ەكولوگيا • 19 تامىز، 2019

سۋداعى ەكولوگيالىق قاۋىپسىزدىك شارالارى كۇشەيتىلدى

جاڭا ەرەجەلەر كەمەلەردىڭ ءجۇزۋى سالدارىنان لاستانۋ قاۋپىن ازايتۋ ءۇشىن تەڭىزدە ءجۇزۋدىڭ ەكولوگيالىق قاۋىپسىزدىگى شارالارىن كۇشەيتۋگە باعىتتالعان. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.

Egemen Qazaqstan

قازىرگى ۋاقىتتا كاسپي تەڭىزىنىڭ قازاقستاندىق سەكتورىندا ساۋدا فلوتىنىڭ 12 كەمەسى، جۇك كوتەرگىشتىگى 5-13 مىڭ توننانى قۇرايتىن جانە مۇناي كەن ورىندارىن يگەرۋ ءۇشىن تەڭىز وپەراتسيالارىن قولداۋ فلوتىن قوسا العاندا، قازاقستان تۋىن كوتەرىپ جۇزەتىن 300-دەن استام كەمە جۇمىس ىستەيدى. بۇدان باسقا، تۇراقتى نەگىزدە قازاقستاندىق پورتتارعا باسقا كاسپي ماڭى مەملەكەتتەرىنىڭ 60-قا جۋىق كەمەلەرى كىرەدى.

كاسپي تەڭىزىنىڭ قازاقستاندىق سەكتورىندا كەمەلەردى پايدالانۋدىڭ قارقىندىلىعىن جانە تاسىمالداناتىن مۇناي مەن وتىننىڭ كولەمىن ەسكەرە وتىرىپ، ەلىمىزدىڭ اۋماقتىق تەڭىزدەرىندە كەمەلەردەن لاستانۋ جانە سوعان سايكەس ورنى تولماس زالال كەلتىرۋ قاۋپى وتە جوعارى.

وسىعان بايلانىستى، تەڭىز كەمەلەرىنەن «نولدىك» سارقىندى سۋلاردى شىعارۋدى قامتاماسىز ەتۋ ءۇشىن قر يدم باسشىسىنىڭ بۇيرىعىمەن ولاردى بولدىرماۋ جونىندەگى ەرەجەلەر بەكىتىلدى. ولار كەمەلەردەن لاستانۋدى بولدىرماۋ جونىندەگى حالىقارالىق كونۆەنتسيانىڭ (مارپول كونۆەنتسياسى) تەحنيكالىق تالاپتارىن ىسكە اسىرۋعا باعىتتالعان. اتاپ ايتقاندا، تەڭىزدىڭ لاستانۋىنا الىپ كەلەتىن كەمە بورتىندا وپەراتسيالار جۇرگىزۋ ءتارتىبى انىقتالادى، مىسالى، كەمەگە وتىن قۇيۋ، جۇك بولىكتەرىن جۋ، تەڭىزگە اعىزىلعان شارۋاشىلىق ماقساتتارىندا جۇمسالعان سارقىندى سۋلاردى ءسۇزۋ جانە شىعارۋ.

بۇدان باسقا، تەڭىزگە مۇناي، سۇيىق حيميالىق زاتتاردى، سارقىندى سۋلار مەن قوقىستاردى شىعارۋدى بولدىرماۋعا ارنالعان كەمەلەردە ارنايى جابدىقتار مەن جۇيەلەردىڭ بولۋى جانە ولاردىڭ اتقاراتىن جۇمىسى بويىنشا تالاپتار بەلگىلەنەدى.

بۇل ەرەجەلەر تەڭىزدىڭ كەمەلەردەن لاستانۋ تاۋەكەلىن ازايتۋ جونىندەگى بىرىزدەندىرىلگەن حالىقارالىق تالاپتاردىڭ ساقتالۋىن جانە تيىسىنشە شەتەلدىك پورتتاردا وتاندىق كەمەلەردىڭ ولاردى بۇزعانى ءۇشىن كىدىرۋىن بولدىرماۋدى قامتاماسىز ەتۋگە، سونداي-اق كەمە يەسى تاراپىنان تەڭىز ورتاسىن لاستاۋ سالدارىن جويۋعا ارنالعان شىعىنداردىڭ ىقتيمالدىعىن تومەندەتۋگە مۇمكىندىك بەرەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز