جولتاي جۇمات-ءالماش ۇلى ارىپتەسىمىز ءوز سۇحباتىن «تەاتر – ۇلتتىڭ ار-ۇياتى» دەپ اتاسا, ءبىز ونى «تەاتر – ۇلتتىڭ ۇيىتقىسى» دەگەن پىكىرمەن تولىقتىرعىمىز كەلەدى. ياعني قازاق حالقىنىڭ بۇگىنگى زامانعا ۇلت رەتىندە امان-ەسەن جەتۋىنە تەاترلارىمىز ۇلكەن ۇلەس قوستى. بۇل رەتتە, وتكەن عاسىردىڭ 50-جىلدارىنان باستاپ ەجەلگى اتامەكەنىندە وتىرعان قازاقتاردىڭ توتەنشە قيىندىقتارعا كەزدەسكەنى بارشاعا ءمالىم. قازاقتىڭ ادەت-عۇرپى, سالت-ءداستۇرى ەسكىلىكتىڭ قالدىعى, مەشەۋلىك پەن ناداندىقتىڭ كورىنىسى رەتىندە باعالاندى. سان عاسىرلىق تاريحى جوققا شىعارىلدى.تاريحي تۇلعالارى اتالمايتىن بولدى. قازاق ءتىلى رەسمي قولدانىستان شەتتەتىلدى.
وسىنداي كەزدە قازاقتىڭ مۇددەسىن قورعاعان – ۇلتتىق ادەبيەتىمىز بەن ونەرىمىز, ونىڭ ىشىندە, اسىرەسە, تەاتر ونەرى بولدى. ياعني سول قيىن ۋاقىتتا قازاقتىڭ ەجەلگى تاريحى, شەجىرەسى, سالت-ءداستۇرى, ادەت-عۇرپى, ءانى-ءبيى, تۇنىعى لايلانباعان انا ءتىلى قازاق تەاترلارىنىڭ ساحنالارىنان كورىنىپ, اكتەرلەردىڭ اۋزىنان ەستىلدى. حالىق ءوز ۇلتىنا دەگەن ساعىنىشىن, اڭساپ ىزدەگەنىن تەاتردان تاپتى. سوعان وراي, جۇرتشىلىقتىڭ تەاترعا دەگەن ىنتا-ىقىلاسى, قۇرمەتى مەن قىزىعۋشىلىعى وتە جوعارى بولدى. تەاترداعى ءاربىر قويىلىمدا زال كورەرمەندەرگە لىق تولدى. ولاردىڭ باسىم كوپشىلىگى ونەردىڭ قادىرى مەن قۇنىن بىلەتىن, تالعامى جوعارى زيالى قاۋىم ەدى. ءاربىر جاڭا قويىلىمنىڭ قابىلدانۋى سان رەت تالداۋ-تالقىلاۋدان وتەتىن. ال جاز شىقسا بۇكىل تەاتر ايلاپ قازاقستان مەن كورشىلەس رەسپۋبليكالاردى ارالاپ كەتەتىن. جۇرت بارلىق جەردە تەاتر ارتيستەرىن توبەلەرىنە كوتەرىپ, قارسى الاتىن.
حالىقتىڭ تەاتر ونەرىنە دەگەن مۇنداي ەرەكشە ىنتا-ىقىلاسى 80-جىلداردىڭ اياعىنا دەيىن سوزىلدى. ونىڭ شەت جاعاسىن ع.مۇسىرەپوۆ اتىنداعى تەاتردا جۇمىس ىستەگەن كەزدە ءبىز ءوزىمىز دە كوردىك.
ال ەلىمىز تاۋەلسىزدىك العاننان كەيىن بۇل ىنتا-ىقىلاس بۇرىنعىدان دا ارتىپ, كورەرمەندەر قاتارى الدەقايدا قالىڭداي ءتۇسۋى كەرەك ەدى. ويتكەنى بۇل كەزەڭدە قازاقستاننىڭ تۇكپىر-تۇكپىرىندە جاڭادان كوپتەگەن قازاق تەاترلارى اشىلدى, تەاترعا ارنالعان اسەم عيماراتتار بوي كوتەردى. تەاتر ماماندارىن دايىنداۋ دا جۇيەلى قولعا الىندى. تەاترلار ورنالاسقان قالالىق جەرلەردە قازاقتاردىڭ سانى بارىنشا كوبەيدى. قازاق مەكتەپتەرى دە كوپتەپ اشىلدى. مىنە, وسىنداي جاقسى جاڭالىقتاردان كەيىن قازاق تەاترلارىنىڭ جاعدايى جاقسارىپ, كوركەمدىك دەڭگەيى بيىكتەپ, كورەرمەندەرىنىڭ كوبەيۋى زاڭدى سياقتى ەدى.
بىراق وكىنىشكە قاراي, ءبارى كەرىسىنشە بولدى. قازىرگى كەزدە قازاق حالقىنىڭ ءوز تەاترىنا ىقىلاسى تومەندەپ, ىستىق كوڭىلى بۇرىنعىدان الدەقايدا سۋىعان سىڭايلى. بۇل اسىرەسە, كورەرمەندەر قاتارىنىڭ سيرەۋىنەن انىق بايقالادى. قازىر تەاترعا كەلەتىن ازدى-كوپتى كورەرمەندەردىڭ اراسىنان باياعىداعى زيالى قاۋىمنىڭ توبەسى دە كورىنبەيدى, بىرەن-ساراندارى تەگىن شاقىرتۋمەن ارەڭ كەلەدى. ال كورەرمەندەردىڭ باسىم كوپشىلىگى ارنايى ۇيىمداستىرىلىپ اكەلىنگەن مەكتەپ وقۋشىلارى مەن ستۋدەنتتەردەن قۇرالادى. اسكەري بولىمدەردىڭ ساربازدارى مەن كۋرسانتتارىن دا شۇبىرتىپ اكەلەتىن جاعداي ءجيى كەزدەسەدى. مۇنداي جاعداي مادەنيەتى دامىعان ەلدەردىڭ تەاترلارىندا ەشقاشان بولمايدى.
ەگەر ءار تەاترعا جىلىنا قانشا قارجى ءبولىندى, ءار جاڭا قويىلىمدى دايىنداۋعا قانشا اقشا جۇمسالادى, قويىلىم ساحنالانعاننان كەيىن قانشا بيلەت ساتىلىپ, قانشا كورەرمەن كەلدى, ودان قانشا پايدا ءتۇستى, قانشا زيان كەلدى – وسىنىڭ ءبارىن تايعا تاڭبا باسقانداي ەسەپتەسەك, ءبىزدىڭ ايتىپ وتىرعانىمىزدىڭ شىندىق ەكەندىگىنە وپ-وڭاي كوز جەتكىزۋگە بولادى.
بىراق بۇل جونىندە ءسوز بولسا, «تەاتر پايدا تاباتىن ورىن ەمەس, ونىڭ باستى مىندەتى – حالىققا شىنايى ونەر تۋىندىسىن ۇسىنۋ» دەگەن سىڭايداعى سىلتاۋ كولدەنەڭ تارتىلادى. بۇل پىكىرمەن دە كەلىسۋ قيىن. وركەنيەتتى ەلدەردىڭ بارىندە كەز كەلگەن تەاتر ءاربىر قويىلىمعا كورەرمەندى كوبىرەك اكەلىپ, پايدا تابۋ, ەڭبەكاقى, باسقا دا قاجەتتى ماسەلەلەردى سول ارقىلى شەشۋ باعىتىندا جۇمىس ىستەيدى. ءتىپتى ءبىزدىڭ قازاقستانداعى جەكەمەنشىك تەاترلاردىڭ جۇمىسى دا وسىعان نەگىزدەلگەن.
وسىعان وراي مىنا ماسەلەنى ايتا كەتكەن ءجون. «تەاتر قىزمەتكەرلەرىنىڭ ەڭبەكاقىسى تومەن, اكتەرلەر ماردىمسىز جالاقى الادى» دەگەن اڭگىمە ءجيى ءسوز بولادى. ارينە, تەاتر قايراتكەرلەرىنىڭ ەڭبەكاقىسى بۇگىنگى زامانعا ساي جوعارى بولۋعا ءتيىس. بىراق ول ءۇشىن تەاتردىڭ جۇمىسى دا سوعان سايكەس جۇرگىزىلۋى كەرەك. ال مۇنداي تالاپ جۇزەگە اسپاي, تەاترعا كورەرمەن كەلمەي, تابىس ازايىپ, شىعىن كوبەيسە ەڭبەكاقى قايتىپ جوعارىلايدى؟! اكتەرلەر جاقسى ايلىقتى قايدان الادى؟
جوعارىدا ايتىلعان وسى جاعدايلار قازاق تەاترلارى ءۇشىن بۇگىنگى تاڭداعى ەڭ كۇردەلى ماسەلە – كورەرمەندەر ەكەندىگىن دالەلدەيدى. ال سوندا كورەرمەندەردى قالاي كوبەيتۋ كەرەك؟ ونىڭ ەڭ باستى جولى – تەك قانا كوركەمدىك ساپاسى جوعارى, حالىقتىڭ كوڭىلىنەن شىعاتىن, قىزىقتىراتىن پەسالاردى عانا ساحنالاۋ. ەگەر شىعارما بۇل تالاپقا ساي كەلمەسە, وندا رەجيسسەر قانشاما جەردەن جانىن سالىپ جۇمىس ىستەسە دە, اكتەرلەر قانشالىقتى كۇيىپ-جانىپ ويناسا دا ودان ەشتەڭە ونبەيدى. ارينە, مۇنى تەاترداعىلاردىڭ ءبارى جاقسى بىلەدى. جانە مۇنداي اڭگىمە كوتەرىلسە, «جاقسى پەسا جوق, جالپى بىزدە دۇرىس دراماتۋرگ بولماي تۇر» دەگەن سىڭايداعى اڭگىمە ايتادى. مەن ءوزىم بۇگىنگە دەيىن 20-عا جۋىق پەسا جازعان اداممىن. ولاردىڭ باسىم كوپشىلىگى رەسپۋبليكامىزداعى قازاق تەاترلارىنىڭ بارىندە سان رەت قويىلعان, وزبەك, قىرعىز, ۇيعىر, قاراقالپاق تەاترلارىندا ساحنالانعان. سوعان وراي, مۇنداي اڭگىمەنى تالاي ەستىگەنمىن, ونشا تاڭىرقامايمىن. بىراق ماسەلە باسقادا. الگىندەي اڭگىمە ايتاتىن تەاترداعىلار قاي دراماتۋرگتىڭ قانداي شىعارماسىمەن تانىسقان, ول شىعارمانىڭ كەمشىلىكتەرى نەدە, قايتا قاراپ, جوندەيتىن تۇستارى بار ما – بۇل جونىندە ءبىر اۋىز ءسوز قوزعامايدى. سوسىن ءبىراز ۋاقىت وتكەندە وزدەرى پەسا جازىپ, ناعىز دراماتۋرگيا وسىنداي بولۋى كەرەك دەپ ساحناعا شىعارادى. نەمەسە دراماتۋرگيادان حابارى شامالى كەزدەيسوق بىرەۋلەردىڭ ساپاسىز پەسالارىن كەرەمەت دۇنيە دەپ ماقتاپ, كورەرمەنگە ۇسىنادى. ال كورەرمەندەر مۇنداي ساپاسىز سپەكتاكلدەگى جاساندى وقيعالاردان, بوس, قىزىل سوزدەن ابدەن جالىعىپ, قويىلىمنىڭ سوڭىنا دەيىن ارەڭ شىداپ, سوسىن تەاترعا ەندى قايتىپ كەلمەيتىندەي بولىپ, بەزىنىپ كەتەدى. ال تەاترداعىلار بولسا سوسىن «ونەردى تۇسىنبەيدى» دەپ حالىقتىڭ ءوزىن كىنالايدى.
مۇنداي جاعداي قازاق تەاترلارىندا 2000-جىلداردان باستالىپ, كۇنى كەشەگە دەيىن سوزىلدى. قازىر دە تولىق جوندەلدى دەۋ قيىن. ونىڭ ءبارىن قايتالاپ ايتا بەرۋدەن دە پايدا شامالى. ەڭ باستىسى, بۇل كەمشىلىكتەردەن قالاي ارىلامىز؟ ەندى وسى جونىندە ءسوز قوزعايىق.
بۇل رەتتە ەڭ الدىمەن تەاترلارىمىزدىڭ جۇمىسىن بۇگىنگى نارىق تالابىنا بەيىمدەپ, جاڭاشا جۇرگىزۋدى قولعا الۋ كەرەك. ياعني كەز كەلگەن تەاتر ساحناعا جاڭا سپەكتاكل شىعارۋمەن عانا شەكتەلمەي, وعان كورەرمەندى كوپتەپ جيناپ, قارجىلىق جاعدايىن جاقسارتۋعا دا ايرىقشا نازار اۋدارۋى ءتيىس. مىسالى, جىل سايىن بىزگە رەسەيدىڭ ءتۇرلى تەاترلارى گاسترولدىك ساپارمەن كەلىپ, ونەر كورسەتەدى. مىنە, سول تەاترلاردىڭ كىرۋ بيلەتتەرى كەمىندە 10 مىڭ تەڭگەدەن باستالىپ, 30-40 مىڭ تەڭگەگە دەيىن, ءتىپتى كەيدە ودان دا جوعارى بولادى. ياعني رەسەي تەاترلارى شەتەلدەگى گاسترولدەردە مىندەتتى تۇردە پايدا تابۋدى كوزدەيدى.
ال ءبىزدىڭ تەاترلاردىڭ گاسترولدىك ساپارلارى قالاي وتەدى؟ كىرۋ بيلەتى قانشادان ساتىلادى, قانشا كورەرمەن كەلەدى, ازدى-كوپتى بولسا دا پايدا تابا ما, جوق الدە ەڭ بولماسا جول قارجىسىن دا وتەي الماي, بوسقا شىعىندالا ما؟ بۇل جونىندە ەشقانداي جەردە اڭگىمە بولمايدى.
جوعارىدا ايتقانىمىزداي, وركەنيەتتى ەلدەردەگى تەاترلاردا بۇل ماسەلە ەڭ الدىڭعى ورىندا تۇرادى. مەملەكەتتەن ۇشان-تەڭىز قارجى الىپ, ونى وڭدى-سولدى جۇمساپ, شىعىنعا ۇشىراسا ەشكىمگە جاۋاپ بەرمەي, تىپ-تىنىش جۇرە بەرۋ ولاردىڭ تۇسىنە دە كىرمەيدى. ولاردا ساحناداعى قويىلىم كوركەم تۋىندى عانا ەمەس, حالىق تۇتىناتىن ءونىم دەگەن تۇسىنىك كەڭىنەن قالىپتاسقان. سوعان وراي جۇرتشىلىقتىڭ سۇرانىسى, كورەرمەننىڭ تالابى ەرەكشە ەسكەرىلەدى. تاقىرىبى قانشالىقتى ماڭىزدى, كوتەرەتىن پروبلەماسى قانداي ۇلكەن بولسا دا, كوركەمدىك ساپاسى تومەن, كوزىقاراقتى كورەرمەننىڭ تالاپ-تالعامىنا سايكەس كەلمەيتىن شىعارمالاردى ەشقاشان ساحنالامايدى. ءتىپتى بۇل جونىنەن قازاقستانداعى ورىس تەاترلارىنىڭ دا ۇستانىمى مەن تالعام-تالابى الدەقايدا جوعارى. بۇل تەاترلاردا شىنايى كاسىبي دراماتۋرگتەردىڭ الدىن الا تالداۋ-سىناقتاردان وتكەن بەلگىلى شىعارمالارى عانا ساحنالانادى. سونىڭ ناتيجەسىندە ورىس تەاترلارىنىڭ تۇراقتى كورەرمەندەرى ايتارلىقتاي مول.
ءبىزدىڭ قازاق تەاترلارىنىڭ جۇمىسى دا وسى باعىتتا ءجۇرۋى كەرەك. ال سوندا كورەرمەندى كوبەيتۋدىڭ جولى قانداي؟ بۇل ماسەلە ءبىز ايتپاساق تا تۇسىنىكتى – تەاتر ساحناسىنا الدىن الا ساراپتاۋدان وتكەن, كوركەمدىك ساپاسى جوعارى تۋىندىلاردى عانا شىعارۋ كەرەك. بۇل رەتتە وركەنيەتتى ەلدەردىڭ تاجىريبەلەرىن پايدالانعان ءجون. مىسالى, رەسەيدە مادەنيەت مينيسترلىگى تالداۋدان وتكىزىپ, قابىلدانعان پەسالار عانا ساحناعا جولداما الاتىنى باسپاسوزدە جاريالاندى. ەۋروپانىڭ ءبىراز ەلىندە شەتەلدىك اۆتورلاردىڭ پەساسىن قويۋ ءۇشىن ءتيىستى ورىنداردىڭ ارنايى رۇقساتى كەرەك. قازاقستان دا وسىنداي ماسەلەلەردى قولعا العانى ءجون. ارينە, بىزدەگى تەاترلاردىڭ رەپەرتۋارعا پەسا تاڭداۋىنا ەركىندىك بەرىلگەن. بىراق مۇنداي ەركىندىك مەملەكەت قارجىسىن بوسقا شاشىپ, حالىق كەرەك ەتپەيتىن, ساپاسىز شىعارمالاردى ساحنالاي بەرسىن دەگەندى بىلدىرمەيدى.
وسىعان وراي, بولاشاقتا قازاقستاندا ساحناعا شىعاتىن جاڭا پەسالار الدىن الا بەيتاراپ ساراپشىلار مەن تەاتر سىنشىلارىنىڭ تالداۋ-تالقىلاۋىنا سالىنىپ, جەتىستىكتەرى ايتىلىپ, كەمشىن تۇستارى جەتىلدىرىلىپ, ساحناعا سودان كەيىن عانا جولداما العانى ءجون. مادەنيەت جانە سپورت مينيسترلىگىنىڭ جانىندا تەاتر ونەرى جونىندەگى كەڭەس بار. كەڭەستىڭ مۇشەسى رەتىندە مۇنداي باسقوسۋعا ءبىز دە بىرنەشە رەت قاتىستىق. سوندا بايقاعانىمىز, كەڭەستىڭ جۇمىسى نەگىزىنەن تەاترلاردىڭ الداعى جىلدارداعى رەپەرتۋارىنا كىرەتىن پەسالاردىڭ ءتىزىمىن تالقىلاۋعا عانا ارنالادى. ال پەسالاردىڭ كوركەمدىك ساپاسى قانداي, كورەرمەندەر كوڭىلىنەن شىعاتىن دۇنيە مە دەگەن ماسەلە مۇلدەم ءسوز بولمايدى. تىزىمدەگى جاڭا پەسالاردىڭ ەشقايسىسىن دا قولىنا ۇستاپ, وقىپ كورمەگەن كەڭەس مۇشەلەرى بۇل جونىندە ناقتى پىكىر ايتا المايدى. ياعني, بۇل كەڭەستىڭ رەپەرتۋارعا ەڭ تاڭداۋلى, ساپالى پەسالاردى قوسۋعا ەشقانداي ىقپالى جوق. الداعى ۋاقىتتا وسى ماسەلەنى ءبىر جۇيەگە ءتۇسىرىپ, رەتتەسە دۇرىس بولار ەدى.
جاڭا پەسالاردى قازىرگى زامانعا ساي قالاماقى تولەپ, ساتىپ الۋدى دا رەتتەۋ كەرەك. بۇعان قازىر تولىق مۇمكىندىك بار. وسىدان ەكى جىلداي بۇرىن «مادەنيەت تۋرالى» زاڭ «ادەبيەتتى ساتىپ الۋ جانە تاراتۋ» دەگەن تەرمينمەن تولىقتىرىلعان ەدى. سوعان وراي مادەنيەت جانە سپورت مينيسترلىگى «الەۋمەتتىك ماڭىزدى ادەبيەتتى ساتىپ الۋ, شىعارۋ جانە تاراتۋ» اتتى ارنايى باعدارلاما قابىلدادى. وسىنداعى «ساتىپ الۋ جانە تاراتۋ» دراماتۋرگيالىق شىعارمالارعا تىكەلەي قاتىستى. ويتكەنى مينيسترلىك جاڭا پەسالاردى ساتىپ الادى, سوسىن رەپەرتۋارلىق باسقارما ارقىلى تەاترلارعا تاراتادى. مادەنيەت مينيسترلىگى 90-جىلدارعا دەيىن جاڭا پەسالاردى ساتىپ الىپ, تاراتۋدى وسىنداي جولمەن جۇرگىزىپ كەلگەن. «مادەنيەت تۋرالى» زاڭعا سۇيەنە وتىرىپ, مينيسترلىك سول تاجىريبەنىڭ بۇگىنگى زامانعا ساي جاڭا ۇلگىسىن جاساۋى كەرەك. زاڭعا «ادەبيەتتى ساتىپ الۋ مەن تاراتۋدى» ەنگىزۋگە نۇرلان ورازالين باستاعان دراماتۋرگتەر ەرەكشە ىقپال ەتكەن ەدى. ەندى سول جاڭالىقتىڭ يگىلىگىن كورۋدەن دراماتۋرگتەر سىرت قالماۋعا ءتيىس.
جالپى الداعى ۋاقىتتا بۇل ماسەلەنىڭ ناقتى ءبىر جۇيەگە تۇسكەن انىق ەرەجە-ءتارتىبى جاسالىپ, بەكىتىلۋى قاجەت. ياعني جاڭا پەسانى مينيسترلىك نەمەسە تەاتر ساتىپ العاندا قالاماقى قالاي تولەنەدى, ايىرماشىلىقتارى, مولشەرى قانداي بولادى – وسىنىڭ ءبارى ناقتى, اشىق كورسەتىلۋگە ءتيىس.
پەسا ساحناعا قويىلعاننان كەيىن, بيلەت ساتۋدان تۇسكەن قارجىنىڭ ءتيىستى بولىگى دراماتۋرگتەرگە قالاي بولىنەدى, بۇل جونىندەگى تەاترلار مەن اۆتورلار قوعامىنىڭ مىندەتى, جاۋاپكەرشىلىگى قانداي بولادى – مۇنىڭ بارلىعى دا زاڭ نەگىزىندە ءبىر جۇيەگە تۇسىرىلگەنى ءجون.
تەاترلارىمىزدىڭ بولاشاعى جاڭادان كەلەتىن جاس تولقىنعا قامقورلىق جاساپ, قولداۋ كورسەتۋگە تىكەلەي بايلانىستى. مۇنداي قامقورلىق جاس دراماتۋرگتەرگە دە وتە قاجەت. بۇگىنگى تاڭدا جاس دراماتۋرگتەردى دايىنداۋ نۇر-سۇلتان قالاسىنداعى قازاق ۇلتتىق ونەر ۋنيۆەرسيتەتى مەن الماتىداعى ت.جۇرگەنوۆ اتىنداعى قازاق ۇلتتىق ونەر اكادەمياسىنا جۇكتەلگەن. بۇل وقۋ ورىندارىندا بولاشاق دراماتۋرگتەرگە اكىم تارازي, دۋلات يسابەكوۆ, سماعۇل ەلۋباي, روزا مۇقانوۆا سىندى كورنەكتى قالامگەرلەر ۇستازدىق ەتەدى. ءبىز دە ءبىراز جىلدان بەرى وسى ۇستازداردىڭ قاتارىندامىز. وسىعان وراي, قازاق تەاترلارىن جاقسى, ساپالى شىعارمالارمەن قامتاماسىز ەتەتىن جاڭا تولقىن ءوسىپ كەلە جاتىر دەپ تولىق سەنىممەن ايتا الامىز. مىسالى, مەنىڭ العاشقى شاكىرتتەرىمنىڭ ءبىرى –
ايدانا الاماننىڭ «جۇرەگىمنىڭ يەسى» پەساسى م.اۋەزوۆ اتىنداعى تەاتردا قويىلىپ, كورەرمەننىڭ كوڭىلىنەن شىقتى. الىشەر ايتۋار, مەرەي قوسىن, نۇرجاينا جۇمادىللاەۆا, تۇرسىنبەك كەشۋباي, اقمارال ابدىحالىق, ءمادينا تولە سياقتى شاكىرتتەرىم دە از ۋاقىتتىڭ ىشىندە شىعارماشىلىق جەتىستىكتەرىمەن كورىنىپ, ءتۇرلى بايگەلەرگە يە بولدى, بىرنەشە تەاترلاردا شىعارمالارىن ساحناعا شىعارىپ ۇلگەردى. ال وسى اكادەميانىڭ تۇلەكتەرى ءانناس باعدات, قولعانات مۇرات تا قازىر تانىمال دراماتۋرگتەر قاتارىندا. ءبىز ۇستاز رەتىندە وسى شاكىرتتەرىمىز بەن باسقا دا دارىندى جاستاردىڭ جاڭا تۋىندىلارى دەر كەزىندە ساحناعا شىعىپ, كورەرمەندەرمەن كوبىرەك جۇزدەسە بەرسە ەكەن دەپ ارماندايمىز.
ءسوزىمىزدى تۇيىندەي كەلە ايتارىمىز – ءبىزدىڭ جوعارىدا ايتقاندارىمىز شەشىلۋى قيىن اسا ءبىر كۇردەلى ماسەلەلەر ەمەس. ءتيىستى زاڭ-ەرەجەلەرگە سۇيەنە وتىرىپ, ءبىر جۇيەگە تۇسىرىلسە, بارلىق ماسەلە ءوز ورنىنا كەلىپ, ۇلتتىق تەاترلارىمىز دامۋدىڭ جاڭا بەلەسىنە كوتەرىلە بەرەتىنى انىق.
سوعان وراي, مادەنيەت جانە سپورت مينيسترلىگى الداعى ۋاقىتتا بۇل ماسەلەگە ايرىقشا نازار اۋدارىپ, قاجەتتى ءىس-شارالاردى قولعا الادى دەپ سەنەمىز. بۇل رەتتە قازاقستان ۇكىمەتى دە مينيسترلىكتىڭ قازاقستانداعى بۇكىل تەاترلارعا شىعارماشىلىق جونىنەن باعىت-باعدار بەرىپ, ىقپال جاساۋ مۇمكىندىگىن قازىرگىدەن الدەقايدا كەڭەيتەدى دەگەن دە ۇلكەن ءۇمىتىمىز بار.
ءسۇلتانالى بالعاباەۆ,
ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ
الماتى
