ەڭ الدىمەن دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن جۇزەگە اسىرۋ بويىنشا بيىل جارتى جىلدا اتقارىلعان جۇمىستار قورىتىندىلاندى. بۇل بويىنشا بايانداما جاساعان دەنساۋلىق ساقتاۋدى دامىتۋ رەسپۋبليكالىق ورتالىعىنىڭ باس ديرەكتورى اينۇر ايىپحانوۆا جوسپاردىڭ ويداعىداي ورىندالماي جاتقانىن جاسىرمادى. «وكىنىشكە قاراي التى ايلىق قورىتىندى بويىنشا 39 كورسەتكىشتىڭ توعىزى جوسپارعا ساي ەمەس. اتاپ ايتقاندا, قوستاناي, ماڭعىستاۋ وبلىستارىندا 8 ينديكاتور كورسەتكىش بويىنشا جوسپارلى دەڭگەيگە جەتپەدى. ونىڭ ىشىندە انا ءولىمى, نارەستە ءولىمى, جالپى ءولىم, جۇرەك-قانتامىر اۋرۋلارى تومەندەمەي تۇر. مىسالى, انا ءولىمى بويىنشا كورسەتكىش شامادان تىس جوعارى. ياعني 100 مىڭ جاڭا تۋعان نارەستەگە شاققاندا قوستانايدا 36,1, قاراعاندى وڭىرىندە 26,4 جانە اتىراۋ وبلىسىندا 25,2 كورسەتكىش. اقتوبە, اتىراۋ جانە سولتۇستىك قازاقستان وبلىسىندا دا جاعداي ءماز ەمەس. ال جالپى ءولىم بويىنشا سولتۇستىك قازاقستان, قوستاناي, قاراعاندى جانە شىعىس قازاقستان وبلىستارىندا جوسپارداعى كورسەتكىشتەن اسىپ بارا جاتىر», دەدى ول.
سونداي-اق ونىڭ ايتۋىنشا, العاشقى مەديتسينالىق جاردەم بويىنشا دا تۇيتكىلدى ماسەلەلەر ءالى بار. اسىرەسە, ەمحانالارداعى جالپى تاجىريبەلىك دارىگەردىڭ جۇكتەمەسى ءالى دە بولسا ازايماي وتىر. «جوسپار بويىنشا ءبىر جالپى تاجىريبەلىك دارىگەرگە 1700 ادام قارالۋى كەرەك بولسا, الماتى وبلىسىندا ءبىر دارىگەرگە 2900 ادام, قوستانايدا 2700 ادام, پاۆلوداردا 2500 ادام قارالادى. بۇل كورسەتكىشتەر جىل سايىن ازايۋى كەرەك ەدى. مۇندايدا جالپى تاجىريبەلىك دارىگەرلەردىڭ جالاقىسىن ءوسىرىپ, الەۋمەتتىك كومەك كورسەتۋ ارقىلى ولاردىڭ جەكەمەنشىك ەمحانالارعا كەتىپ قالماۋىنا جاعداي جاساۋ كەرەك», دەدى ول.
بيىل ماۋسىم ايىندا پرەمەر-مينيستر اسقار مامين مەديتسينالىق-سانيتارلىق العاشقى كومەكتى دامىتۋ جونىندەگى 2019-2020 جىلدارعا ارنالعان ءىس-شارالار جوسپارىن بەكىتكەن بولاتىن. وسى نەگىزدە قولعا الىنعان جۇمىستارعا توقتالعان اينۇر ايىپحانوۆا: «بۇرىن مۇنداي جوسپارلار مينيسترلىكتىڭ دەڭگەيىندە عانا بەكىتىلەتىن. ال بۇل وكىمنىڭ ۇكىمەت دەڭگەيىندە بەكىتىلۋى ارقىلى جەرگىلىكتى اتقارۋشى ورگانداردىڭ بەلسەندىلىگىن ارتتىرۋعا مۇمكىندىك تۋدى. مىسالى, مامان جەتىسپەۋشىلىگىن ازايتۋ ماقساتىندا سول جوسپار نەگىزىندە بيىل مەديتسينا سالاسىن بىتىرگەن جاس دارىگەرلەردىڭ جارتىسى اۋىلدىق جەرلەرگە جىبەرىلدى. سونداي-اق مەديتسينا سالاسىنىڭ ماماندارىن دايىنداۋعا ارنالعان گرانتتاردىڭ كوبى جالپى تاجىريبەلىك دارىگەر ماماندىعىنا بولىنەدى. تاعى ءبىر جاعىمدى جاڭالىق – بيىل كۇزدەن باستاپ تۇڭعىش رەت جالپى تاجىريبەلىك دارىگەردىڭ رەزيدەنتۋرادا وقۋىنا 700-دەي وقۋ گرانتى بولىنبەك. وسى ارقىلى سان دا, ساپا دا ارتاتىنى ءمالىم», دەدى.
بۇدان وزگە القالى جيىندا 2019-2020 جىلداردى قامتيتىن باستاپقى مەديتسينالىق-سانيتارلىق كومەكتى دامىتۋ شارالارىنىڭ جوسپارى, 2019 جىلعا ارنالعان انا ءولىمىن ازايتۋ بويىنشا جەدەل جوسپار, 2019-2021 جىلدارعا ارنالعان بالالار ءولىمىن ازايتۋ بويىنشا شارالار جوسپارى, كادرلىق قامتاماسىز ەتۋ جانە دەنساۋلىق ساقتاۋ سالاسىنىڭ قىزمەتكەرلەرىن الەۋمەتتىك قولداۋ, دەنساۋلىق ساقتاۋ سالاسىنا ينۆەستيتسيالار تارتۋ ماسەلەسى قارالدى.
