الدىمەن, وبلىس اكىمى دەنساۋلىق جانە دەمالىس ساياباعىنا بارىپ, «سىر-انا» مونۋمەنتىندەگى قايتا جاڭعىرتۋ جۇمىستارىمەن دە تانىستى.
جالپى اۋدانى 30 گەكتاردى قۇرايتىن ساياباق اۋەجاي تراسساسى بويىنداعى رامىزدەر الاڭى جانە تۇڭعىش پرەزيدەنت ساياباعى اراسىندا ورنالاسقان.
سودان سوڭ, ايماق باسشىسى سىرداريا وزەنىنىڭ سول جاعالاۋىندا بولىپ, سول جاعالاۋدى دامىتۋ جوسپارىمەن تانىسىپ, جۇرگىزىلىپ جاتقان قۇرىلىس جۇمىستارىن كوردى.
«وزدەرىڭىز بىلەسىزدەر, وتكەن اپتادا ارال, قازالى, اقاي, تورەتام, جالاعاش, شيەلى, جاڭاقورعاندى ارالاپ شىعىپ, ەلدىمەكەندەردىڭ تۇرعىندارىمەن كەزدەسىپ, ارداگەرلەردىڭ وي-پىكىرلەرىن, حالىقتىڭ ۇسىنىستارىن تىڭداپ كەلدىم. اتقارىلىپ جاتقان جۇمىستارمەن تانىستىم. بۇگىن ەندى وبلىس ورتالىعىن كورىپ شىقتىم. بارلىعىمىزدىڭ باستى ماقساتىمىز – حالىق يگىلىگى ءۇشىن جۇمىس ىستەۋ. ەندىگى مىندەت – قىرىمبەك ەلەۋ ۇلى باستاعان ماڭىزدى شارۋالاردى جالعاستىرۋ, بۇگىنگى كۇننىڭ ەڭ وزەكتى ماسەلەلەرىن انىقتاپ, ونى دەر كەزىندە شەشۋ. ول ءۇشىن ايماقتىڭ نەگىزگى باعىت-باعدارى ايقىن كورسەتىلگەن 12 باعىتتى قامتيتىن قىزىلوردا وبلىسىن الەۋمەتتىك-ەكونوميكالىق دامىتۋدىڭ 2019-2022 جىلدارعا ارنالعان كەشەندى جوسپارىن جۇزەگە اسىرۋىمىز كەرەك», - دەدى ايماق باسشىسى.
ءارى قاراي قۋانىشبەك دوسمايىل ۇلى سىر وڭىرىندە كەزەكتى رەت ۇيىمداستىرىلىپ وتىرعان «Birge – Taza Qazaqstan» ەكولوگيالىق اكتسياسىنا قاتىستى.
2019 جىلى 20 شىلدەدە قر ۇكىمەتىنىڭ باسشىسى ا.ءماميننىڭ باستاماسىمەن قولعا الىنعان «Birge - Taza Qazaqstan» ەكولوگيالىق اكتسياسى قىزىلوردا وبلىسىندا ءار اپتا سايىن وتكىزىلىپ كەلەدى.
ەستەرىڭىزگە سالايىق, العاشقىلاردىڭ ءبىرى بولىپ قىزىلوردا وبلىسى اكتسياعا قولداۋ بىلدىرگەن بولاتىن. #Birge #TazaQazaqstan اكتسياسى سىر وڭىرىندە ارال اۋدانىنداعى كوكارال بوگەتىنىڭ جانىن تازارتۋمەن باستالدى. ايماق باسشىسى قۋانىشبەك ىسقاقوۆ ەستافەتانى ءوڭىردىڭ بارلىق اۋداندارى مەن ەلدىمەكەندەرىنە جولداعان ەدى.
بۇگىنگى ۇيىمداستىرىلعان اكتسياعا ايماق باسشىسى, وبلىستىق مەكەمەلەر, جاستار جانە ۇكىمەتتىك ەمەس ۇيىمدار قاتىستى. وبلىس ورتالىعىندا سىرداريا وزەنىنىڭ جاعالاۋىنان – قۇتقارۋ مەكەمەسى ارالىعىنداعى 8 شاقىرىم جەردە 2 000 استام ادام جۇمىس ىستەدى. بۇگىنگى اكتسياعا وبلىس بويىنشا 7000 جۋىق ادام اتسالىستى.
اكتسيانى ءار سەنبى سايىن كۇز ايىنا دەيىن جالعاستىرۋ جوسپارلانۋدا. شارا اياسىندا قاتىسۋشىلار تاراپىنان جاقىن ماڭدا ورنالاسقان تۇرعىن ءۇي يەلەرىنە قوقىستاردى بەي-بەرەكەت تاستاماۋ جونىندە تۇسىندىرمە جۇمىستارى دا جۇرگىزىلىپ جاتىر.
