ماشينا جاساۋ ەل ەكونوميكاسىن ءوندىرىس قۇرالدارىمەن قامتاماسىز ەتەدى, بارلىق باسقا وڭدەۋ وندىرىستەرىنىڭ, وتىن-ەنەرگەتيكا, كولىك جانە لوگيستيكا, ەكونوميكانىڭ وڭدەۋ سەكتورى جانە اۋىل شارۋاشىلىعى سالالارىنىڭ دامۋىنا ىقپال ەتەدى.
سالا جاساقتاۋشى جانە قوسالقى بولشەكتەردى وندىرۋدەن دايىن ءونىم تۇرلەرىن شىعارۋعا كوشتى, اتاپ ايتساق: تەپلوۆوزدار, ەلەكتروۆوزدار, جولاۋشىلار جانە جۇك ۆاگوندارى, جۇك جانە جەڭىل اۆتوموبيلدەر, اۆتوبۋستار, استىق جيناۋ كومبايندارى, سورعى جابدىقتارى, ليفتىلەر.
2000 جىلدان باستاپ قازاقستاندا ماشينا جاساۋ ءوندىرىسىنىڭ كولەمى 24 ەسەگە ارتىپ, 2018 جىلدىڭ قورىتىندىسى بويىنشا 1,1 ترلن تەڭگەنى قۇرادى.
م. پىشەمباەۆ اتاپ وتكەندەي, جول كارتاسىن قابىلداۋ — وتاندىق ماشينا جاساۋ سالاسى ءۇشىن ماڭىزدى وقيعا, سالانى ورتا مەرزىمدى پەرسپەكتيۆادا دامىتۋدىڭ ستراتەگيالىق كورىنىسى. قۇجات ءۇش كيتكە نەگىزدەلگەن.
ءبىرىنشىسى — ەلىمىزدە تەڭدەستىرىلگەن ونەركاسىپتىك ساياساتتى جۇرگىزۋگە ىقپال ەتەتىن «ونەركاسىپتىك ساياسات تۋرالى» زاڭنىڭ قابىلدانۋى. مەملەكەتتىك قولداۋ شارالارى ءبىر زاڭدا ورتالىقتاندىرىلاتىن بولادى.
ەكىنشىسى — قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى جانىنان قازاقستاننىڭ ونەركاسىپتى دامىتۋ قورىن قۇرۋ.
قور بيزنەسكە ماشينا جاساۋ سالاسىنداعى كاپيتالدى كوپ قاجەت ەتەتىن وندىرىستەردى دامىتۋعا جانە ماشينا جاساۋدى قوسا العاندا, وڭدەۋ سەكتورىنداعى جوبالاردى قارجىلاندىرۋعا مۇمكىندىك بەرەدى.
وسىعان ۇقساس قورلار بىرنەشە جىلدار بويى رەسەيدە, بەلارۋستە جانە ەىدۇ ەلدەرىندە ءساتتى جۇمىس ىستەپ كەلەدى, ولار ليزينگتىك جوبالارعا جىلدىق 1,4% مولشەرلەمەسىمەن جانە عىلىمي-تەحنيكالىق ازىرلەمەلەر, ەڭبەك ونىمدىلىگى مەن يننوۆاتسيالىق ونىمدەردى ارتتىرۋعا 1% مولشەرلەمەمەن زايم بەرەدى.
ءۇشىنشىسى — قولدانىستاعى قۋاتتىلىقتاردى جاڭعىرتۋ, سونداي-اق وتاندىق كاسىپورىنداردىڭ ەكسپورتتىق الەۋەتىن ودان ءارى ارتتىرۋ ماقساتىندا كاسىپورىندارعا سالىقتىق پرەفەرەنتسيالار ەنگىزۋ.
ماشينا جاساۋدى دامىتۋدىڭ جول كارتاسىنا ەنگىزىلگەن شارالار 2024 جىلعا قاراي ءوندىرىستىڭ جالپى كولەمىن كەمىندە 2 تريلليون تەڭگەگە جەتكىزۋگە, ءبىر جۇمىسشىعا ەسەپتەگەندە ەڭبەك ونىمدىلىگىن قازىرگى $12 مىڭنان $24 مىڭعا دەيىن ارتتىرۋعا ىنتالاندىرادى.
«جول كارتاسى ونەركاسىپتىڭ وڭدەۋ سەكتورىنىڭ كاسىپورىندارىنىڭ باسەكەگە قابىلەتتىلىگىن ارتتىرۋ ماقساتىندا قابىلداندى. ءبىز قازاقستاننىڭ يندۋستريالاندىرۋ سالاسىنىڭ دامۋىنا لايىقتى ۇلەس قوسۋعا دايىنبىز», — دەدى قازاقستان ماشينا جاساۋشىلار وداعىنىڭ توراعاسى.
