دۇيسەنبى كۇنى ەل استاناسىنىڭ مانيال اۋدانىندا جول بويىندا ورنالاسقان ۇلتتىق ونكولوگيا ينستيتۋتى جانىندا بولعان جارىلىستان 20 ادام قازا تاۋىپ, 47 ادام جارالانعان ەدى.
بۇل وقيعاعا بايلانىستى قازاقستان پرەزيدەنتى قاسىم-جومارت توقاەۆ مىسىر اراب رەسپۋبليكاسىنىڭ پرەزيدەنتى ابدەل فاتتاح اس-سيسيگە كوڭىل ايتۋ جەدەلحاتىن جولداپ, قازاقستان حالقىنىڭ جانە جەكە ءوزىنىڭ اتىنان مىسىر استاناسى كاير قالاسىندا بولعان لاڭكەستىك ارەكەتتەردىڭ سالدارىنان قازا تاپقانداردىڭ وتباسىلارى مەن جاقىندارىنا كوڭىل ايتىپ, زارداپ شەككەندەردىڭ تەز ساۋىعىپ كەتۋىنە تىلەكتەستىك ءبىلدىردى.
وسى وقيعانىڭ ءىزىن الا مىسىر پرەزيدەنتى دە ءوز حالقىنا كوڭىل ايتىپ, سابىرعا شاقىردى. اۋەلگىدە بۇل وقيعا اۋرۋحانا ىشىندە وتتەگى باللونى جارىلىسىنداي كورىنىپ, ءسال ۋاقىت وتە جول اپاتىنىڭ سالدارىنان بولعان جارىلىس دەپ باعالانعانىمەن, تەرگەپ-تەكسەرۋلەر بارىسىندا ونىڭ لاڭكەستىك ەكەنى جانە تەرروريستىك ۇيىمداردىڭ قاتىسى بارى انىقتالىپ وتىر. جەرگىلىكتى پوليتسيانىڭ دەرەكتەرىنە قاراعاندا, سوقتىعىسقان اۆتوكولىكتەردىڭ بىرىنە جارىلعىش زاتتار لىق تولتىرىلعان بولىپ شىقتى. ونىڭ ۇستىنە, اتالعان اۆتوكولىك وسىدان بىرنەشە اي بۇرىن ۇرلانىپ, ىزدەۋ سالىنعان ەكەن.
جارىلىس اۋرۋحانا الدىندا بولعاندىقتان, ەمدەۋ مەكەمەسىندەگى ادامدار قاۋىپسىز جەرگە كوشىرىلگەن. ال عيماراتتىڭ ءوزى قاتتى زاقىمدانعان. تەرگەۋ امالدارى جۇرگىزىلۋدە.
