جۋىردا «قىمىزفەست» فەستيۆالى اياسىندا وسى ويىن بويىنشا اشىق بىرىنشىلىك ۇيىمداستىرىلىپ, نۇر-سۇلتان, كوكشەتاۋ, پەتروپاۆل قالالارىنان جانە ءوڭىر اۋداندارىنان وكىلدەر قاتىستى.
«بوتاي» ۇلتتىق ويىنىنىڭ اۆتورى, «قىزىلجار جاستارى» قوعامدىق بىرلەستىگىنىڭ توراعاسى ەرلىك مۇحامەدجانوۆ باستاپقىدا ۇمىت بولعان ۇلتتىق سپورت ءتۇرى – ساقا ويىنىن جاڭعىرتۋدى ماقسات ەتىپ, بىرنەشە جىل بويى ءوز بەتىنشە ىزدەنگەن. اۋىل اقساقالدارىنا جولىعىپ, اقپارات جيناستىرعان. اقىرى ساقا ويىنى نەگىزىندە بىرقاتار وزگەرىستەر ەنگىزە وتىرىپ «بوتاي» ويىنىنىڭ ەرەجەسىن قۇراستىرىپ شىققان. ماسەلەن, ونى كەز كەلگەن جەردە ويناي بەرۋگە بولادى. جىلقى مەن ءىرى قارا مالىنىڭ توپاي سۇيەكتەرى بولسا جەتكىلىكتى. سوسىن تەك ەر ادامدار عانا قاتىسادى. «اسىق اتۋ» الاڭى شەڭبەرلەردەن قۇرالسا, مۇندا تىك ءتورتبۇرىشتاردان تۇرادى. ازىرگە وڭىرگە تانىمال ۇلتتىق برەند سانالعانىمەن, رەسپۋبليكالىق دەڭگەيدە جاڭعىرتۋدىڭ مۇمكىندىكتەرى مول. ءتىپتى ول يۋنەسكو تىزىمىنە ەنگىزۋدى دە جوسپارلاپ قويىپتى.
«قامبار اتا ت ۇلىگى العاش رەت قولعا ۇيرەتىلگەن ايىرتاۋ اۋدانىنداعى بوتاي تۇراعىن قازىر الەم عالىمدارى مەن ارحەولوگتارى جاقسى بىلەدى. قازبا جۇمىستارى بارىسىندا جىلقى مالىنىڭ توپاي سۇيەكتەرى مەن تىلەرسەكتەرى كوپتەپ تابىلعان. سوعان قاراعاندا ولارمەن ءتۇرلى ويىندار وينالعان بولۋ كەرەك دەگەن بولجام بار. اساۋعا العاش بۇعالىق سالىنعان جەردىڭ قۇرمەتىنە «بوتاي» دەگەن اتاۋ بەرىلىپ, «رۋحاني جاڭعىرۋ» باعدارلاماسى اياسىندا بارىنشا ۇلتتىق بوياۋعا قانىقتىرىپ, جاڭاشا قىرىنان دامىتۋدى, قۇندىلىقتارىمىزدى بارىنشا ناسيحاتتاۋدى ماقسات ەتىپ وتىرمىز. ءوزىمىز بالا كەزىمىزدە شاڭعا كومىلىپ وينايتىنبىز. بىزدەن كەيىنگى تولقىننىڭ ساقاعا اۋەستەنگەنىن كورمەپپىن. مەكتەپتەردە ۇيىرمەلەر اشىپ, ويىننىڭ ەرەجەسىن, ءادىس-تاسىلدەرىن وقۋشىلارعا ۇيرەتەمىز. وسىدان ءبىر اي بۇرىن وڭىرىمىزدە اسىق اتۋدان رەسپۋبليكالىق چەمپيونات ءوتىپ, ءبىزدىڭ باستامامىز اسىق اتۋ فەدەراتسياسى باسشىلىعى تاراپىنان قولداۋ تاپقان بولاتىن», دەيدى بۇدان وزگە يگى ىستەرگە دە قوزعاۋ سالىپ جۇرگەن ەرلىك باۋىرىمىز.
جارىستىڭ باس تورەشىسى قۋات ءحايرۋليننىڭ ايتۋىنشا, «بوتاي» ويىنى كۇش-جىگەردى, قىراعىلىقتى ارتتىرىپ, ەپتىلىككە, مەرگەندىككە, شاپشاڭدىققا باۋليدى. ويىنشى ۇنەمى قيمىل-قوزعالىستا جۇرگەندىكتەن قان اينالىمى جاقسارادى, دەنەسى شىنىعادى. جارىستىڭ ەرەجەسى بويىنشا ءار ويىنشىنىڭ ەكى ءديى, ءبىر ساقاسى بولادى. ويىن الاڭىندا قاز-قاتار تىزىلگەن ديلەردى ساقامەن كوزدەپ اتىپ, سىزىقتان ۇشىرىپ شىعارۋ كەرەك. پەتروپاۆلدىق اسەت دەمەسىنوۆ ءۇش پارتيانىڭ ەكەۋىندە قارسىلاسىنان باسىم ءتۇسىپ, قورىتىندى ەسەپتە ءبىرىنشى ورىنعا كوتەرىلدى. ەكىنشى ورىن كوكشەتاۋلىق سامات اۋكەنوۆكە بۇيىردى. نۇر-سۇلتان قالاسىنان كەلگەن ەسكەندىر راحمەتوۆ ءۇشىنشى ورىندى مىسە تۇتتى.
بۇدان بولەك «ۇزدىك سۇرمەرگەن», «كورەرمەندەر كوزايىمى», «جەڭىسكە دەگەن ۇمتىلىسى ءۇشىن» اتالىمدارىنىڭ جەڭىمپازدارى انىقتالىپ, باعالى سىيلىقتارمەن, ديپلومدارمەن ماراپاتتالدى.
سولتۇستىك قازاقستان وبلىسى
