كەزدەسۋ بارىسىندا العاشقى شايبانى «بارىس» ساپىنان 7-مينۋتتا نيكيتا ميحايليس سوقتى. ال 11-مينۋتتا قازاندىق كلۋب قاتارىنان مەتت فرەتتين تارازى باسىن تەڭەستىردى. ەستەرىڭىزگە سالا كەتەلىك, ول بيىل «بارىس» ساپىنان «اق بارسقا» اۋىسقان ەدى.
ال 16-مينۋتتا كيريلل پانيۋكوۆ ءبىر شايبا سوعىپ, ەلوردالىق كلۋبتى العا شىعاردى. ال 18-مينۋتتا «بارىس» قاتارىنا بيىل قوسىلعان كانادالىق ادام حەلەۆكا ەسەپتى ۇستەمەلەي ءتۇستى. ەكىنشى كەزەڭدە دە ءبىزدىڭ كوماندا باسىم وينادى.
الدىمەن 28-مينۋتتا داستين بويد مەرگەندىك تانىتسا, 31-مينۋتتا داررەن ديتس قارسىلاستار قاقپاسىنان ساڭىلاۋ تاپتى. ويىن سوڭىنا تامان باتىرلان مۇراتوۆ ءوزىنىڭ تۇساۋكەسەر ويىنىنداعى تۇڭعىش گولىن سوعىپ كەتتى. ناتيجەسىندە بۇگىنگى كەزدەسۋدە «بارىس» كومانداسى «اق بارستى» 6:1 ەسەبىمەن جەڭدى.
سونداي-اق, بۇگىن قازاقستان پرەزيدەنتى كۋبوگىندا تاعى ءبىر كەزدەسۋ وتكىزىلدى. رەسەيدىڭ قوس كومانداسى - ەكاتەرينبۋرگتىڭ «اۆتوموبيليست» كومانداسى نيجنەكامسكىنىڭ «نەفتەحيميك» كومانداسىن 5:1 ەسەبىمەن تىزە بۇكتىردى. ەرتەڭ, 8 تامىزدا «بارىس» «نەفتەحيميكپەن» ويناسا, «اق بارس» پەن «سالاۆات يۋلاەۆ» (ۋفا) كوماندالارى كەزدەسەدى.
قازاقستان پرەزيدەنتى كۋبوگى ويىندارى 8-11 تامىز ارالىعىندا وتكىزىلەدى. جارىسقا بارلىعى بەس كوماندا قاتىسۋدا.
