ساعاتىمىز قىسقارا ما دەپ قورقامىز
گۇلزينا ساتباەۆا,
تۇركىستان وبلىسى, نۇرتاس اۋىلىنداعى «امانگەلدى» جالپى ورتا مەكتەبىنىڭ حيميا ءپانى مۇعالىمى
2020 جىلدان باستاپ 10-11 سىنىپتاردى كاسىبي باعدار بويىنشا وقىتۋ كوزدەلگەن. وسىعان وراي قازاق ءتىلى, ماتەماتيكا, اعىلشىن ءتىلى سەكىلدى كەيبىر مىندەتتى پاندەردەن باسقاسىن وقىتۋدى وقۋشىلاردىڭ ءوز تاڭداۋىنا قالدىرماق. ءىرى قالالارعا بۇل جۇيە ەنگىزىلە باستاپتى. اۋىلدىق جەردەگى مەكتەپتە جۇمىس ىستەيتىندىكتەن بىزگە ءالى جەتە قويعان جوق. بىراق بۇل ناقتى قولعا الىنسا, ءبىز سياقتى حيميادان ساباق بەرەتىن مۇعالىمدەردىڭ ساعات سانى ءسوزسىز قىسقارادى. كۇندەلىكتى ءومىردىڭ ءوزى – حيميا, تىرشىلىكتەگى تۇتىناتىن زاتتاردىڭ ءبارى وسى سالاداعى ىزدەنىستەر ارقىلى پايدا بولدى. وعان قوسا حيميا پانىنە ماتەماتيكا مەن فيزيكانىڭ ەسەپتەرى, بيولوگيانىڭ تەوريالارى دا سىيىپ كەتكەن. سول سەبەپتى حيميانىڭ مىندەتتى پاندەردىڭ قاتارىنا قوسىلۋىن قالايمىز.
كوز الدىمىزداعى بالالار ءوزى سۇيگەن سالاعا ەمەس, گرانتقا ۇمتىلادى. سونى سىلتاۋراتىپ, حيميادان قالاپ تۇرسا دا باس تارتادى. ويتكەنى وعان تاپسىرسا, گرانتقا ءتۇسۋ مۇمكىندىگى تومەن. تالاپ ەتىلەتىن بالل مولشەرى جوعارى ءارى ءتورتىنشى ءپان رەتىندە حيميانى تاڭداعان تالاپكەرلەرگە تاپسىراتىن ماماندىقتار قاتارى تىم از. سول ماماندىقتاردىڭ اياسىن كەڭەيتسە ءجون بولار ەدى.
وقۋشىلاردىڭ حيميا پانىنە دەگەن قىزىعۋشىلىعىن ارتتىراتىنى – زەرتحانالىق جۇمىستار. ونداعى ءتۇرلى ناتيجەلەر بالالاردىڭ حيميانى تاڭداۋىنا ىقپال ەتىپ جاتادى. بىراق اۋىل مەكتەپتەرىندە قالاداعىداي زەرتحانا تۇگىلى جابدىقتار جەتىسپەيدى. وسى ولقىلىقتىڭ ورنى تولسا, حيميا سالاسىن دامىتۋعا ۇلەس قوساتىن ماماندار مەن بولاشاق عالىمدار اۋىلداردان دا كوپتەپ شىعادى. زەرتحانالىق جۇمىستار ساباق ۋاقىتىنان باسقا كەزدە ۇيىمداستىرۋدى قاجەت ەتەدى. وعان ارنايى ۋاقىت بولەتىندىكتەن ءارى بۇل زياندى زاتتارمەن جاقىن بولۋدى تالاپ ەتەتىندىكتەن وعان بولەك اقى تولەۋدى قاراستىرۋىن سۇرايمىن.
تەوريا وندىرىستەن قالىس قالدى
ساعيدا نازاروۆا,
م.مامەتوۆا اتىنداعى قىزىلوردا پەداگوگيكالىق جوعارى كوللەدجىنىڭ وقىتۋشىسى
كاسىپتىك-تەحنيكالىق ءبىلىم بەرۋدە ماسەلەلەر جەتەرلىك. سونىڭ ىشىندە ەڭ باستىسى – وقىتۋ باعدارلامالارى. ولاردى تۇبەگەيلى جاڭارتۋ قاجەت. سەبەبى بىزدەگى تەوريا وندىرىستەن الدەقايدا ارتتا قالىپ قويدى. وندىرىستىك تاجىريبەگە بارعان, وقۋ بىتىرگەننەن كەيىن جۇمىسقا تۇرعان تۇلەكتەرىمىزدەن بىلەمىز. كاسىپورىندار ءبىزدىڭ بەرگەن بىلىمگە قاناعاتتانبايدى. جاڭا تەحنولوگيالار عاسىرىندا تالاپ كۇن سايىن وزگەرىپ وتىر, وقىتۋدىڭ باعىتى دا سوعان ساي بولۋى قاجەت. ارينە ستۋدەنتتەردى دايارلاۋدا جاڭالىقتاردان قۇر قالماۋىن قاداعالاپ وتىرامىز. دەگەنمەن, بەكىتىلگەن باعدارلامادان ءارى اسىپ كەتە المايمىز.
جاقىندا بولاشاق ستۋدەنتتەرىمىزبەن الدىن الا كەزدەسۋ ماقساتىندا مەكتەپتەردى ارالادىق. كوللەدجگە تۇسكىسى كەلەتىن, 9-سىنىپقا وتكەن نەمەسە ءبىتىرىپ جاتقان وقۋشىلار ءالى قانداي ماماندىقتى تاڭدايتىنىن بىلمەيدى. كوبىسىنە ماماندىعىن اتا-اناسى تاڭداپ بەرەدى. دامىعان ەلدەردەگىدەي 5-سىنىپتان باستاپ كاسىبي باعدار بەرەتىن ارنايى ءپان ءجۇرۋى كەرەك. سونىڭ نەگىزىندە بالا ۋنيۆەرسيتەت الدىندا عانا ەمەس, كوللەدجگە كەلەر كەزدە دە بولاشاعىن بولجاي الاتىن بولادى.
ءبىز بىلتىردان باستاپ جوعارى كوللەدج بولدىق, بەدەلىمىز بەن دەڭگەيىمىزدىڭ وسكەنىنە البەتتە قۋاندىق. ويتكەنى بىزگە مامانداردى باكالاۆر دارەجەسىندە دايىنداۋعا بولاتىن قۇقىق بەرىلدى. وسى بويىنشا ءبىر جىل بويى تابانداپ جۇمىس ىستەدىك. بىراق بۇل ستۋدەنتتەرگە, وسى نەگىزدە بىتىرەتىن تۇلەكتەرگە ءتيىمسىز. سەبەبى بىزگە بەرىلگەن دارەجە كوللەدج بەن ۋنيۆەرسيتەت بەرەتىن ديپلوم دەڭگەيىنىڭ ورتاسىندا قالىپ قويدى. جوعارى بىلىمگە دە, كوللەدج بىتىرگەنگە دە جاتپايدى. جوعارى كوللەدجدەن باكالاۆر دارەجەسىن الىپ شىققاندار جوعارى ءبىلىمدى بولۋى ءۇشىن قايتادان ۋنيۆەرسيتەتكە تاپسىرىپ, تاعى وقۋى كەرەك. وسى جۇمىس جۇيەلەۋدى قاجەت ەتەدى. بالكىم ءبىزدى ينستيتۋت دەڭگەيىمەن تەڭەستىرۋ كەرەك شىعار. بولماسا, تۇلەكتەرگە بەرەتىن ديپلوم دارەجەسىن رەتتەگەنى ءجون.
