتكە بايانداۋ كەرەك ەكەندىگىن جانە جەرگىلىكتى باسقارۋشى ورگاندارمەن تىعىز جۇمىس اتقارۋ كەرەكتىگىن اتاپ ءوتتى.
ەسكە سالساق, بۇگىن ەلوردادا ەلباسى, پارتيا توراعاسى نۇرسۇلتان نازارباەۆتىڭ قاتىسۋىمەن Nur Otan پارتياسى ساياسي كەڭەسىنىڭ كەڭەيتىلگەن وتىرىسى ءوتىپ جاتىر.
