كوپ جىلدار مەملەكەتتىك قىزمەتتە ءجۇرىپ, جاقىندا عانا زەينەتكەرلىككە شىققان اعامىزعا تاڭىرقاي قاراپ, بىردەن ويىمداعى ساۋالدى جەتكىزدىم.
– بوكە, كۇندىز-ءتۇنى بىتپەيتىن جۇمىستا ءجۇرىپ, اۋلاڭىزدى جاسىل جەلەككە قالاي مالىندىرىپ قويعانسىز؟
اعامىز ادەمى ءبىر جىميىپ الىپ, اڭگىمە تيەگىن اعىتتى. «راس ايتاسىڭ. قاربالاس قاۋىرت جۇمىستان قولىمىز تيمەيتىنى شىندىق. سول ءۇشىن دە ادەيىلەپ كوكتەم شىعا سالىسىمەن ءوزىمنىڭ ەڭبەك دەمالىسىمدى الاتىن ەدىم. وسى ۋاقىتتا مىنا جەرگە باقشا داقىلدارىن ەگىپ, جاڭا جەمىس تۇرلەرىنىڭ كوشەتتەرىن دە وتىرعىزامىن. جىل سايىن باقشاعا قىزاناق, قيار, قىزىلشا, ءسابىز, جۋا تۇقىمدارىن سەبەمىن, كۇز بولعاندا بالا-شاعا راحاتىن كورەدى. بۇل بىرىنشىدەن وتباسىمدى تابيعي ونىممەن قامتاماسىز ەتسە, ەكىنشىدەن نەمەرەلەرىم ەڭبەكتىڭ نانى ءتاتتى ەكەنىن كوزبەن كورىپ ءجۇر», دەيدى بوكەڭ اعىنان جارىلىپ.
ەڭبەك دەسە جانىپ تۇسەتىن ازاماتتىڭ اۋلاسىندا بۇگىندە 400 ءتۇپ تال, 100-گە جۋىق جەمىس اعاشتارى جايقالىپ ءوسىپ تۇر. ولاردىڭ قاتارىندا سارى ورىك, شيە, الما, المۇرت, ءجۇزىم, گرەك جاڭعاعى, كيۆي, ءىنجىر, ايبا, شابدالى, قاراقات بار. بارلىعى دا كوكتەپ, جەمىس بەرگەن.
سانالى ازاماتتىڭ ومىردە الدىنا قويار ماقساتى – ءۇي سالىپ, اعاش وتىرعىزىپ, ۇرپاق ءوسىرىپ, ولاردى دۇرىس تاربيەلەۋ بولسا, بوكەڭ دە وسى ءۇش مىندەتىن تولىق ورىنداعان. ول 5 بالا تاربيەلەپ, قازىر 5 نەمەرەسىنىڭ قىزىعىن كورىپ وتىر. ءاماندا يگى باستامانىڭ باسى-قاسىندا جۇرەتىن بوكەڭنىڭ شاڭىراعى جىل سايىن باۋ-باقشا ەگۋدى يگى داستۇرگە اينالدىرىپ, جالىقپاي ەڭبەك ەتۋدىڭ ناتيجەسىندە اۋلاسىن باۋ-باقشامەن جايناتىپ وتىرعان ۇلگىلى وتباسىلاردىڭ ءبىرى.
جەڭىسبەك ايىمقۇلوۆ
قىزىلوردا وبلىسى,
قازالى اۋدانى
