«حالىقتىڭ دەنساۋلىعىن ساقتاۋ مەن مەديتسينالىق كومەك ساپاسىن ارتتىرۋدىڭ نەگىزگى ماسەلەلەرى جەرگىلىكتى اتقارۋ ورگاندارىنىڭ قۇزىرىندا بولا تۇرا, قاراجات جەتكىلىكتى بولا تۇرا, مەملەكەتتىك باعدارلاما شارالارىندا الشاقتىق تۋىپ, وڭىرلەردە ورىندالماسا, قيسىندى سۇراق تۋىندايدى. جالپى جابدىقتاۋعا 49 ملرد تەڭگە بولىنەدى. كەيبىر اكىمدىكتەر جىلىنا 1-6 ملرد تەڭگەنى ماتەريالدىق جابدىقتاۋعا جۇمسايدى», - دەدى ەلجان ءبىرتانوۆ ەلوردادا مينيسترلىك القاسىنىڭ كەڭەيتىلگەن وتىرىسىندا.
مينيستر قاراجات پەن ءنورماتيۆتى-قۇقىقتىق بازانىڭ جانە جوو بار ەكەنىن ايتىپ, سايكەسىنشە, اتقارۋ ءتارتىبى جونىندە ماسەلە تۋىندايتىنىن جەتكىزدى.
«دەنساۋلىق ساقتاۋ باسقارمالارىن دەنساۋلىق ساقتاۋ مينيسترلىگىنە قايتا باعىندىرۋ ماسەلەسىن كوتەرەمىز. مۇنى ۇكىمەت پەن پرەزيدەنت اكىمشىلىگىنە دەيىن جەتكىزەمىز. كەلەسى مەملەكەتتىك باعدارلامالاردىڭ نەگە ورىندالماعانى تۋرالى سىزدەردى تۇرعىزىپ, سۇراپ وتىرعىمىز كەلمەيدى. دەنساۋلىق ساقتاۋ باسقارمالارىنىڭ باسشىسىن مينيسترلىك تاعايىندايتىن بۇرىنعى جۇيەنى قايتارۋ كەرەك», دەدى ەلجان ءبىرتانوۆ.
ايتا كەتەيىك, ەلوردادا 2019 جىلدىڭ جارتىجىلدىعىنا ارنالعان قر دەنساۋلىق ساقتاۋ مينيسترلىگى القاسىنىڭ وتىرىسى ءوتىپ جاتىر. وتىرىستا 2016-2019 جىلدارى دەنساۋلىق ساقتاۋدى دامىتۋعا ارنالعان «دەنساۋلىق» مەملەكەتتىك باعدارلاماسى, 2019-2020 جىلداردى قامتيتىن باستاپقى مەديتسينالىق-سانيتارلىق كومەكتى دامىتۋ شارالارىنىڭ جوسپارى, 2019 جىلعا ارنالعان قر انا ءولىمىن ازايتۋ بويىنشا جەدەل جوسپار, 2019-2021 جىلدارعا ارنالعان بالالار ءولىمىن ازايتۋ بويىنشا شارالار جوسپارى, كادرلىق قامتاماسىز ەتۋ جانە دەنساۋلىق ساقتاۋ سالاسىنىڭ قىزمەتكەرلەرىن الەۋمەتتىك قولداۋ, دەنساۋلىق ساقتاۋ سالاسىنا ينۆەستيتسيالار تارتۋ ماسەلەسى قارالادى.
