ۋاقىتتىڭ تابىنا توتەپ بەرىپ تۇرعاندىعى دا سودان بولۋى ىقتيمال. ايتپەسە جالپاق جونداعى جەلدىڭ ءوتى, ارقانىڭ اپتالاپ جاۋاتىن اق جاۋىنى مۇرتىن قيسايتا الماعان قياپات قاسيەت قايدان دەرسىز.
كىرپىشتىڭ ۇزىندىعى 31-32 سانتيمەتر, ەنى 8-10 سانتيمەتر شاماسىندا. جالپى بيىكتىگى 5,7 مەتردى قۇرايدى. كەسەنەنىڭ سەگىز قىرلى ءپىشىنىن سيپاتتايتىن تىكبۇرىش قىزىعۋشىلىق تۋعىزادى. سول زامانداعى ساۋلەت ونەرىنىڭ تۋىندىسى ىسپەتتى. توبەسى دە ەرەكشە. قولشاتىرعا ۇقساس. سفەرالىق-كونۋستىق كۇمبەزشەلەرمەن جالعانعان. ءار قىرىنىڭ ءدال ورتاسىندا جەردەن شامامەن 1,8 مەترگە جۋىق بيىكتىكتە شاعىن ويىقتار بار. سەگىز قىرلى كۇمبەزدىڭ ۇستىندە ەنى كەڭ جابىندىسى بار, ال ىشىندە ءدال وسى جەردە ەنى ءسال تارلاۋ ءدالىز ورنالاسقان.
بەستەمىر سوپى وسى توڭىرەككە ءدىن ءىلىمىن تاراتقان. ەسكى كوزدەردىڭ ايتۋىنا قاراعاندا, ەل ءىشىن ىنتىماققا شاقىرىپ, جاس ۇرپاقتى ادالدىق پەن ارلىلىققا تاربيەلەگەن. ومىردەن وتكەن سوڭ سوپىنىڭ قارا باسىن حانداي سىيلاعان جالپاق جۇرت جۇمىلىپ مازار تۇرعىزىپتى. ىشىنە جوعارىدا ءبىز ايتىپ وتكەن ويىقتاردان, كۇمبەزدەگى توبە ساڭىلاۋلارىنان سەبەزگىلەپ جارىق ءتۇسىپ تۇرادى. قۇتتى ءسوپىونىڭ زامانداستارىنىڭ كوكىرەگىنە قۇيعان ءبىلىم ساۋلەسى ءتارىزدى.
جاپان تۇزدەگى ار مەن ادامگەرشىلىكتىڭ قاراۋىلىنداي جالعىز مازاردىڭ جانىنا تۇتاسىپ تال ءوسىپتى. تال بۇتاقتارىنا سوپىعا ءمىناجات ەتىپ كەلگەن ادامدار ىرىمداپ اق شۇبەرەك بايلاپ كەتەدى ەكەن. تالىمىنەن تاعىلىم العان كەيىنگى جۇرتتىڭ اپپاق ىقىلاسى ىسپەتتى.
اقمولا وبلىسى,
ەگىندىكول اۋدانى
