قۇلاننىڭ قوڭىر اۋەنىن بويىنا ءسىڭىرىپ, تابيعات بەرگەن تالانتتى تاعدىرىم دەپ ۇققان جاڭبىرشى ۇسەيىنوۆ عۇمىرى قاپيادا كىلت ۇزىلسە دە, وسىناۋ ءبىر ۇعىمدى جانىمىزعا جارىق ساۋلە ەتىپ سىيلاپ ەدى. مارقۇم مەلس وزبەكوۆ ەكەۋى قۇلاننىڭ كوكدونەن دەيتىن الاتاۋ باۋرايىنداعى اۋىلىنان شىعىپ, ونەر اتتى ولمەس الەمگە ساپار شەككەنى ەل ەسىندە. سودان بەرى ارادا جىلجىپ تالاي جىل ءوتتى, قوس تالانت تا بۇل كۇندە قايتپاس ساپارعا اتتانعان. الايدا جۇلدىزداردىڭ ءىز تاستاپ اعاتىنى سياقتى, تالانتتىڭ سوڭىندا دا ولە المايتىن ونەر قالادى ەكەن.
جاڭبىرشى ۇسەيىنوۆ وسىدان جارتى عاسىرعا جۋىق ۋاقىت بۇرىن قۇلان توپىراعىندا «تاڭ سامالى» ءانسامبلىن قۇرعان ونەر يەسى. ءوزى دە جاستارعا ۇستازدىق ەتە ءجۇرىپ, سۇلۋ دا سازدى اندەر جازدى. سول كەزدە اۋداندا جۇرگەن ءانسامبلدىڭ رەسپۋبليكالىق تەلەارناعا شاقىرتۋ الىپ, الماتى تورىندە ونەر كورسەتكەنىن ەل ۇمىتقان جوق. كومپوزيتوردىڭ دوسى تالىپبەك شاقباەۆ سول ءبىر كۇندەردى تولقىنىسپەن ەسكە الادى. «مەلس اعا مەن جاڭبىرشى دوسىمنىڭ ونەرىنە تالاي رەت كۋا بولدىم. مەلس اعانىڭ اندەرىن بالا كەزىمنەن بىلەمىن. اۋىلدىڭ توپىراعى جاڭبىرشى دوسىمنىڭ اندەرىنە تالاي تەربەلەتىن», دەيدى ول. ءيا, ونەردىڭ قۇدىرەتى جارق ەتىپ شىعۋ بولعانمەن, جالپ ەتىپ سونبەۋ ەكەنىن دە وسىندايدان كورۋگە بولادى.
جازدىڭ جىلى جاڭبىرى. جاڭبىرشى ۇسەيىنوۆتىڭ اندەرى تىڭداعان جانعا تۋرا سولاي اسەر ەتەدى. جانىڭدى جاۋراتپايدى, قايتا جىلىتادى. جۇرەگىڭنىڭ نازىك پەرنەلەرىن باسىپ ءوتىپ, جانىڭنىڭ جازيراسىن جايلايدى. ماڭدايىڭدى اقجاۋىنعا توسەپ, اقتارىلعانداي بولاسىڭ. ونىڭ «قۇداشا», «دوسىما», «ساعىنىش» سياقتى ليريكالىق اندەرى جازدىڭ جىلى جاڭبىرىنداي اسەر ەتەتىنى سوندىقتان. ال كومپوزيتوردىڭ قۇلاندىق اقىن كارىپجان ءنۇسىپتىڭ سوزىنە جازىلعان «سوعىستان قايتقان اكەلەر» ءانى وتان ءۇشىن وت كەشكەن مىڭداعان بوزداقتىڭ رۋحىنا قويىلعان ەسكەرتكىش دەسە دە بولادى. مۇندا ساعىنىش تا, وكىنىش تە, قۋانىش پەن مۇڭ دا بار. بۇل ءان «شالقار» ۇلتتىق راديوسىنىڭ التىن قورىنا ەنگىزىلىپ, ءان تاريحىندا ماڭگىلىككە قالدى.
تالانت توپىراعىنا تارتىپ تۋادى دەپ جاتامىز. ونەرگە دە ءورىس كەرەك ەكەنى بەلگىلى. بۇل ورايدا جاڭبىرشى ۇسەيىنوۆتىڭ شىعارماشىلىعىنا سۋىرىپسالما اقىن ءشىناسىل جانارىستانوۆتىڭ جىرلارى, جۇماتاي ءشىناسىلوۆتىڭ كۇيى جانە مەلس وزبەكوۆتىڭ اندەرى اسەر ەتپەي قويعان جوق. وسىلايشا سىرلاستىق پەن مۇڭداستىقتى قاتار ورگىزە بىلگەن كومپوزيتوردىڭ ولمەس ونەرى ومىرگە كەلدى. بۇگىندە ت.رىسقۇلوۆ اۋداندىق مادەنيەت ۇيىندە مەلس پەن جاڭبىرشىنىڭ كوزىندەي بولعان «ۆوستوك» بايانى تۇر. تالاي اندەردىڭ ومىرگە كەلۋىنە سەبەپشى بولعان اسپاپ كەيدە يەلەرىن جوقتاپ تۇرعانداي جانىڭدى جابىرقاتادى.
شىنايى ونەردى شاڭ باسپاۋى ءتيىس. بۇگىندە جاڭبىرشى ۇسەيىنوۆتىڭ ەسىمى كوپ اتالا بەرمەيتىنى راس. بيىل قۇلان جەرىندە كومپوزيتوردىڭ اندەرىنەن ء«انىم ساعان, امانات!» اتتى جەرگىلىكتى ونەرپازداردىڭ بايقاۋى وتكەن ەدى. بۇل باستاما الداعى ۋاقىتتاردا دا جالعاسىن تاپسا يگى. قازىرگى كەزدە جازدىڭ جىلى جاڭبىرىنداي اسەر ەتەتىن جاڭبىرشىنىڭ اندەرى تىڭدارمانعا كەرەك-اق. الداعى ۋاقىتتا كومپوزيتوردىڭ اندەرى اۋليەاتا اسپانىن انگە بولەپ تۇرسا, قانداي كەرەمەت. بۇل دا تۋعان جەر تالانتتارىن تانىتۋدىڭ, ونەرىن ناسيحاتتاۋدىڭ كورىنىسى بولار ەدى. شىن ونەر «كوزدەن كەتسە, كوڭىلدەن دە كەتەتىن» نارسە ەمەس ەكەنىن تەك ۇعىنا بىلسەك بولعانى...
