بيىل اقىن, جازۋشى, مەملەكەت قايراتكەرى ساكەن سەيفۋلليننىڭ 125 جىلدىعى رەسپۋبليكا بويىنشا اتالىپ وتەدى. قاراعاندى وبلىسىندا بىرقاتار شارا جوسپارلانعان.
«وبلىس مەكتەپتەرىنىڭ وقۋشىلارىنىڭ قاتىسۋىمەن «ساكەن وقۋلارى» ءوتتى. سونداي-اق اۋداندىق تەاترلار بايقاۋى, اقىندار مەن جازۋشىلار اراسىندا دودا, ءان بايقاۋى ۇيىمداستىرىلدى. جاڭاارقا اۋدانىندا ءبىز العاش رەت «ارقانىڭ سال-سەرىلەرى – 2019» اتتى وبلىستىق اقىندار مەن انشىلەر سايىسىن ۇيىمداستىردىق. وبلىستىڭ بارلىق مۋزەيى مەن كىتاپحاناسىندا جىل سوڭىنا دەيىن سەمينارلار, دوڭگەلەك ۇستەلدەر, كىتاپ كورمەسى جانە تاقىرىپتىق كورمەلەر وتەدى. بارلىعى 60-تان استام مەرەيتويلىق شارا وتكىزۋدى جوسپارلاپ وتىرمىز», دەدى ەركەبۇلان اعىمباەۆ.
ول سونداي-اق جازۋشىنىڭ 125 جىلدىعىنا وراي وبلىستىق تاريحي-ولكەتانۋ مۇراجايى زەرتتەۋ جۇمىستارىن جۇرگىزەتىنىن اتاپ ءوتتى. ناتيجەسىندە ساكەن سەيفۋلليننىڭ ءومىرى مەن قىزمەتى تۋرالى مونوگرافيا شىعارىلادى. س.سەيفۋللين اتىنداعى تەاتر جانە جەزقازعاننىڭ قوجامقۇلوۆ اتىنداعى قازاق مۋزىكالىق تەاترىندا جولتاي الماشەۆتىڭ «ساكەننىڭ سوڭعى ساپارى» جانە «ساكەننىڭ سوڭعى ساتتەرى» اتتى جاڭا سپەكتاكلدەرى قويىلادى.
«ساكەن سەيفۋلليننىڭ 125 جىلدىعىنا ارنالعان باستى شارا 20 قىركۇيەكتە قاراعاندىداعى ورتالىق ساياباقتىڭ ساحناسىندا وتەدى. بۇل كۇنى وندا قازاقستاندىق ەسترادا جۇلدىزدارىنىڭ قاتىسۋىمەن ۇلكەن كونتسەرت بولادى. سونداي-اق كورمەلەر, ويىندار, تەاترلاندىرىلعان قويىلىم ۇيىمداستىرىلادى. مۇنىمەن شەكتەلمەيدى. كۇزدە رەسپۋبليكالىق عىلىمي-تاجىريبەلىك كونفەرەنتسيا جوسپارلانعان. ونى وبلىستىق تىلدەردى دامىتۋ جونىندەگى باسقارما قارمۋ-مەن بىرلەسىپ ۇيىمداستىرادى. قاراشا ايىندا وبلىس اكىمىنىڭ كۋبوگى ءۇشىن جارىس وتەدى. وبلىستىق سپورت جانە دەنە شىنىقتىرۋ باسقارماسى شاحماتتان رەسپۋبليكالىق چەمپيونات ۇيىمداستىرادى. ال شەت اۋدانىندا «سالبۋرىن» رەسپۋبليكالىق ءتۋرنيرى مەن «دالا داۋىسى» اتتى حالىق اندەرىن ورىنداۋشىلار اراسىندا بايقاۋ وتكىزىلەدى», دەدى ەركەبۇلان اعىمباەۆ.
مەرەيتويعا ورايلاستىرىلعان سالتاناتتى شارالار ساكەن سەيفۋللين تۋرالى دەرەكتى فيلم كورسەتىلىمىمەن اياقتالادى. كارتينانىڭ پرەمەراسى جىل سوڭىنا جوسپارلانعان.
