قاسىم-جومارت توقاەۆ ءوز سوزىندە جاڭا بۋىندى تاربيەلەۋدەگى مۇعالىمدەردىڭ ءرولىن اتاپ ءوتتى.
– ەلىمىزدىڭ لايىقتى ازاماتتارىن تاربيەلەۋ – پەداگوگتاردىڭ جانە اتا-انالاردىڭ مىندەتى. لايىقتى ازامات – بۇل ءوز ءبىلىمىن وتانىمىزدىڭ يگىلىگى ءۇشىن جۇمسايتىن ادام. الدىمىزدا تۇرعان قۇبىلمالى زاماندا جاستارىمىز ەڭبەكقور بولماسا, ەشقانداي باسەكەگە تۇسە المايتىنىن تەرەڭ ءتۇسىنۋى كەرەك, – دەدى پرەزيدەنت.
مەملەكەت باسشىسىنىڭ ايتۋىنشا, ءبىلىم جانە عىلىم سالاسىنىڭ دامۋىنا تىڭ ءارى تەگەۋرىندى سەرپىن قاجەت.
– ءبىلىم ساپاسىن كوتەرۋ ءۇشىن كەشەندى شارالار قابىلداۋ قاجەت. بۇل, الدىمەن, مۇعالىمدەردىڭ بىلىكتىلىگىنە, وقۋلىقتاردىڭ ساپاسىنا, زامان تالابىنا ساي ينفراقۇرىلىم مەن ماتەريالدىق قورعا بايلانىستى ماسەلەلەر. اتالعان باعىتتار بويىنشا ءتيىمدى جۇمىس ىستەۋ قاجەت, ياعني تۋىنداعان ماسەلەلەردى دەر كەزىندە انىقتاپ, ولاردى شەشۋدىڭ وڭتايلى جولدارىن ۇسىنۋ كەرەك, – دەپ مالىمدەدى قاسىم-جومارت توقاەۆ.
پرەزيدەنت مۇعالىمدەردىڭ بىلىكتىلىگىن باعالاۋ يدەياسىن جۇزەگە اسىرۋداعى بيۋروكراتيا مەن بىرجاقتىلىققا, سونداي-اق وقىتۋشىلاردىڭ ءوز كاسىبىنەن تىس ءتۇرلى ءىس-شارالارعا تارتىلۋىنا قاتىستى سىني كوزقاراسىن ءبىلدىردى.
– جەرگىلىكتى اكىمدىكتەردىڭ ءوز وكىلەتتىلىكتەرىن اسىرا پايدالانىپ, مۇعالىمدەردى ءبىلىم بەرۋ سالاسىنا ەش قاتىسى جوق اكىمشىلىك ءىس-شارالارعا تارتۋ جاعدايلارى تولاستاماي تۇر. اتالعان ماسەلەلەردى شەشۋ ءۇشىن ۇكىمەتكە شۇعىل, ناقتى شارالار قابىلداۋدى تاپسىرامىن, – دەدى مەملەكەت باسشىسى.
سونىمەن قاتار قاسىم-جومارت توقاەۆ مەكتەپكە دەيىنگى ءبىلىم بەرۋ جانە تاربيەلەۋ جۇيەسىنىڭ ساپاسىن ارتتىرۋ, سونداي-اق ورتا ءبىلىم بەرۋدى ودان ءارى دامىتۋ ستراتەگياسىن ايقىنداۋ جونىندە شارالار قابىلداۋدى تاپسىردى.
– الەم ەلدەرىنىڭ 60 پايىزىندا مەكتەپتە ءبىلىم بەرۋ 6 جاستان باستالادى, ياعني مۇنداي جۇيە بالانىڭ زياتكەرلىك جانە الەۋمەتتىك جاعىنان ەرتەرەك دامۋىنا وڭ ىقپال ەتەدى. ۇكىمەتكە ءبىلىم مەن عىلىمدى دامىتۋدىڭ 2025 جىلعا دەيىنگى جاڭا باعدارلاماسى اياسىندا
12-جىلدىق ءبىلىم بەرۋ مودەلىنە بىرتىندەپ, جوسپارلى نەگىزدە كوشۋدى قامتاماسىز ەتۋدى تاپسىرامىن, – دەپ اتاپ ءوتتى پرەزيدەنت.
مەملەكەت باسشىسى «جاس مامان» جوباسىنىڭ جۇزەگە اسىرىلۋىن, تەحنيكالىق جانە كاسىبي ءبىلىم بەرۋ جۇيەسىن دامىتۋ جۇمىسىن پىسىقتاۋ, سونداي-اق ءۇش اۋىسىمدى جانە شاعىن كومپلەكتىلى مەكتەپتەر ماسەلەسىن شەشۋ قاجەت ەكەنىنە نازار اۋداردى.
قاسىم-جومارت توقاەۆ ءبىلىم جانە عىلىم مينيسترلىگىنە ءۇشتىلدى وقىتۋ جۇيەسىن ەنگىزۋ ۇدەرىسىن قايتا قاراۋدى تاپسىردى. اتالعان ماسەلە وقىتۋشىلار مەن ءبىلىم بەرۋ باعدارلامالارىنىڭ دايىندىعىن ەسكەرە وتىرىپ, جان-جاقتى زەرتتەۋدى قاجەت ەتەدى.
– جاراتىلىستانۋ پاندەرىن اعىلشىن تىلىندە وقىتۋ ءبىلىم ورتالىقتارىنىڭ كادرلىق مۇمكىندىگىنە قاراي, وقۋشىلار مەن اتا-انالاردىڭ قالاۋى بويىنشا ىسكە اسۋى ءتيىس. سوندىقتان, اعىلشىن ءتىلىن وقىتۋدى 2-3-ءشى سىنىپتان نەمەسە اتا-انالاردىڭ قالاۋىنا قاراي 5-ءشى سىنىپتان باستاۋ ورىندى ءارى ءتيىمدى بولادى دەپ سانايمىن, – دەپ, پرەزيدەنت ءوز ۇستانىمىن جەتكىزدى.
مەملەكەت باسشىسى مۇعالىمدەر جالاقىسىنىڭ مولشەرىن ارتتىرۋدى الدىڭعى قاتارداعى مىندەت ەكەنىن اتاپ ءوتتى.
– بۇل سالاداعى ەڭبەكاقى ەڭ تومەن جالاقىلاردىڭ قاتارىندا, ياعني ەل ەكونوميكاسى بويىنشا ورتاشا جالاقىنىڭ 65 پايىزىن قۇرايدى. ءبىلىم بەرۋ جۇيەسىنە بىلىكتى كادرلاردى تارتۋ ماقساتىندا ۇكىمەتكە ءتورت جىل ىشىندە مۇعالىمدەردىڭ ەڭبەكاقىسىن 2 ەسە كوبەيتۋدى تاپسىرامىن, – دەدى قاسىم-جومارت توقاەۆ.
بۇدان بولەك, پرەزيدەنت بارلىق ءبىلىم بەرۋ باعدارلامالارى مەن ستاندارتتارىن ءبىر دەڭگەيدە ازىرلەپ, قالا جانە اۋىل بالالارىنىڭ ءبىلىم دەڭگەيىندەگى الشاقتىقتاردى جويۋدى جانە تۇرعىلىقتى جەرى مەن اتا-انالارىنىڭ الەۋمەتتىك جاعدايىنا قاراماستان بالالارعا ساپالى ءبىلىم الۋعا مۇمكىندىك بەرۋدى تاپسىردى.
مەملەكەت باسشىسى عىلىمدى قارجىلاندىرۋ جۇيەسىنىڭ اشىقتىعىن قامتاماسىز ەتۋ, ۇلتتىق عىلىمي كەڭەستەردىڭ جۇمىسىن جەتىلدىرۋ قاجەتتىلىگىنە باسا ءمان بەردى. پرەزيدەنتتىڭ پىكىرىنشە, عىلىمدى ودان ءارى ينستيتۋتسيونالدى دامىتۋ تۇجىرىمداماسىن ازىرلەۋ قاجەت.
كونفەرەنتسيانىڭ سوڭىندا قاسىم-جومارت توقاەۆ وتاندىق ءبىلىم بەرۋ سالاسىن دامىتۋعا قوسقان ۇلەسى جانە بەلسەندى قوعامدىق قىزمەتى ءۇشىن بىرقاتار ۇستازدى ماراپاتتادى.
اتاپ ايتقاندا, «قۇرمەت» وردەنىمەن – پاۆلودار قالاسىنىڭ №8 دارىندى بالالارعا ارنالعان مەكتەپ-ليتسەيىنىڭ مۇعالىمى اناتولي بيليدا, الماتى وبلىسى ىلە اۋدانى №13 ورتا مەكتەبىنىڭ مۇعالىمى گۇلنار كازەرباەۆا, «ەرەن ەڭبەگى ءۇشىن» مەدالىمەن – ورال قالاسى
ءا.مولداعۇلوۆا اتىنداعى №38 مەكتەپ-ليتسەيىنىڭ مۇعالىمى گۇلزيحان تاسكارينا, تۇركىستان وبلىسى كەنتاۋ قالاسىنىڭ ا. يۋگناكي اتىنداعى ورتا مەكتەبىنىڭ مۇعالىمى دانەگۇل قۋاتبەك, «شاپاعات» مەدالىمەن – قاراعاندى قالاسىنداعى ن.نۇرماقوۆ اتىنداعى №2 وبلىستىق مامانداندىرىلعان مەكتەپ-ينتەرناتىنىڭ مۇعالىمى ەكاتەرينا نيپرۋك ماراپاتتالدى.
