توكيو-2020 ۇيىمداستىرۋ كوميتەتى مەدالداردى قورشاعان ورتاعا زيانسىز بولاتىنداي وڭدەلگەن كىشى كولەمدى ەلەكتروندى قۇرىلعىلاردان جاسايتىنىن 2017 جىلدىڭ اقپان ايىندا مالىمدەگەن. سول ۋاقىتتان بەرى جاپونيانىڭ تۇكپىر-تۇكپىرىنەن تۇرعىندار قاجەتسىز نوۋتبۋك, تسيفرلىق فوتواپپارات, سمارتفوندار مەن ۇيالى تەلەفوندارىن وتكىزە باستاعان. ناتيجەسىندە جينالعان 80 000 توننا ونىمنەن 5000 التىن, كۇمىس جانە قولا مەدالدارى جاسالادى.
مەدالدىڭ بەت جاعىندا توكيو وليمپياداسىنىڭ ەمبلەماسى ورنالاسقان, ال ارتىندا ەجەلگى گرەك ميفولوگياسىنداعى جەڭىس قۇدايى بەينەلەنگەن. ال مەدال لەنتاسىندا جاپون مادەنيەتىنە ساي تۇستەر مەن ورنەكتەر قولدانىلعان. اۆتورى – جاپوندىق ديزاينەر دزيۋنيتي كاۆانيسي.
2020 جىلعى جازعى وليمپيادا ويىندارى 24 شىلدە مەن 9 تامىز ارالىعىندا وتەدى. بۇل – جاپونيادا وتكىزىلەتىن ءتورتىنشى وليمپيادا ويىندارى.
