قازاقستان • 21 تامىز، 2019

تۇركى اكادەمياسىنىڭ پرەزيدەنتى وزبەكستان ەلشىسى سايديكرام نيازحودجاەۆپەن كەزدەستى

31 رەتكورسەتىلدى

تۇركى اكادەمياسىنىڭ پرەزيدەنتى دارحان قىدىرالى وزبەكستان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى سايديكرام نيازحودجاەۆپەن كەزدەستى. بۇل تۋرالى twesco.org حابارلادى.

كەزدەسۋ بارىسىندا حالىقارالىق تۇركى اكادەمياسى مەن وزبەكستان رەسپۋبليكاسى اراسىنداعى ارىپتەستىك بايلانىستاردى نىعايتۋ جولدارى قارالدى. دارحان قىدىرالى ءوز سوزىندە اكادەميانىڭ وزبەك ەلىندە ارحەولوگيالىق ەكسپەديتسيالار ۇيىمداستىرىپ، ونى جۇزەگە اسىرۋعا دايىن ەكەندىگىن جەتكىزدى. ال سايديكرام نيازحودجاەۆ ءوز كەزەگىندە اكادەميا  باسىپ شىعارعان الىشەر ءناۋايدىڭ شىعارمالار جيناعىنا وتە جوعارى باعا بەرىپ، ەرەكشە العىسىن ءبىلدىردى.

وزبەكستاننىڭ قازاقستانداعى ەلشىسى الداعى ۋاقىتتا بۇكىل تۇركى دۇنيەسىنە ورتاق ءابۋ ناسىر ءال-فارابي، احمەت ياسساۋي، ءجۇسىپ بالاساعۇن سياقتى تۇلعالاردىڭ مول مۇراسىن بىرىگىپ زەرتتەۋ قاجەت دەگەن وي ايتتى. جانە بۇل ىستە ەلشىلىك تاراپىنان قولداۋ بولاتىنىن جەتكىزدى. كەزدەسۋ سوڭىندا سايديكرام نيازحودجاەۆ اكادەميانىڭ كىتاپحاناسىنا الىشەر ءناۋايدىڭ وزبەك تىلىندە جارىق كورگەن جىر جيناعىن سىيعا تارتتى.

سوڭعى جاڭالىقتار

ۇقساس جاڭالىقتار