ء الي جەڭىمپازدارعا كۋبوكتى تابىستاۋ ءراسىمىن ۋەفا پرەزيدەنتى الەكساندەر چەفەرينمەن بىرگە وتكىزدى. فينالدا «ليۆەرپۋل» ءوزىنىڭ «چەلسيلىك» وتانداستارىن پەنالتي قورىتىندىسى بويىنشا جەڭگەن بولاتىن.
ەكى اياقسىز دۇنيەگە كەلگەن ءالي تۇرعانبەكوۆ «چەلسي» جانە «ليۆەرپۋل» فۋتبول كوماندالارىنىڭ جۇلدىزدارىمەن كەزدەسەتىنى بۇعان دەيىن حابارلانعان بولاتىن. «دوستار, مەن ۋەفا-نىڭ سۋپەركۋبوگىنا شاقىرتۋ الدىم. وندا چەمپيوندار ليگاسى مەن ەۋروپا ليگاسىنىڭ وتكەن ماۋسىمداعى جەڭىمپازدارى - «ليۆەرپۋل» مەن «چەلسي» كەزدەسەدى. قۋانىشىمدا شەك جوق», - دەپ بولىسكەن ەدى ءالي ءوز قۋانىشىمەن Instagram-داعى پاراقشاسىندا.
«ليۆەرپۋل» جاڭا ەۋروماۋسىمدى اشار ماتچىن «چەلسيمەن» ىستانبۇلدا وينادى. تۇرىك جۇرتىنا بارىپ قايتقانشا ءاليدىڭ پاراقشاسى مۇحاممەد سالاح, روبەرتو فيرمينو سەكىلدى جۇلدىزدارمەن, كوماندانىڭ باس باپكەرى يۋرگەن كلوپپەن تۇسكەن سۋرەتتەرمەن تولدى.
ءالي ءتىپتى ايگىلى فۋتبول جۇلدىزى ليونەل مەسسيمەن دە كەزدەسىپ, فوتوسۋرەتكە تۇسكەن. وعان دەيىن ءاليدى فرانتسۋزدىڭ «پاري-سەن-جەرمەن» كومانداسىنىڭ جۇلدىزدارى كيلليان مباپپە, ەدينسون كاۆاني مەن نەيمار شاقىرعان ەدى. ال 2017 جىلدىڭ جەلتوقسان ايىندا ءالي ءوزىنىڭ كۋميرى نيك ۆۋيچيچپەن جۇزدەسكەن بولاتىن.
ايتا كەتسەك, 2017 جىلدىڭ قىركۇيەك ايىندا ءالي مەن اناسى اقمارال قازاقپارات تىلشىسىنە سۇحبات بەرىپ, وتباسىلارىنىڭ سوقپاق جولدى باسىپ وتكەنىن ايتىپ بەرگەن بولاتىن. دۇنيەگە كەلگەن كەزىندە ونىڭ اناسىنا ءتىپتى تۋىستارى بالادان باس تارتۋىن ايتىپ, ۇگىتتەگەن. ءالي وسكەن كەزدە ءتىپتى ەشبىر مەكتەپ ونى قابىلداعىسى كەلمەپتى. اقىرى, وسى قيىندىقتاردىڭ ءبارىن باسىپ وتكەن بالا ەلورداداعى «نۇر وردا» مەكتەبىنە ءتۇسىپ, كۇنى بۇگىنگە دەيىن سول ءبىلىم شاڭىراعىندا وقۋىن جالعاستىرىپ جاتىر.
