«جاس كاسىپكەر» جانە «باستاۋ بيزنەس» جوبالارى
ۇكىمەت جەتەكشىسى الەۋمەتتىك جوبالاردى ىسكە اسىرۋ اياسىندا «اتامەكەن» قولداۋ ورتالىعى» ءموبيلدى جۇمىسپەن قامتۋ ورتالىعىنا, جۇمىسشى ماماندىقتارىنا وقىتۋ جونىندەگى وقۋ ورتالىعىنا جانە «جاس كاسىپكەر» ءىسىن جاڭادان باستاعان كاسىپكەرلەرگە ارنالعان وقۋ ورتالىعىنا باردى.
«اتامەكەن» ءموبيلدى جۇمىسپەن قامتۋ ورتالىعىنىڭ قىزمەتى جاستاردى كاسىپكەرلىك نەگىزدەرىنە وقىتۋعا جانە ودان كەيىن جۇمىسپەن قامتۋعا باعىتتالعان. ءموبيلدى ورتالىقتار نۇر-سۇلتان, الماتى جانە شىمكەنت قالالارىندا اشىلعان, بۇگىندە 9 ورتالىق جۇمىس ىستەيدى, قازاقستاننىڭ بارلىق وڭىرىندە تاعى 30 ورتالىق اشۋ كوزدەلگەن. پرەمەر-مينيستر «اتامەكەن» قولداۋ ورتالىعى» جۇمىسپەن قامتۋ ورتالىعىندا جەكە ءىسىن اشۋعا نيەت ەتىپ جۇرگەن جاس ماماندارمەن كەزدەسىپ, اڭگىمەلەستى.
ۇكىمەت باسشىسى تۇڭعىش پرەزيدەنت – ەلباسى ن.نازارباەۆتىڭ الەۋمەتتىك ساياساتى اياسىندا جانە پرەزيدەنت ق.توقاەۆتىڭ تاپسىرماسى بويىنشا ۇكىمەت حالىقتىڭ ءال-اۋقاتىن ارتتىرۋعا باعىتتالعان شۇعىل شارالار پاكەتىن ازىرلەگەنىن اتاپ ءوتتى. وسى جىلدىڭ سوڭىنا دەيىن 300 مىڭنان استام جاس ازامات جۇمىسپەن قامتۋعا كومەكتەسۋ شارالارىمەن قامتىلادى. سونىڭ ىشىندە «باستاۋ بيزنەس», «جاس كاسىپكەر» باعدارلامالارى اياسىندا قىسقا مەرزىمدى كاسىپتىك وقىتۋ, ستارتاپ جوبالارعا گرانتتار مەن شاعىن نەسيەلەر بەرۋ ارقىلى قولداۋ كورسەتىلەدى.
سونداي-اق پرەمەر-مينيستر تىگىن ىسىنە وقىتاتىن «DANMARD» وقۋ ورتالىعىنا باردى. اتالعان وقۋ ورتالىعىندا وقۋ كەزەڭى – 3 اي. اي سايىنعى شاكىرتاقى 21 مىڭ تەڭگەنى قۇرايدى.
پرەمەر-مينيستر كاسىپكەرلىك نەگىزدەرىنە وقىتاتىن «جاس كاسىپكەر» وقۋ ورتالىعىندا جوباعا قاتىسۋشىلار ءۇشىن بيزنەس-ترەنينگ وتكىزدى.
وقۋ اياقتالعاننان كەيىن جۇمىسسىز جانە ءوزىن-ءوزى جۇمىسپەن قامتىعان جاستار 500 مىڭ تەڭگەدەن استام وتەۋسىز گرانتقا ۇمىتكەر بولا الادى, سونداي-اق ايىنا 19 مىڭ تەڭگە كولەمىندە شاكىرتاقى الا الادى.
بۇگىندە قازاقستان كاسىپورىندارىنىڭ نەگىزىندە 563 وقۋ ورتالىعى جۇمىس ىستەيدى (ەلوردادا 50 وقۋ ورتالىعى), بولاشاقتا ولاردىڭ سانىن 1000-عا دەيىن ۇلعايتۋ كوزدەلگەن.
2021 جىلى پايدالانۋعا بەرىلەدى
سونداي-اق ا.مامين تۇڭعىش پرەزيدەنت – ەلباسى ن.نازارباەۆتىڭ تاپسىرماسى بويىنشا سالىنىپ جاتقان نۇر-سۇلتان قالاسىنداعى ۇلتتىق عىلىمي ونكولوگيالىق ورتالىققا باردى.
ۇكىمەت باسشىسىنا جاڭا عىلىمي ونكولوگيالىق ورتالىقتى سالۋ بويىنشا جول كارتاسىن ىسكە اسىرۋ بارىسى تۋرالى باياندالىپ, عيماراتتى جوبالاۋ سىزباسى تانىستىرىلدى. عىلىمي ونكولوگيالىق ورتالىق استىڭعى قاباتىن قوسا العاندا 6 قاباتتان تۇرادى. عيماراتتىڭ جالپى اۋدانى 49 مىڭ شارشى مەتردەن, ال قۇرىلىس اۋماعى 16 مىڭ شارشى مەتردەن استام. قۇرىلىستى 2021 جىلعى ناۋرىزدا اياقتاۋ جوسپارلانعان.
جاڭا ورتالىقتا قاتەرلى ىسىك اۋرۋلارىن انىقتاۋ مەن ەمدەۋدىڭ الدىڭعى قاتارلى تەحنولوگيالارى پايدالانىلادى. سونىمەن قاتار وسىعان دەيىن قۇرىلعان كارديولوگيالىق جانە نەيروحيرۋرگيالىق كلاستەرلەردىڭ تاجىريبەسىن پايدالانا وتىرىپ, لازەرلىك, ساۋلەلىك جانە جاسۋشالىق-يممۋندىق تەراپيا قولدانىلادى.
بۇگىندە ۋاقىتشا عيماراتتار مەن قۇرىلىستاردى سالۋ, وسىعان دەيىن بولعان اكىمشىلىك-تۇرمىستىق نىسانداردى بۇزۋ, شۇڭقىر قازۋ, سۋ دەڭگەيىن تومەندەتۋ, باعانانى قاعۋ جۇمىستارى ورىندالدى, سونداي-اق ىرگەتاستى قالاۋ جۇمىستارى باستالدى.
2018 جىلى ۇكىمەت مەديتسينالىق قىزمەتتەردى ۇسىنۋ ساپاسىن جاقسارتۋدى جانە ونكولوگيالىق ديسپانسەرلەردەگى جابدىقتاردى جاڭارتۋدى كوزدەيتىن, 2018-2022 جىلدارعا ارنالعان قاتەرلى ىسىك اۋرۋلارىمەن كۇرەس جونىندەگى كەشەندى جوسپاردى قابىلدادى.
بۇعان قوسا, نىساندى ارالاۋ بارىسىندا جاڭا عىلىمي ونكولوگيالىق ورتالىق سالۋ ءۇشىن جەر تەلىمىن نازارباەۆ ۋنيۆەرسيتەتتەن رەسپۋبليكالىق مەنشىككە بەرۋ ماسەلەسى دە قارالدى.
جەو-3 قۇرىلىسىن تەكسەردى
پرەمەر-مينيستر جاڭا جەو-3 قۇرىلىسىنىڭ بارىسىن, وتىن-ەنەرگەتيكا كەشەنىنىڭ نىساندارىن جاڭعىرتۋ بارىسىن تەكسەردى.
جەو-3 قۇرىلىس الاڭىندا ۇكىمەت باسشىسىنا جەو-3 قۇرىلىسىنىڭ ءبىرىنشى كەزەڭى قۋاتتىلىعى 480 گكال/ساع بولاتىن سۋ جىلىتاتىن قازاندىق سالۋدى قاراستىراتىنى باياندالدى.
نىسان اۋماعىندا تەمىر جول جانە اۆتوكولىك جولدارى, اكىمشىلىك-تۇرمىستىق كەشەن عيماراتتارى سالىندى. قازىر نەگىزگى جابدىقتى اۆتوماتتاندىرۋ جانە ەلەكترلىك بولىگىن مونتاجداۋ جۇمىستارى جۇرگىزىلىپ جاتىر. بۇگىندە نىساننىڭ دايارلىعى 70%-دى قۇرايدى.
جەو-3 قۇرىلىسى تاياۋ جىلدارى ەلوردانىڭ باتىس بولىگىندە جىلۋعا ارتىپ كەلە جاتقان سۇرانىستى قامتۋعا مۇمكىندىك بەرەدى, سونىمەن قاتار جەكە ءوندىرۋشى قۋاتتى جانە نۇر-سۇلتان قالاسىنداعى وتىن-ەنەرگەتيكا كەشەنىنىڭ جىلۋ كوزىن ايتارلىقتاي ۇلعايتادى.
قۇرىلىس الاڭىندا پرەمەر-مينيسترگە ارەكەت ەتىپ تۇرعان جەو-1 جانە جەو-2 ەنەرگيا كوزدەرىن جاڭعىرتۋ جانە گازداندىرۋ, ەنەرگيا كەشەنىنىڭ الداعى جىلىتۋ ماۋسىمىنا دايىندىعى تۋرالى اقپارات بەرىلدى.
ۇكىمەت باسشىسى ەلوردانىڭ وتىن-ەنەرگەتيكا كەشەنىنىڭ نىساندارىن سالۋ جانە جاڭعىرتۋ بويىنشا بىرقاتار ناقتى تاپسىرما بەردى.
