ءمالىم بولعانداي, كول ارناسىنا قۇيىلعان سۋ جاعاجايداعى «كوكتەم گراند» دەمالىس ورىنىنىڭ باسسەينىنەن اققاندىعى انىقتالدى. ارنايى قۇرىلعان كوميسسيا انىقتاعانداي, ايدىنعا قۇيىلعان سۋ الەۋمەتتىك جەلىدە شۋ بولعانداي اجەتحانا مەن اسحانا قۇبىرىنان اققان قالدىق سۋ ەمەس, شومىلۋعا ارنالعان باسسەيىنگە تارتىلعان قۇبىر سۋى ەكەن.
- سورعىشتان اققان سۋ توقتادى, كول جاعالاۋى تازا. بەينەجازباداعى اققان سۋ ەشقانداي حلورسىز, تازا باسسەيننىڭ كولدەن الىنعان سۋى. سۋ سوراتىن سورعىش سول ۋاقىتتا ىستەن شىققاندىقتان, ىشكە الىناتىن سۋ كەرى قايتقان. ال دەمالىس ورىنىنىڭ دارەتحانا قۇبىرى بولەك جەردە ورنالاسقان. قازىر اۋداندىق تاۋارلار مەن كورسەتىلگەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ ماماندارى قازىرگى ۋاقىتتا زەرتحانالىق سىنامالار الۋدا, - دەدى وقيعاعا وراي تۇسىنىك بەرگەن الاكول اۋدانى اكىمىنىڭ ورىنباسارى ايدىن چالكەنوۆ.
ايدىن سۋىنىڭ لاستانۋىنا سەبەپكەر بولعان «كوكتەم گراند رەسورتس» قوناقۇي كەشەنى وتكەن جىلى اشىلعان ەدى. ءبىر ماۋسىمدا 30 مىڭ ادامدى قابىلداي الاتىن دەمالىس ورىنى ايماق بويىنشا 4 ملرد تەڭگە ينۆەستيتسيا قۇيىلعان, زامانعا ساي قىزمەت كورسەتەتىن جالعىز كەشەن بولىپ وتىر.
جالپى, وتكەن جىلعى دەمالىس ماۋسىمىندا جەتىسۋ وڭىرىنە ورتاشا ەسەپپەن 2 ملن تۋريست كەلگەن ەكەن. ونىڭ ىشىندە 1 ملن ادام الاكول جاعالاۋىندا دەمالعان. بۇل كورسەتكىشتەر الماتى وبلىسىنداعى تۋريستىك قىزمەت كورسەتۋ جۇمىستارىنىڭ جاقسارىپ, ايماققا كەلۋشىلەر قاتارىنىڭ 22,2 پايىزعا وسكەنىن ايعاقتايدى. جالپى 2018 جىلى وڭىردە 19 ملرد تەڭگە جۇمسالىپ, 44 تۋريستىك نىسان پايدالانۋعا بەرىلگەن. ونىڭ ىشىندە 33 نىسان الاكولدىڭ جاعالاۋىندا ىسكە قوسىلىپتى. ال تۋريزم سالاسىنداعى قىزمەت كورسەتۋ قۇنى 12,9 ملرد تەڭگەگە جەتكەن. سونداي-اق وتكەن جىلى الماتى وبلىسىنداعى دەمالىس ورىندارى 721,4 مىڭ تۋريستكە قىزمەت كورسەتكەن. ءبىر عانا سەرۆيستىك قىزمەتتەن تۇسكەن تابىس مولشەرى 8,7 ملرد تەڭگەنى قۇراپتى. الايدا وبلىستىڭ تۋريستىك الەۋەتى جوعارى بولعانىمەن, دەمالۋشىلاردىڭ كوڭىلىنەن شىعاتىن سەرۆيستىك قىزمەت كورسەتۋ جاعى ءالى دە جەتىلدىرۋدى قاجەت ەتەدى. تۋريزم ينفراقۇرىلىمىنىڭ دامۋىنا بولىنگەن قارجى جىل سايىن كوبەيىپ وتىرعانىمەن, ناتيجە باياۋ.
جىلدار اراسىنداعى كورسەتكىشتەردى ساراپتاعان ماماندار بيىلعى ماۋسىمدا الاكول جاعالاۋىنا تاعى 1,5 ملن ادامنىڭ كەلۋى ىقتيمال ەكەنىن ايتقان ەدى. دەمەك كوكتەمدە جاسالعان وسى بولجامدى مەجە بويىنشا وبلىس الدىندا 2,5 ملن تۋريستكە قىزمەت كورسەتۋ مىندەتى تۇر. اسىرەسە, كول جاعالاۋىنا كەلەتىن شەتەلدىك تۋريستەردىڭ سانى جىل سايىن كوبەيىپ كەلەدى. بۇل قىزمەت كورسەتۋ نارىعىنىڭ جاۋاپكەرشىلىگىن ەكى ەسەگە ارتتىرۋعا ءتيىس. ءدال وسى جەردە شاعىن جانە ورتا كاسىپ يەلەرىنىڭ پايدا تابۋى مەن كاسىبي ىسكەرلىگى سىنالاتىن سياقتى. ال اتقارۋشى بيلىك الاكول جاعالاۋىنداعى ينفراقۇرىلىمدى دامىتۋ جۇمىستارىن جۇيەلى جۇرگىزىپ كەلەدى. اقشي اۋىلىنان دەمالىس ورىندارىنا دەيىنگى جولداردى قايتا جاڭارتۋ بويىنشا قۇرىلىس-مونتاجداۋ جۇمىستارى تولىقتاي اياقتالعان. 23,8 شاقىرىم جولداعى قۇرىلىس جۇمىسىنا 3,036 ملرد تەڭگە قارجى جۇمسالعان. مۇنان بولەك, دەمالىس ايماقتارىنا اپاراتىن تاراۋ جولدارعا دا كۇردەلى جوندەۋ جاسالىپتى. مۇنىڭ سىرتىندا جاعاجايداعى جارىقتاندىرۋ, جاياۋ جۇرگىنشى جولىن سالۋ, سۋ وتكىزگىش قۇبىرلار مەن ارىقتار جۇرگىزۋ باعىتىنداعى جۇمىسقا 50 ملن تەڭگە قاراجات قاراستىرىلىپ, يگەرىلۋدە.
الماتى وبلىسى
