اتالعان كورمەنىڭ ەرەكشەلىگى سول, جەرگىلىكتى فوتوسۋرەتشىلەر ءبىر كۇن ىشىندە قاراعاندىلىقتاردىڭ كۇندەلىكتى ءومىرى مەن قالانىڭ كورنەكتى جەرلەرىنە جاتاتىن عيماراتتار مەن ەسكەرتكىشتەردى, كوشەلەر مەن گۇلزارلاردى سۋرەتكە تۇسىرگەن بولاتىن. كورمەنى ۇيىمداستىرۋشىلار كەنشىلەر استاناسىنىڭ 85 جىلدىق داتاسىنا ورايلاستىرىپ, الگى سۋرەتتەردىڭ ىشىنەن 85 تۋىندىنى تاڭداپ الدى.
جالپى, «رۋحاني جاڭعىرۋ» باعدارلاماسى اياسىندا ۇيىمداستىرىلعان بۇل شارا ءداستۇرلى ء«بىز – قاراعاندىلىقتارمىز» فەستيۆالىنىڭ ءبىر بولىگىنە جاتادى. كورمەگە قاجەتتى قاراجات قالالىق بيۋدجەتتەن مەملەكەتتىك الەۋمەتتىك تاپسىرىس اياسىندا ءبولىندى.
– بۇل دەگەنىڭىز بار بولعانى ءبىزدىڭ جەرلەستەرىمىزدىڭ ومىرىنەن الىنعان ءبىر كۇن. مەن ونى ءتىپتى بىلاي دەپ تە تۇجىرىپ ايتار ەدىم: ەگەر فوتواپپاراتتىڭ ءاربىر كادرى – ءبىر سەكۋندتىڭ الپىستان ءبىر بولىگى بولسا, وندا بۇل كورمە ءبىر جارىم-ەكى سەكۋندتىڭ ىشىنە سىيىپ كەتەدى. بىراق وسى قاس-قاعىم ءساتتىڭ وزىندە فوتوسۋرەتشىلەر كوپ نارسەنى كورسەتە الدى. ولاردىڭ كوزقاراسى مەن شەبەرلىگىنىڭ ارقاسىندا كورەرمەندەر قالانىڭ ءومىرىن ءتۇرلى قىرىنان كورۋگە مۇمكىندىك الدى, – دەيدى TEFAEurasiaphoto شىعارماشىلىق بىرلەستىگىنىڭ مۇشەسى يۋري ۆارىگين.
اتالعان كورمەنى ۇيىمداستىرۋعا قاراعاندى قالاسىنىڭ اكىمدىگى مەن قاراعاندى وبلىسىنىڭ كاسىپكەرلەر قاۋىمداستىعى قولداۋ كورسەتتى. ولار ءساتتى باستالعان بۇل جوبا جىل سايىن ءوتىپ تۇرسا دەگەن تىلەك ايتتى. مىسالى, ء«بىز – قاراعاندىلىقتارمىز» جوباسىنىڭ جەتەكشىسى, وبلىستىق كاسىپكەرلەر قاۋىمداستىعى باسشىلارىنىڭ ءبىرى گۇلنار قۇربانباەۆا كورمەدەگى سۋرەتتەر ارقىلى كەنشىلەر استاناسىنىڭ كەلبەتىن باسقا قىرىنان كورىپ, ەرەكشە اسەر العانىن ريزاشىلىقپەن جەتكىزدى.
– بۇل سۋرەتتەر ارقىلى مەن قاراعاندىنى باسقا قىرىنان تانىدىم. «توقتاي تۇر مەزەت, سەن نەتكەن عاجاپسىڭ!» دەپ بەكەر ايتىلماعان عوي. وسى كورمەنى تاماشالاعان قاراعاندىلىقتار تۋعان قالاسىن ودان ءارى سۇيە تۇسەتىنىنە سەنىمدىمىن. ءوز باسىم «قاراعاندى ءومىرىنىڭ ءبىر كۇنى» اتتى بۇل كورمەنىڭ جىل سايىن وتەتىن ءداستۇرلى شاراعا اينالۋىنا قۋانا داۋىس بەرەر ەدىم, – دەدى ول اعىنان جارىلىپ.
«قاراعاندى ءومىرىنىڭ ءبىر كۇنى» فوتوكورمەسى وبلىستىق بەينەلەۋ ونەرى مۇراجايىندا 12 تامىزعا دەيىن جالعاسادى.
قاراعاندى
