كابار اگەنتتىگىنە شۋ وبلىسى ءىىبب ءباسپاسوز قىزمەتىنىڭ وكىلى ءمالىم ەتكەندەي, ەلدىڭ بۇرىنعى پرەزيدەنتى المازبەك اتامباەۆتىڭ ۇيىنەن ميليتسياعا قوڭىراۋ شالىنعان.
«وقيعا ورنىنا شۋ وبلىسى ءىىبب جەدەل تەرگەۋ توبى اتتاندى. قوسىمشا اقپارات كەيىن بەرىلەتىن بولادى», - دەدى ءىىبب وكىلى.
سونداي-اق, الەۋمەتتىك جەلىدە اتامباەۆتىڭ ءۇيىنىڭ ماڭايىنان تۇسىرىلگەن ۆيدەو تاراپ كەتتى. ۆيدەودا قارۋلى ادامدار باستاعان اتىستىڭ قادرلارى كورسەتىلگەن.
ەسكە سالايىق, بۇعان دەيىن جوگوركۋ كەنەش ەلدىڭ ەكس-پرەزيدەنتى المازبەك اتامباەۆتان تيىسپەۋشىلىك مارتەبەسىن الىپ تاستاۋ تۋرالى شەشىم قابىلداعان ەدى.
ايتا كەتۋ كەرەك, بۇعان دەيىن اتامباەۆقا قاتىستى دەپۋتاتتار تاراپىنان تاعىلعان ايىپتاردى زەرتتەۋ بويىنشا ارنايى دەپۋتاتتىق كوميسسيا قۇرىلعان بولاتىن. كوميسسيا جۇمىسىنىڭ ناتيجەسىندە ەكس-پرەزيدەنتكە 6 ءبولىم بويىنشا ايىپ تاعۋ تۋرالى شەشىم قابىلداندى.
الايدا باس پروكۋراتۋرا كوميسسيانىڭ جۇمىسىن زاڭ تۇرعىسىنان باعالاي كەلە, تەك بەس ءبولىمدى قالدىردى.
وسىلايشا, اتامباەۆ قوي-تاش اۋىلىنان جەر تەلىمىن زاڭسىز ساتىپ الىپ, ءۇي سالۋ, قىلمىس الەمىنە تانىمال ازيز باتۋكاەۆتى قاماۋدان بوساتۋعا زاڭسىز بۇيرىق شىعارۋ, «فورۋم» عيماراتىن سۋبيحي پارحاتيگە جالعان ساتۋ, بىشكەك قالاسىنىڭ جىلۋ ەلەكتر ورتالىعىن قايتا قۇرۋ جانە ول ءۇشىن كومىر ساتىپ الۋ كەزىندەگى جەمقورلىق ارەكەتتەر بويىنشا كۇدىككە ءىلىنىپ وتىر.
اتامباەۆ وسىمەن ءۇشىنشى رەت ءىىم-گە ۇيىمداسقان قىلمىستىق توپتىڭ جەتەكشىسى ا.باتۋكاەۆتى بوساتۋ ءىسى بويىنشا جاۋاپ الۋعا شاقىرتىلعان. الايدا ول بارماعان.
