ەلباسى «Nur Otan» پارتياسىنىڭ 20 جىل ىشىندە ەلىمىزدىڭ قۋاتتى ساياسي كۇشىنە اينالعانىن اتاپ ءوتتى.
- ەڭ قيىن جىلدارى پارتيامىز حالىق پەن ساياساتكەرلەردى ءبىر باعىتتا جۇمىس ىستەۋگە جۇمىلدىردى. ءبىز بەيبىتشىلىك پەن ۇلتارالىق كەلىسىمدى, ساياسي تۇراقتىلىقتى ساقتادىق. سونىڭ ارقاسىندا ايتارلىقتاي جەتىستىكتەرگە قول جەتكىزدىك. بۇل ءبىزدىڭ ەلىمىزگە داعدارىس قىسپاعىنان شىعۋعا, ينۆەستيتسيا تارتۋعا, مىڭداعان جاڭا كاسىپورىن جانە جۇمىس ورىندارىن اشۋعا, ەڭ باستىسى, تاۋەلسىزدىگىمىزدى ساقتاۋعا جانە نىعايتۋعا مۇمكىندىك بەردى, – دەدى ەلباسى.
نۇرسۇلتان نازارباەۆ جاھاندىق وزگەرىستەرگە بايلانىستى پارتيا الدىندا جاڭا ءارى كۇردەلى مىندەتتەر تۇرعانىن اتاپ ءوتتى.
– قازاقستان تەز دامىپ كەلە جاتقان ەلدەر سياقتى «ورتاشا تابىس قاقپانىنا» تاپ بولدى. دۇنيە جۇزىندە ورتا تاپتىڭ تابىسىنا قاتىستى توقىراۋ بار ەكەنىن كورىپ وتىرمىز. تەرىس جاھاندىق ترەندتەردىڭ دە ىقپالى ارتىپ كەلەدى, – دەدى پارتيا توراعاسى.
ەلباسى ازاماتتاردىڭ سۇرانىستارىنا دا ۋاقتىلى جاۋاپ بەرۋ قاجەتتىگىن اتاپ ءوتتى.
– قيىندىقتارعا قاراماستان, 2050 جىلعا دەيىنگى ستراتەگيادا كوزدەلگەن باستى ماقسات – وزىق دامىعان 30 ەلدىڭ قاتارىنا كىرۋدى, ياعني قازاقستاندىقتاردىڭ تۇرمىس ساپاسىن الدىڭعى قاتارلى ەلدەر دەڭگەيىنە كوتەرۋدى ۇمىتپاۋىمىز كەرەك. بۇعان قول جەتكىزۋ ءۇشىن, ەڭ الدىمەن, تۇراقتىلىق, بىرلىك جانە بارشا قازاقستاندىقتاردىڭ قاجىرلى ەڭبەگى قاجەت. مۇنى ارقايسىمىز جەتە تۇسىنگەنىمىز ءجون. وزىق دامىعان 30 ەلدىڭ بارلىعى دا وسى جولدان وتكەن, – دەدى تۇڭعىش پرەزيدەنت.
نۇرسۇلتان نازارباەۆ 2050 جىلعا دەيىنگى دامۋدىڭ ستراتەگيالىق باعدارىنىڭ ماقساتتارىنا قول جەتكىزۋ ءۇشىن پارتيا تاراپىنان اتقارىلىپ جاتقان جۇمىستىڭ باسىم باعىتتارىنا توقتالدى.
– سوندىقتان پارتيامىز, بىرىنشىدەن, قوعامدى جۇمىلدىرىپ, ەلدىڭ ساياسي باسشىلىعىنىڭ بىرلىگىن نىعايتۋى كەرەك. ىشكى بىرلىك پەن كەلىسىم بولعان كەزدە عانا العا ىلگەرىلەۋ بولادى. ەكىنشىدەن, بىزگە ناقتى پارتيالىق بىرەگەيلىك جانە قاتاڭ ءتارتىپ, سونداي-اق اتقارۋشى بيلىكتىڭ جاۋاپكەرشىلىگى قاجەت, – دەدى پارتيا توراعاسى.
ەلباسى ءماجىلىس پەن ءماسليحات سايلاۋىنا ساپالى دايىندالۋدىڭ ماڭىزدىلىعىن اتاپ ءوتتى.
– الدىمىزدا ماڭىزدى ناۋقان – ءماجىلىس دەپۋتاتتارىنىڭ سايلاۋى بار. زاڭناماعا بىلتىر ەنگىزىلگەن وزگەرىستەرگە سايكەس, ءماسليحاتتاردىڭ كەلەسى سايلاۋى ءماجىلىس سايلاۋى سياقتى العاش رەت پارتيالىق ءتىزىم بويىنشا وتەدى. ءبىز جەڭىسكە جەتۋدى جانە ۇزاق مەرزىمدى ساياسي كوشباسشىلىقتى كوزدەپ وتىرمىز. سوندىقتان الداعى سايلاۋ ناۋقانىنا بۇگىننەن باستاپ دايىندالۋىمىز كەرەك, – دەدى قازاقستاننىڭ تۇڭعىش پرەزيدەنتى.
سونىمەن قاتار, ەلباسى بارلىق مۇددەلى ازاماتتاردى مەملەكەتتىڭ وزەكتى الەۋمەتتىك-ەكونوميكالىق پروبلەمالارىن شەشۋ ءۇشىن پارتياعا قوسىلۋعا شاقىردى.
– ءبىز ءوز ۇسىنىستارىن ايتقان بەلسەندى ازاماتتار مەن بلوگەرلەردى كورىپ, ەستىپ وتىرمىز. ەگەر ولار شىنىمەن دە ەل تاعدىرى ءۇشىن الاڭدايتىن بولسا, ۇسىنىلعان يدەيالارىن جۇزەگە اسىرۋ ءۇشىن پارتيامەن بىرگە جۇمىس ىستەۋگە شاقىرامىز, – دەدى پارتيا توراعاسى.
نۇرسۇلتان نازارباەۆ ەلىمىزدىڭ وڭىرلەرىندەگى تۇرعىنداردىڭ پروبلەمالارىن شەشۋ ءۇشىن «Nur Otan» پارتياسىنىڭ جۇمىسىن جانداندىرۋ قاجەتتىگىن اتاپ ءوتتى.
– «Nur Otan» پارتياسىنىڭ مىندەتى – ءتيىمدى قوعامدىق جانە پارتيالىق باقىلاۋ ورناتۋ, حالىققا بەرىلگەن بارلىق ۋادەلەردى ساپالى ورىنداۋ. سونداي-اق, «5 ينستيتۋتسيونالدىق رەفورمانى», پارتيانىڭ 2021 جىلعا دەيىنگى سايلاۋالدى باعدارلاماسىن, پرەزيدەنتىمىز قاسىم-جومارت كەمەل ۇلى توقاەۆتىڭ باعدارلاماسىن جۇزەگە اسىرۋ. بۇل قۇجاتتاردىڭ ءبارى قازاقستاندىقتاردىڭ تۇرمىسىن جاقسارتۋعا باعىتتالعان, – دەدى ەلباسى.
سونىمەن بىرگە, «Nur Otan» پارتياسىنىڭ توراعاسى قوعامنىڭ پارتياعا دەگەن سەنىمىن ارتتىرۋ ءۇشىن اقپاراتتىق-يدەولوگيالىق ستراتەگيانى قابىلداۋ ماڭىزدىلىعىنا باسا ءمان بەردى.
– وزەكتى ماسەلەلەر تۋرالى اشىق ايتىپ, ولاردىڭ جەرگىلىكتى جەردە شەشىلۋىنە اتسالىسۋ كەرەك. ءبىزدىڭ مىندەتىمىز – قوعامنىڭ سەنىمىن ارتتىرۋ. بۇل ءۇشىن بۇكىل قوعامنىڭ, ساياسي كۇشتەردىڭ, بيزنەستىڭ, زيالى قاۋىمنىڭ, ساراپشىلار مەن ازاماتتاردىڭ ديالوگى قاجەت. قولدا بار بارلىق الاڭدى پايدالانۋعا ءتيىسپىز. ناقتى ماسەلەلەردى شەشۋگە باعىتتالعان جۇمىس جۇرگىزۋ قاجەت. ءبىز ازاماتتارىمىزدىڭ بولاشاققا نىق سەنىممەن قاراۋىنا جاعداي جاساۋىمىز كەرەك, – دەدى قازاقستاننىڭ تۇڭعىش پرەزيدەنتى.
ساياسي كەڭەس بيۋروسىنىڭ وتىرىسىندا «Nur Otan» پارتياسىنىڭ پارتيالىق ءتىزىمى بويىنشا پارلامەنت ءماجىلىسى دەپۋتاتتارىنىڭ مانداتتارىن گ.ن.ابدىقالىقوۆاعا, ن.ب.الىمجانوۆقا, ن.ك.اشىمبەتوۆكە جانە ج.ق.وماربەكوۆاعا بەرۋ تۋرالى شەشىم قابىلداندى.
