دەنساۋلىق ايلىعىنىڭ العاشقى كۇنى جىلجىمالى مەديتسينالىق كەشەن تۇركسىب اۋدانىنا كەلىپ, ءتورت جۇزدەن استام تۇرعىندى تەكسەرۋدەن وتكىزدى. «نۇرشاشقان» شاعىن اۋدانىنىڭ تۇرعىندارى سالالىق مامانداردىڭ قىزمەتىنە جۇگىنىپ, جۇرەك, بۇيرەك, بۋىن, كوز, ت.ب. اۋرۋلارعا تەكسەرىلىپ, دارىگەرلىك كەڭەس الدى. دەنساۋلىق ايلىعى اياسىنداعى بۇل شاراعا قالاداعى ونكولوگيا, جقتب, سالاماتتى ءومىر سالتىن قۇرۋ, جۇقپالى تەرى اۋرۋلارى ورتالىقتارى جانە № 20 ەمحانانىڭ كاسىبي ماماندارى جۇمىلدىرىلعان.
الماتى قالاسىنىڭ قوعامدىق دەنساۋلىق باسقارماسىنىڭ باسشىسى قانات توسەكباەۆتىڭ ايتۋىنشا, دەنساۋلىق ايلىعىنىڭ ماقساتى – قالا ورتالىعىنان قاشىق تۇراتىن اۋدان تۇرعىندارىنىڭ دەنساۋلىعىنا قولداۋ كورسەتۋ مەن قولجەتىمدى مەديتسينانى قامتاماسىز ەتۋ. ويتكەنى قاشىقتا تۇراتىن قارت ادامداردىڭ, بالالى انالاردىڭ ەمحاناعا دەر كەزىندە كەلىپ قارالۋىنا مۇمكىندىكتەرى بولا بەرمەيدى. سوندىقتان قانداي دا ءبىر اۋرۋدىڭ الدىن الۋ ماقساتىندا قالانىڭ ءاربىر تۇرعىنى دارىگەرگە ۋاقىتىندا قارالۋى ءلازىم. دەر كەزىندە انىقتالعان اۋرۋدى ەمدەۋدىڭ جەڭىل بولاتىنىن ايتقان قالانىڭ باس دارىگەرى قالا تۇرعىندارىن دەنساۋلىعىنا سەرگەك قاراۋعا شاقىردى.
الماتى قالاسىنىڭ قوعامدىق دەنساۋلىق باسقارماسىنىڭ ءباسپاسوز قىزمەتىنىڭ مالىمەتى بويىنشا, جىلجىمالى ءموبيلدى كەشەندەردىڭ شىعۋ كەستەسىمەن الماتى قالاسى اكىمدىگىنىڭ رەسمي سايتىنان جانە Instagram, Facebook پاراقشالارىنان تانىسۋعا بولادى.
الماتى
