ەلباسى نۇرسۇلتان نازارباەۆ 2019 جىلدى جاستار جىلى دەپ جاريالاعانى بەلگىلى. وسىعان وراي, ستۋدەنتتەردى الەۋمەتتىك جانە قوعامدىق پايدالى قىزمەتكە كەڭىنەن تارتۋعا باعىتتالعان «الەۋمەتتىك ستۋدەنتتىك كرەديت» جوباسى باستالماق. جوبا اياسىندا جوعارى وقۋ ورىندارىنىڭ ستۋدەنتتەرى اقشالاي سىياقى الىپ, قوعامدىق پايدالى جۇمىس ناتيجەلەرى ءۇشىن اكادەميالىق كرەديتتەردى قايتا ەسەپكە الا الادى. ماسەلەن, كۇندىزگى وقۋ نىسانىنداعى جوعارى وقۋ ورىندارىنىڭ ستۋدەنتتەرىنە 20 ساعات قىزمەتى ءۇشىن 20 مىڭ تەڭگەگە, 50 ساعات قىزمەتى ءۇشىن 50 مىڭ تەڭگەگە دەيىنگى كرەديت رەتىندە الەۋمەتتىك ستۋدەنتتىك كرەديت تۇرلەرى ۇسىنىلادى. ياعني ستۋدەنتتەر ۆولونتەرلەر رەتىندە بالالار ۇيلەرىندە, قارتتار ۇيلەرىندە, ءبىلىم بەرۋ جانە باسقا دا الەۋمەتتىك مەكەمەلەردە كومەك كورسەتەدى.
«الەۋمەتتىك ستۋدەنتتىك كرەديت» جوباسىن ىسكە قوسۋ 2019 جىلدىڭ قىركۇيەك ايىنا جوسپارلانعان, ال ونىڭ تاقىرىپتىق ءمودۋلى Qazvolunteer.kz ۆولونتەرلەردىڭ بىرىڭعاي ينتەرنەت پلاتفورماسىندا ورنالاسادى.
ايتا كەتەلىك, ۆولونتەرلەردىڭ Qazvolunteer.kz بىرىڭعاي ينتەرنەت پلاتفورماسىن اقپارات جانە قوعامدىق دامۋ مينيسترلىگى مەن «ۇلتتىق ۆولونتەرلىك جەلى» زاڭدى تۇلعالار بىرلەستىگى بىرلەسىپ ازىرلەدى. ونلاين-پلاتفورما qazvolunteer.kz ۆولونتەرلىك قىزمەتكە قاتىسۋشىلاردىڭ ءوزارا ءىس-قيمىل تەتىكتەرىن قۇرۋعا, قازاقستاننىڭ ەرىكتىلەرى مەن ەرىكتىلەر ۇيىمدارىنىڭ قىزمەتىن ۇيلەستىرۋگە, ۆولونتەرلىك جوبالاردى, باعدارلامالاردى, اكتسيالاردى اقپاراتتىق قولداۋدى جۇزەگە اسىرۋعا مۇمكىندىك بەرەدى. پلاتفورمادا كەز كەلگەن ادام ونلاين-تىركەۋدەن ءوتىپ, ۆولونتەرلىك قىزمەتكە قوسىلا الادى. قازىرگى ۋاقىتتا پلاتفورمادا 1400 ەرىكتى, 60-تان استام ەرىكتىلەر ۇيىمى تىركەلگەن.
