رۋحانيات • 29 شىلدە، 2019

قالامگەردىڭ قايراتكەرلىك قولتاڭباسى

186 رەت كورسەتىلدى

جۋىردا باس باسىلىمنىڭ ارداگەرى، جۋرناليستەردىڭ تالاي بۋىنىن تاربيەلەگەن جانە ەلىمىزدىڭ ۇلتتىق پەداگوگيكالىق باس­پاسوزىن قالىپ­تاستىرۋ مەن دامىتۋعا تاباندى ۇلەس قوسقان كاسىبي رەداكتور، بەل­گىلى قا­لامگەر سايراش ابىشقىزىنىڭ جاڭا جيناعى وقىرمانعا جول تارتتى.

ەلورداداعى «فوليانت» باسپاسىنان جارىق كورگەن «شىعارماشىلىق شىراعىم – باق جۇلدىزىم» اتتى اۆتوردىڭ سۇبەلى ەڭبەگى جۋرناليستىك عۇمىردىڭ جىلى ەستەلىكتەرىمەن ورىل­گەن ومىرباياندىق جولدى ءھام قوعام­داعى كۇردەلى ماسەلەلەرگە بەيجاي قارامايتىن قايراتكەرلىك بول­­مىس­تى جان-جاقتى اشا تۇسۋىمەن ەرەكشەلەنەدى.

جاڭا جيناقتا اۆتوردىڭ تۋىپ-وسكەن جەرى – اقسۋات وڭىرىندەگى بالالىق شاعىنان باستاپ، جاستىق جىگەرى جالىنداعان جىلدارداعى العاشقى ەڭبەك جولى مەن قازاق جۋرنا­ليستيكاسى اعا بۋىنىنىڭ قام­­قورلىعى جانە ورتاسىنان وزىپ شىعىپ، ءباسپاسوز بەن قوعام ىسىندە قازاقتىڭ قايراتكەر قىزىنا اي­نالعان دۇبىرگە تولى ۋاقىتتىڭ، جەمىسى ماۋەلى جىلداردىڭ جارقىن ءۇنى بار. سونىمەن بىرگە اۆتوردىڭ جەتپىستىڭ بەل ورتاسىنا جەتكەن بيىگىنەن قاراعانداعى ءومىردىڭ ءوز ورىمدەرى اجەلىك پاراساتپەن ۇشتاسا ءالى دە قالامىن قولىنان تاستاماعان قاجىرلىلىعىن كورسەتەدى. مىنە، بۇل – ماماندىققا دەگەن شىنايى ىڭكارلىك!

«بايقاساڭىز، ءبىر ەمەس، بىرنەشە ادامنىڭ ەنشىسىنە بۇيىراتىنداي-اق ءىس-ارەكەت، اتاق، ابىروي. تىنىمسىز ەڭبەكتىڭ ناتيجەسىندە جەتسە كەرەك مۇنىڭ بارىنە. جۋرناليستىك، ۇستازدىق ىزدەنىسىنىڭ نەگىزىندە قان­داي ماسەلەنى قاۋزاسا دا بۇگە-شىگەسىنە دەيىن ناقتى تالدايتىن ورەسى تاڭعالدىرادى» دەپ جازادى كىتاپتىڭ العىسوزىندە قازاقستاننىڭ ەڭبەك سىڭىرگەن قايراتكەرى، حالىقارالىق «الاش» سىيلىعىنىڭ يەگەرى ماعيرا قوجاحمەتوۆا. شىن مانىندە، سايراش ابىشقىزى كىتا­بىنىڭ كوگىلدىر مۇقاباسىندا كور­سەتىلگەندەي، جۋرناليستىك ەڭبەك جولىن اعا باسىلىم – «سوتسياليستىك قازاقستاننان» باستاپ، ۇزاق باعاەۆ، كەيىن ساپار بايجانوۆ جەتەكشىلىك ەتكەن رەداكتسياداعى كىل جۇيرىكتەردىڭ اراسىنان سۋىرىلىپ شىعىپ، «قازاقستان ايەلدەرى» جۋرنالىندا ۇيىمداستىرۋشىلىق قابىلەتىن ۇشتاپ، سول كەزدەگى رەسپۋبليكاداعى جالعىز-جارىم پەداگوگيكالىق باسىلىمدار ساناتىنداعى «قازاقستان مەكتەبى» مەن «باستاۋىش مەكتەپ» جۋرنالدارىنىڭ باسشىلىعىنا جان-جاقتى دايىندىقپەن كەلگەن-ءدى. مىنە، حح عاسىر باسىندا اح­مەت بايتۇرسىن ۇلى مەن سماعۇل سادۋاقاس ۇلى سىندى ءبىرتۋار ارىس­تار قالاعان جۋرنالدىڭ ەلۋىنشى جىلداردان باستاپ كەڭەستىك يدەولوگيا قىسپاعىمەن تارىلا تۇسكەن ءورىسىن كەڭەيتۋگە بىلەك سىبانا كى­رىسكەن سايراش ابىشقىزى 30 جىلعا جۋىق باس رەداكتورلىق قىز­مە­تىندە «قازاقستان مەكتەبى» جۋر­نالىنىڭ جانىنان «وتباسى جانە بالاباقشا»، «ينفورماتيكا، فيزيكا، ماتەماتيكا»، «قازاق تاريحى»، «بيولوگيا، گەوگرافيا جانە حيميا» سياقتى كوپتەگەن پاندەرگە ارنالعان جۋرنالداردى اشىپ، ۇلتتىق مەكتەپتەردىڭ ارتۋىنا عانا ەمەس، ونداعى ءبىلىم ساپاسىنىڭ جوعارىلاۋىنا دا جۋرنالداعى قىز­مەتىنەن بولەك، الماتى قالا­سى ءماسليحاتىنىڭ دەپۋتاتى جانە «قازاق ءتىلى» قوعامىنىڭ ال­­ما­تى قالالىق فيليالىنىڭ جە­تەك­­شىسى رەتىندە دە ايتارلىقتاي ۇلەس قوستى. سونىمەن بىرگە رەداكتسيا مۇشەلەرىنىڭ الەۋمەتتىك جاعدايلارىنىڭ وڭ شەشىلۋىنە قولۇشىن سوزىپ، بۇگىندە ادەبيەت پەن مادەنيەتتىڭ بەلدى وكىلدەرىنە اينالعان جۋرناليستەر قاۋىمىنىڭ باسپانالى بولۋىنا ىقپال ەتتى. بۇل جەرگىلىكتى ۇلتتىڭ تىركەۋسىز قالادا تۇراقتاي المايتىن، الماتىدا الشاڭ باسىپ جۇرە المايتىن كە­ڭەستىك كەزەڭ مەن توقسانىنشى جىل­داردىڭ توقىراۋىندا مەيى­رىمدىلىك پەن مەنەدجەرلىك ۇيلە­سىمىنىڭ ۇزدىك ۇلگىسى ىسپەتتى ەدى. جي­ناقتا قاي­راتكەر-قالامگەردىڭ بۇل قىرى دا جىلى ەستەلىكتەرمەن، جۇرەكتەن شىققان جىرلارمەن ورىلگەنىن ايتا كەتكەن ءلازىم.

سايراش اپاي بۇگىنگە دەيىن ءبىلىم سالاسىنداعى، ۇلتتىق ءتالىم-تاربيە ىسىندەگى كوكىرەگىن قوزعاعان كوركەم وي­لارىن وقىرمانىمەن ءبولىسىپ كەلەدى.

جيناقتى قولعا العانىڭىزدا قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، ءبىلىم بەرۋ ءىسىنىڭ قۇرمەتتى قىزمەتكەرى سايراش ابىشقىزىنىڭ بولاشاق ۇرپاقتىڭ بىرەگەي بولۋىنا ارناعان شىعارماشىلىق عۇمىرى شىنىندا ءبىر ادامعا جەتەرلىك باق جۇلدىزى ەكەنىن تۇيسىنە تۇسەسىز.

سوڭعى جاڭالىقتار

مۇناي باعاسى تومەندەدى

ەكونوميكا • بۇگىن، 13:23

دوستىق بەسىگى

ايماقتار • بۇگىن، 08:43

ەل كۋبوگى ءۇشىن تالاسادى

فۋتبول • بۇگىن، 08:40

شيرەك فينالدا ۇتىلدى

تەننيس • بۇگىن، 08:39

دايارلىقتارىن پىسىقتادى

حوككەي • بۇگىن، 08:37

ازىرگە بەسىنشى ورىندامىز

سپورت • بۇگىن، 08:30

ون جىلعا سوتتالدى

قوعام • بۇگىن، 08:25

ۇقساس جاڭالىقتار