سەنبىلىككە مەملەكەتتىك ورگاندار مەن مەكەمە ۇيىمداردىڭ, ۇكىمەتتىك ەمەس ۇيىمداردىڭ وكىلدەرى, «جاسىل ەل» جانە «جاس وتان» جاستارى قاتىستى.
بۇعان دەيىن ەلىمىزدە جاڭادان قۇرىلعان ەكولوگيا مينيسترلىگى تازالىق شاراسىن وتكىزۋدى ۇسىندى. بۇل شاراعا بارلىق وبلىستار مەن تۇرعىندار قوسىلدى.
«بىرگە – تازا قازاقستان» تازالىق شاراسىنا قاتىسۋشىلاردى قۇپتاعان وبلىس اكىمى بولات باقاۋوۆ قورشاعان ورتاعا قورعاۋعا شاقىردى.
«بۇگىن بارلىق اۋداندار مەن قالالاردا «بىرگە - تازا قازاقستان» شاراسى وتۋدە. بىلتىر وڭىردە جاريالانعان ەكولوگيا جىلى بالالاردى مەكتەپ قابىرعاسىنان باستاپ قوقىس جيناۋعا ۇيرەتتىك», دەيدى ب. باقاۋوۆ. تازالىق شاراسىنىڭ ماقساتى – تۇرعىنداردى ورمانداردى, سۋ قويمالارىن, جايىلمالاردى, دەمالىس ورىندارىن قوقىسپەن لاستاماۋعا شاقىرۋ, قورشاعان ورتاعا ۇقىپتى قاراۋدى ناسيحاتتاۋ.
تازالىق شاراسىنا قالا تۇرعىندارى وتباسىلارىمەن كەلدى. ال كۆادراتسيكليستەر كلۋبىنىڭ 15 مۇشەسى قوقىستى شىعارۋ ءۇشىن تەحنيكالارىمەن كەلىپتى.
«جاعالاۋدان پلاستيك بوتەلكەلەر تولى ون شاقتى قاپ شىعاردىق», دەيدى كاسىپكەر ۆيكتور روماكەر.
وبلىستىق جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسى حابارلاعانداي, وبلىس ورتالىعىندا وتكەن ەكولوگيالىق سەنبىلىكتە 1300 توننا قوقىس جينالعان.
پاۆلودار وبلىسى
