ساپار بارىسىندا جاپوندىق «Sumitomo», «Marubeni», «Nippon Express», «Hitachi Construction Machinery», «Chiyoda Technol», «Sumitomo Mitsui Banking Corporation», «Sojitz», «Terra Drone», «JOGMEC», «Nikke Group» سياقتى كومپانيالار مەن ۇيىمداردىڭ باسشىلارىمەن بولەك كەزدەسۋلەر وتكىزىلدى.
كەزدەسۋلەر بارىسىندا قازاقستاندا ماشينا جاساۋ, ەنەرگەتيكا, اۋىل شارۋاشىلىعى, لوگيستيكا, مۇناي حيمياسى, جەڭىل ونەركاسىپ, روبوتوتەحنيكا جانە اقپاراتتىق كوممۋنيكاتسيالىق تەحنولوگيالار سالالارىندا جۇزەگە اسىرىلىپ جاتقان جانە الەۋەتتى بىرلەسكەن جوبالار تالقىلاندى.
قازاقستاندىق تاراپ جاپوندىق كومپانيالارعا ەلىمىزدەگى ينۆەستيتسيالىق احۋالدى جاقسارتۋ جانە ينۆەستورلار ءۇشىن مۇمكىندىكتەردى كەڭەيتۋ بويىنشا قابىلدانعان شارالار تۋرالى باياندادى.
جاپوندىق ينۆەستورلار قازاقستاننىڭ ەكونوميكاسىنا ينۆەستيتسيا سالۋعا قىزىعۋشىلىق تانىتىپ, مەملەكەتىمىزدەگى اعىمداعى ينۆەستيتسيالىق جوبالاردىڭ جۇزەگە اسىرىلۋى تۋرالى حابارلادى.
ماسەلەن, الەمدەگى ءتورتىنشى ءىرى لوگيستيكالىق «Nippon Express» كومپانياسى اعىمداعى جىلعى تامىزدا قازاقستاندا ءوزىنىڭ ورتالىق ازياداعى وكىلدىگىنىڭ رەسمي اشىلعانىن اتاپ ءوتتى. قازاقستاندا 2004 جىلدان بەرى جۇمىس ىستەپ كەلە جاتقان «Hitachi Construction Machinery» كومپانياسى تاۋ-كەن تەحنيكاسىنا قىزمەت كورسەتەتىن ايماقتىق ورتالىعىن قۇرۋ ۇستىندە. «JOGMEC» مۇناي, گاز جانە مەتالل جونىندەگى ۇلتتىق كورپوراتسياسى سيرەك كەزدەسەتىن جەر مەتالداردى وڭدەۋ تەحنولوگيالارىن دامىتۋ سالاسىنداعى ىنتىماقتاستىقتى جالعاستىرۋعا نيەتتى. جاپونيانىڭ ءىرى «Sumitomo Mitsui Banking Corporation» بانكىنىڭ باسشىلىعى «بايتەرەك» ۇلتتىق باسقارۋ حولدينگىمەن بىرلەسىپ اشىلعان نەسيەلىك جەلىنى مۇمكىندىگىنشە بەلسەندى تۇردە پايدالانۋدى ۇسىندى.
سونىمەن قاتار, اعىمداعى جىلعى 2 تامىزدا قازاقستاندىق دەلەگاتسيانى باسقارعان سىرتقى ىستەر ءمينيسترىنىڭ ورىنباسارى ەرمەك كوشەرباەۆتىڭ جاپونيانىڭ سىرتقى ىستەر مينيسترلىگىنىڭ پارلامەنتتىك ۆيتسە-ءمينيسترى كەندجي يامادامەن كەزدەسۋى ءوتتى.
كەزدەسۋ بارىسىندا ەكى ەل اراسىنداعى ەكونوميكالىق ىنتىماقتاستىقتىڭ وزەكتى ماسەلەلەرى تالقىلاندى.
جاپونيا تاراپى قازاقستاننىڭ ەكى ەل اراسىنداعى ينۆەستيتسيالىق ءوزارا ارەكەتتەستىكتى كەڭەيتۋ جونىندەگى باستامالارىن قولداۋعا دايىن ەكەندىگىن مالىمدەدى.
دەلەگاتسيا قۇرامىندا يندۋستريا جانە ينفراقۇرىلىمدى دامۋ مينيسترلىگى يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ, سىرتقى ىستەر مينيسترلىگى ينۆەستيتسيالار كوميتەتىنىڭ جانە «Kazakh Invest» ۇك» اق-نىڭ وكىلدەرى بولدى.
