الماتى قالاسى مۋزەيلەر بىرلەستىگى ديرەكتورىنىڭ دامۋ جونىندەگى ورىنباسارى قايرات تارباەۆتىڭ ايتۋىنشا, مۋزەيتانۋشى, ەتنوگراف, ساۋلە مەرەكە ەلىمىزدەگى ەڭ العاشقى جەتىگەنشى قىز. قازاق حالقىنىڭ ءداستۇرلى اۋەنى – رۋحاني مۇرانىڭ ەڭ باي قازىناسى. ماڭگىلىكتىڭ ەڭ كەرەمەت سيمۆولى, ادام ەڭبەگى مەن تالانتىنىڭ, ىزدەنىسى مەن ماحابباتىنىڭ, قايعى-قاسىرەتى مەن قۋانىشتارىنىڭ جەمىسى. ءومىر شىندىعى دىبىستىق كوركەم بەينەلەرمەن كورسەتەتىن ونەردىڭ ۇلتتىق سالاسى – قازاق مۋزىكاسىن, سونىمەن قاتار ەلىمىزدىڭ مادەنيەتىن, تاريحىن ساقتاپ, زەرتتەيتىن مۋزەيلەردى دامىتۋدا, ناسيحاتتاۋدا ساۋلە كارىبايقىزىنىڭ ەڭبەگى ەرەكشە.
1981 جىلى قۇرىلعان «سازگەن» ەتنوگرافيالىق ءانسامبلىنىڭ ەڭ العاشقى مۇشەلەرىنىڭ ءبىرى. «سازگەننىڭ» ءبىر ەرەكشەلىگى وركەستر مۇشەلەرى مۋزىكالىق اسپاپتاردا عانا ويناپ قويماي, اسپاپتاردى زەرتتەپ, عىلىمي نەگىزدەرى تۋرالى مالىمەتتەر جيناۋمەن اينالىسىپ جۇرگەن عالىمدار. ساۋلە كارىبايقىزى ىقىلاس اتىنداعى حالىق مۋزىكالىق اسپاپتار مۇراجايىندا باس قور ساقتاۋشى بولىپ جۇمىس ىستەدى.
الماتى مۋزەيىنە ءوزى جيناعان جادىگەرلەردى تاپسىرۋى – ونەرگە جاناشىرلىعى دەپ سانايتىن ماماندار ساۋلە كارىبايقىزىنىڭ قازاق مۋزىكاسىن زەرتتەۋدەگى, ساقتاۋداعى ەڭبەگى ەرەكشە دەپ باعالايدى. مۋزىكا ءبىر دىبىستاردىڭ ۇيلەسىمدىلىگى عانا ەمەس, قازاق حالقىنىڭ ەڭ باي رۋحاني مۇراسى, قازىناسى. ءومىردىڭ شىندىعىن, قۇبىلىستاردى مۋزىكانىڭ, اۋەننىڭ تىلىمەن, دىبىستىڭ كوركەم بەينەلەرى مەن كورسەتە الاتىن قازاق مۋزىكاسىنىڭ قۇدىرەتىن دارىپتەدى. ەلىمىزدىڭ مادەنيەتىن, تاريحىن ساقتايتىن, زەرتتەيتىن مۋزەيلەر جۇمىسى باعىتىندا دا كوپتەگەن ەڭبەكتەر جازدى. زەينەتتە جۇرسە دە جاستاردى, مەكتەپ وقۋشىلارى قازاق ونەرىنىڭ مۋزىكا تاريحىمەن تانىستىرۋىن جالعاستىرىپ كەلەدى. قازاق عىلىمىنداعى اسپاپتانۋ دەگەن ۇلكەن باعىتتى دامىتىپ, شۆەيتساريا, ءۇندىستان, فرانتسيا, يراندا وتكەن فەستيۆالدەرگە قاتىسىپ, قازاق مۋزىكاسىن الەمگە تانىتۋدا ەش جالىققان ەمەس. قىزدار ينستيتۋتىندا «اقتۇمار» ەتنومۋزەيىن قۇرىپ, قازاقتان شىققان قىز-كەلىنشەكتەردىڭ جادىگەرلەرىن, ءومىرباياندارى تۋرالى زەرتتەۋلەرىن جۇرگىزىپ كەلەدى.
الماتى
