ەلدىڭ دەنساۋلىق ساقتاۋ مينيسترلىگىنەن ءمالىم ەتكەندەي, زارداپ شەككەندەردىڭ اراسىندا شۋ وبلىستىق ىشكى ىستەر باس باسقارماسىنىڭ باسشىسى سامات قۇرمانقۇلوۆ بار. وعان «باسسۇيەك-ميىنىڭ جابىق جاراقاتى, ميدىڭ شايقالۋى, سونداي-اق اۋىر دارەجەدەگى ميدىڭ قاتتى سوعىلۋى» دياگنوزدارى قويىلىپ وتىر. وتا جاسالدى (باس سۇيەكتى ترەپاناتسيالاۋ).
دارىگەرلەر ونىڭ وپەراتسيادان كەيىنگى ءحالىن «اسا اۋىر» دەپ باعالاۋدا. قازىرگى تاڭدا جانساقتاۋ بولىمىندە جاتىر. وزگە زارداپ شەككەندەردىڭ اراسىندا 22 ادامعا «جابىق باسسۇيەك-ميىنىڭ جاراقاتى, باس ميىنىڭ شايقالۋى» دياگنوزدارى قويىلعان, 13 ادامعا رەزەڭكە وق تيگەن, 2-ءۋىنىڭ دەنەسىنىڭ ءار جەرىنە زاقىم تيگەن, 4 ادامعا وق تيگەن, تاعى 4-ەۋى دەنەسىنە سوققى العان. ولاردىڭ ىشىنەن 1 زارداپ شەگۋشى امبۋلاتورلىق ەمدەلۋگە جىبەرىلدى, جاراقات العان ارنايى جاساقتىڭ 1 ساربازى كەۋدە قۋىسىنا تيگەن وقتان وتا كەزىندە كوز جۇمدى. قازىرگى تاڭدا 43 ادام ستاتسيونارلىق ەم قابىلداۋدا. قىرعىز رەسپۋبليكاسى ءىىم ءباسپاسوز قىزمەتىنەن ءمالىم ەتكەندەي, ميليتسيا حالىقپەن سوقتىعىسىپ قالماۋ ءۇشىن قوي-تاش اۋىلىنان كەتىپ قالعان. ءدال قازىر ميليتسيا شتاتتىق رەجىمدە جۇمىس جاساپ, قوعامدىق ءتارتىپتىڭ ساقتالۋىن جانە ازاماتتاردىڭ قاۋىپسىزدىگىن قامتاماسىز ەتىپ وتىر.
ءمالىم ەتىلگەندەي, قۇقىققورعاۋ ورگاندارى تاراپىنان ازاماتتارعا قاتىستى اتىس قارۋى قولدانىلعان جوق. قارۋ ا.اتامباەۆتىڭ ءۇيى تاراپىنان اتىلعان. قىرعىز رەسپۋبليكاسى جوگوركۋ كەنەشىنىڭ ءباسپاسوز حاتشىسى يبرايم نۇراكۋن ۇلىنىڭ مالىمەتىنشە, قىرعىزستان پارلامەنتى كەزەكتەن تىس وتىرىس وتكىزەدى. ول ەلدىڭ بۇرىنعى پرەزيدەنتى المازبەك اتامباەۆتى ۇستاۋ بويىنشا ارنايى وپەراتسياعا بايلانىستى جوگوركۋ كەنەشتىڭ كەزەكتەن تىس وتىرىسىن وتكىزۋ جونىندە پارلامەنت سپيكەرى داستانبەك جۇمابەكوۆپەن سويلەسكەنىن اتاپ ءوتتى. ەسكە سالايىق, كەشە ا.اتامباەۆتىڭ قوي-تاش اۋىلىنداعى ۇيدە اتىس بولىپ, شۋ وبلىستىق ءىىبب-ءنىڭ جەدەل تەرگەۋ توبى ميليتسياعا تۇسكەن قوڭىراۋ بويىنشا وقيعا ورنىنا اتتاندى.
ايتا كەتسەك, بۇعان دەيىن جوگوركۋ كەنەش ەلدىڭ ەكس-پرەزيدەنتىنەن قول سۇقپاۋشىلىق مارتەبەسىن الىپ تاستاۋ تۋرالى شەشىم قابىلداعان بولاتىن. اتامباەۆقا قاتىستى دەپۋتاتتار تاراپىنان تاعىلعان ايىپتاردى زەرتتەۋ بويىنشا ارنايى دەپۋتاتتىق كوميسسيا قۇرىلدى. كوميسسيا جۇمىسىنىڭ ناتيجەسىندە وعان 6 ەپيزود بويىنشا ايىپ تاعۋ شەشىمى قابىلداندى.
الايدا باس پروكۋراتۋرا كوميسسيانىڭ جۇمىسىن زاڭ تۇرعىسىنان باعالاي كەلە, تەك بەس ەپيزودتى قالدىردى. ارنايى وپەراتسيا بارىسىندا وقيعا ورنىنا شۋ وبلىسىنان جەدەل جاردەمنىڭ - 5, بىشكەكتىڭ 3 بريگاداسى اتتاندى.
