اۋعان ەلى ەجەلدەن قولونەر شەبەرلەرىمەن ەرەكشەلەنەدى. اتالمىش كورمەگە اۋعانستاننىڭ تاڭداۋلى قولونەر شەبەرلەرىنىڭ قولىنان شىققان ۇزدىك بۇيىمدار ۇسىنىلدى. ولاردىڭ ساپىنان اعاش ويۋ, جيھازدى ارلەۋ ونەرى, گراۆيۋرامەن بەزەندىرۋ, مەتالل قۇمىرالار, زەرگەرلىك اشەكەيلەر سەكىلدى ونەر تۋىندىلارىن كەزدەستىردىك. ءار بۇيىمنىڭ وزىنە ءتان تىلسىمى بارداي. اسىرەسە مىس جانە قولادان سوعىلعان ىدىس-اياقتار مەن ارنايى تۇرمىستىق راسىمدەرگە ارنالعان بۇيىمدار تاڭعالدىرماي تۇرمايدى.
كورمەدە اۋعان ەلىنىڭ 30 ىسكەر كومپانياسى جەڭىل ونەركاسىپ سالاسى بويىنشا ءوز ونىمدەرىن ۇسىنىپتى. اتاپ ايتقاندا, قولدان توقىلعان ايگىلى اۋعان كىلەمدەرى, دەكوراتيۆتى كەستەلەر, كيىم-كەشەك, ماتالار, كەراميكالىق بۇيىمدار, جىبەك كىلەمدەرگە ءسان بەرگەن ءارتۇرلى گەومەتريالىق كوگەرىس ورنەكتەر سول حالىقتىڭ تاريحىنان سىر شەرتىپ تۇرعانداي اسەرگە قالدىرادى.
– تانىمى سان الۋان ءتۇرلى حالىقتاردىڭ ءداستۇرىن ءبىر-بىرىنە جاقىنداستىرا تۇسەتىن مۇنداي كورمەلەر مۋزەي قابىرعاسىندا ءجيى ۇيىمداستىرىلىپ تۇرادى. بۇگىنگى كورمەنىڭ باستى ەرەكشەلىگى – تاعدىر جولىندا تالاي قيىندىقتى باسىنان وتكەرسە دە مويىماعان اۋعان ەلىنىڭ قايسارلىق كەلبەتى ونەر ارقىلى دارىپتەلدى. ءان مەن جىرعا, ءداستۇر مەن مۇراعا باي اۋعان حالقى ەجەلدەن ونەرلى جۇرت. قازاق كورەرمەندەرى كورمەنى جىلى قابىلدادى, – دەيدى ورتالىق مۋزەيدىڭ ءباسپاسوز حاتشىسى سۇلۋشاش اعەلەۋوۆا.
راسىندا دا اۋعان اۋەزدەرى كورمەگە كەلگەن كورەرمەنگە سامال بوپ ەسىپ, كوڭىلىمىزدى تەبىرەنتىپ تۇردى.
ساپارباي پارمانقۇل
الماتى
