ورتا ازيا اۋماعىنداعى العاشقى بولىپ قۇرىلعان ىقىلاس اتىنداعى حالىق مۋزىكالىق اسپاپتار مۋزەيى دۇنيەجۇزى بويىنشا حالىق مۋزىكا اسپاپتارىنا ارنالعان بەسىنشى مۋزەي رەتىندە الەمدىك مۋزەيلەر تاريحىنا ەنگەن.
1981 جىلى اشىلعان مۋزەيدىڭ ۇيىمداستىرىلۋ, قالىپتاسۋ تاريحى مەملەكەت جانە قوعام قايراتكەرى, اكادەميك وزبەكالى جانىبەكوۆتىڭ ەسىمىمەن تىكەلەي بايلانىستى. 1990 جىلى 11 ناۋرىزدا مۋزەيگە قازاقتىڭ اسپاپتى مۋزىكا ونەرىنىڭ ءىرى وكىلى, قازاقتىڭ حالىق كومپوزيتورى, قوبىز مەكتەبىنىڭ نەگىزىن سالۋشىلاردىڭ ءبىرى ىقىلاس دۇكەن ۇلىنىڭ ەسىمىن بەرىلگەنى بەلگىلى.
مۋزەيدىڭ اعا عىلىمي قىزمەتكەرى نۇرلى يبادۋللينانىڭ ايتۋىنشا, مۋزەي قورىندا ۇلتتىق مۋزىكالىق اسپاپتارمەن قاتار تۇرىك حالىقتارى, سونداي-اق, الەمنىڭ 40-تان استام ەلىنىڭ مۋزىكالىق مادەنيەتىمەن تانىستىراتىن 1200-دەن اسا ەكسپونات بار. ەكسپوزيتسيالىق زالداردا ەلىمىزدىڭ تۇكپىر-تۇكپىرىنەن ارحەولوگيالىق قازبا جۇمىستارى كەزىندە تابىلعان مۋزىكالىق اسپاپتاردى, قازاق حالقىنىڭ ەڭ كونە اسپاپتارىنىڭ ۇلگىلەرىن كەزدەستىرىپ, قازاق ونەرىنىڭ باستاۋىندا تۇرعان ماحامبەت, قۇرمانعازى, اقان سەرى مەن ءبىرجان سالدىڭ, جامبىل مەن دينانىڭ, اباي مەن شاكارىمنىڭ, احمەت جۇبانوۆ پەن نۇرعيسا تىلەنديەۆ جانە باسقا دا كوپتەگەن ءانشى-جىرشىلار, كۇيشى-كومپوزيتورلارعا تيەسىلى بولعان تۇپنۇسقا 70-كە جۋىق مەموريالدىق اسپاپتارىمەن, باقسىلاردىڭ جانە كەيىنگى قوبىزشى-كومپوزيتورلاردىڭ قوبىزىمەن, دومبىرا اسپابىن جاساۋشى شەبەرلەردىڭ رەسپۋبليكالىق بايقاۋىندا جەڭىمپاز اتانعان شەبەرلەردىڭ ۇزدىك تۋىندىلارىمەن, سونداي-اق, الەم حالىقتارىنىڭ بىرنەشە عاسىرلىق تاريحى بار مۋزىكالىق اسپاپتارىمەن تانىسۋعا بولادى. مۋزەيدە ەكسپوناتتاردى ساقتاۋ, ناسيحاتتاۋ جانە مۋزىكالىق مۇرانى دارىپتەۋ, سونداي-اق مۋزەي كوللەكتسيالارىن عىلىمي تۇرعىدان زەرتتەۋ جۇمىستارىمەن اينالىساتىن عىلىمي ءبولىم مەن قور ساقتاۋ بولىمدەرى, ۇلتتىق ناقىشتا, كيىز ءۇيدىڭ فورماسىنداي ەرەكشە سالىنعان 120 ورىندىق لەكتسيا-كونتسەرت زالى جۇمىس جاسايدى. مۇندا مۋزىكالىق اسپاپتارىنىڭ دىبىسىن ءجيى ەستىپ تۇرۋعا بولادى ءارى ءداستۇرلى ءان-جىر جانە كۇي كەشتەرى وتكىزىلەدى.
الماتىلىقتار مەن قالا قوناقتارى ءۇشىن دەمالىس ورىندارىنىڭ ءبىرى بولىپ تابىلاتىن 28-گۆاردياشى-پانفيلوۆشىلار اتىنداعى پاركىندە ورنالاسقان مۋزەيدى سوڭعى ەكى اي ىشىندە 1000-نان استام وقۋشى, 250 شاماسىندا ستۋدەنتتەر مەن 2500-عا جۋىق شەتەلدىك تۋريستەر تاماشالاعان.
الماتى
