كاسپي قۇبىر كونسورتسيۋمى ەلىمىزدەگى ەكولوگيا ماسەلەلەرىن شەشۋ مەن وڭتايلاندىرۋدى قولداۋ ماقساتىندا سوڭعى ءۇش جىلدا 60 ملن تەڭگە جۇمساپتى. ايتالىق, 2016 جىلى قازاق دالاسىن مەكەن ەتەتىن كيىكتەرگە ارنالعان سپۋتنيك ارقىلى بايلانىس جاسايتىن اسا قىمبات قارعىباۋ الىپ بەردى. بۇل جولعى ۇشقىشسىز ۇشاتىن اپپارات قبسق-نىڭ «كيەلى كيىك» بىرلەسكەن باعدارلاماسى اياسىندا كونسورتسيۋمنىڭ قاراجاتىنا ساتىپ الىندى. كاسپي قۇبىر كونسورتسيۋمى اق باس ديرەكتورىنىڭ قر ۇكىمەتىمەن بايلانىس بويىنشا ورىنباسارى قايىرگەلدى قابىلدين الداعى ۋاقىتتا مۇنداي قولداۋلار جالعاسىن تابا بەرەتىنىن ايتتى. ال ۇشۋ اپپاراتى اقمولا وبلىسى قابانباي اۋىلىندا سىناقتان وتكىزىلدى.
- ەڭ الدىمەن كاسپي قۇبىر كونسارتسيۋمى ۇجىمىنا بۇگىنگىدەي قولداۋى ءۇشىن زور العىسىمدى بىلدىرگىم كەلەدى. ويتكەنى, قازىرگى تاڭدا بيوالۋانتۇرلىلىكتى ساقتاۋ, كيىكتەردى قورعاۋ سىندى جۇمىستار وتە وزەكتى بولىپ وتىر. سوندىقتان زاماناۋي تەحنولوگيالار ءوز پايداسىن تيگىزەتىنى ءسوزسىز. براكونەرلەرمەن كۇرەس جۇمىستارىن جۇرگىزۋدە دە مۇنىڭ كومەگى وراسان دەپ ويلايمىن, - دەدى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
جىل سايىن ەلىمىزدە كيىكتەر پوپۋلياتسياسىنىڭ مەملەكەتتىك ەسەبى اۋەدەن جۇرگىزىلەدى. اۋە تەحنيكاسىن جالداۋ مەن قولدانۋ قىمبات بولعاندىقتان, كەي اۋماقتاردى جۇيەلى كۇزەتۋ جانە كيىكتەردىڭ مونيتورينگىسىن قوسىمشا جۇرگىزۋ مۇمكىن بولماي كەلگەن ەدى. ۇشقىشسىز ۇشۋ اپپاراتتارى پايدا بولعالى دەرەك جينالاتىن اۋماقتىڭ شەكاراسى كەڭەيىپ, زەرتتەۋ ادىستەرى كوبەيدى.
Supercam S350 ۇشقىشسىز ۇشۋ اپپاراتى وسى كلاسستاعى ەڭ تەحنيكالىق سيپاتتاماسى جاقسى تەحنيكا. ول ساعاتىنا 140-150 شاقىرىم جىلدامدىقپەن ۇشا الادى. ءۇزىلىسسىز 4-5 ساعات بويى كوكتە قالىقتاپ جۇرە بەرەدى. ءوزى ۇشىپ وتكەن جەردەگى وزگەرىستەردى, جان-جانۋارلاردى, وزەن-كولدەردى فوتو مەن ۆيدەوعا ءتۇسىرىپ, ماماندارعا جىبەرىپ وتىرادى. تەلەمەتريا مەن بەينەقابىلداعىشتى باسقارۋعا ارنالعان جەردەگى انتەننالار بلوگى وسى ءۇشىن قاجەت. اپپارات 70 كيلومەتردەن استام قاشىقتىقتا دا ارەكەت ەتۋ راديۋسىن توقتاتپايدى. مۇندا جانۋارلاردى ساناۋعا ارنالعان اۆتوماتتاندىرىلعان باعدارلامالىق قامتۋ جۇيەسى دە بار ەكەن.
سۋرەتتەردى تۇسىرگەن اۆتور.
