بۇل جونىندە كابار اگەنتتىگىندە وتكەن ءباسپاسوز ءماسليحاتىندا قىرعىزستاننىڭ باس پروكۋرورى وتكۋربەك دجامشيتوۆ ءمالىم ەتتى.
ونىڭ ايتۋىنشا, قىلمىستىق ىستەر, اتاپ ايتقاندا, جاپپاي تارتىپسىزدىك, تۇتقىنعا الۋ, ءتورت ءىس – ولتىرۋگە ارەكەتتەنۋ جانە بۇزاقىلىق بويىنشا كوزعالعان. باس پروكۋرور تەرگەۋشىلەردەن ۆەدومستۆوارالىق كوميسسيا قۇرىلعانىن اتاپ ءوتتى. ونىڭ سوزىنەن بەلگىلى بولعانداي, تۇتقىنعا الۋ جانە جاپپاي تارتىپسىزدىك ءىسى بويىنشا فاريد نيازوۆ, الگا كىلىچەۆ, امانتۋر دجامگىرچيەۆ جانە م.شامەنوۆ ۇستالدى.
سوت قاۋلىسىنا سايكەس, ولار 8 قازانعا دەيىن تۇتقىنعا الىنعان. وتكۋربەك دجاشيتوۆتىڭ ايتۋىنشا, اتامباەۆقا قارۋ قولدانۋ, جاپپاي تارتىپسىزدىك ورناتۋ, تەرگەۋگە كەدەرگى كەلتىرۋ, تۇتقىنعا الۋ, 1 ادامدى ءولتىرۋ جانە ولتىرۋگە وقتالۋ ىسىنە قاتىستى كۇدىكتەلىپ وتىر.
7 تامىز كۇنى كەشكە قوي-تاشتا ەلدىڭ بۇرىنعى پرەزيدەنتى المازبەك اتامباەۆتىڭ ۇيىندە ا.باتۋكاەۆتىڭ ءىسى بويىنشا تەرگەۋ ورگاندارىنا كۇشتەپ اكەلۋ كەزىندە قاۋىپسىزدىك كۇشتەرى وكىلدەرى مەن بۇرىنعى پرەزيدەنتتى قولداۋشىلار اراسىندا قاقتىعىس بولدى. سالدارىنان «الفا» مۇقك ارنايى بولىمشەسى باسشىسىنىڭ ورىنباسارى ۇسەن نيازبەكوۆ كوز جۇمىپ, 40-تان استام ادام جارالاندى.
8 تامىز كۇنى قۇقىق قورگاۋ ورگاندارى اتامباەۆتى قوي-تاش اۋىلىنداعى ۇيىندە قولعا ءتۇسىرىپ, 26 تامىزعا دەيىن ۇقك تەرگەۋ يزولياتورىنا جىبەرىلدى. قوي-تاشتا ورىن العان جاعدايعا, ارناي جاساق قىزمەتكەرىنىڭ كوز جۇمۋىنا جانە قۇقىق قورگاۋ ورگاندارى قىزمەتكەرلەرىنىڭ جاراقاتتانۋىنا بايلانىستى سوتقا دەيىنگى ءىس جۇرگىزۋ باستالدى.
