«ەلباسىنىڭ تاپسىرماسى بويىنشا ەلوردانى دامىتۋدىڭ وزەكتى ماسەلەلەرىن شەشۋ, ونىڭ ىشىندە ءبىلىم بەرۋ, دەنساۋلىق ساقتاۋ نىساندارىن سالۋ جانە كولىك ينفراقۇرىلىمىن دامىتۋ بويىنشا نۇر-سۇلتان قالاسىن دامىتۋدىڭ بەس جىلدىق كەشەندى جوسپارى دايىندالىپ, بەكىتىلدى», — دەپ قر پرەمەر-ءمينيسترى, قر پرەزيدەنتى ق. توقاەۆ ەلىمىزدىڭ باس قالاسىنىڭ دامۋىنا ۇلكەن ءمان بەرەتىنىن جانە ۇكىمەتكە بىرقاتار مىندەتتەردى جۇكتەگەنىن ايتتى».
مەملەكەتتىك كوميسسيا وتىرىسى بارىسىندا قالانىڭ جيىنتىق قۇرىلىسى جونىندەگى كەشەندى جوسپاردى ىسكە اسىرۋ, گازبەن جابدىقتاۋ, قالا ماڭىن دامىتۋ جانە ۇلەستىك قۇرىلىس ماسەلەلەرى تالقىلاندى.
كەشەندى جوسپاردى ىسكە اسىرۋ جانە نۇر-سۇلتان قالاسىن دامىتۋدىڭ وزەكتى ماسەلەلەرى تۋرالى قالا اكىمى ا. كولگىنوۆ باياندادى. بەيىندى باعىتتار بويىنشا ۇلتتىق ەكونوميكا ءمينيسترى ر. دالەنوۆ, دەنساۋلىق ساقتاۋ ءمينيسترى ە. ءبىرتانوۆ, ءبىلىم جانە عىلىم ءمينيسترى ا. ايماعامبەتوۆ, اۋىل شارۋاشىلىعى ءمينيسترى س. وماروۆ, يندۋستريا جانە ينفراقۇرىلىمدىق دامۋ ءمينيسترى ر. سكليار, ەكولوگيا, گەولوگيا جانە تابيعي رەسۋرستار ءمينيسترى م. مىرزاعاليەۆ, ادىلەت ءمينيسترى م. بەكەتاەۆ, ەنەرگەتيكا ءبىرىنشى ۆيتسە-ءمينيسترى م. دوسمۇحامبەتوۆ باياندادى.
«ەلوردادا تۇرعىن ۇيگە سۇرانىس جوعارى كەزدە تۇرعىن ءۇي قۇرىلىسىنىڭ قارقىنى تومەندەمەۋى ءتيىس», — دەپ اسقار مامين, 6 ايدىڭ قورىتىندىسى بويىنشا قۇرىلىس قارقىنى 20%-عا تومەندەگەنىن ايتتى.
جالپى, جارتى جىلدىڭ قورىتىندىسىنا سايكەس نەگىزگى كورسەتكىشتەر بويىنشا ارتتا قالۋشىلىق بايقالۋدا: نەگىزگى كاپيتالعا ينۆەستيتسيالار 20%-عا, تۇرعىن ءۇيدى پايدالانۋعا بەرۋ 33%-عا تومەندەدى.
«ۇكىمەت ەلوردانى كەشەندى دامىتۋدى ىسكە اسىرۋ ءۇشىن بارلىق قاجەتتى شارالاردى قابىلدادى. ەلوردا الەۋمەتتىك-ەكونوميكالىق دامۋ كورسەتكىشتەرىنە قول جەتكىزۋ بويىنشا بارلىق وڭىرلەرگە ۇلگى بولۋى ءتيىس», — دەدى اسقار مامين.
جەكەلەگەن ماسەلە — نۇر-سۇلتان قالاسىنىڭ توڭىرەگىن دامىتۋ. ەلوردا اكىمدىگى بيىل 9 جوبانى ىسكە اسىرۋدى جوسپارلادى, سونىڭ ىشىندە الەۋمەتتىك, مادەني ماڭىزداعى نىساندار, گازداندىرۋ نىساندارىن, ينجەنەرلىك جەلىلەر سالۋ ماسەلەلەرى بار.
«نۇر-سۇلتان قالاسىنىڭ توڭىرەگىندەگى ماسەلەلەردى شەشۋگە ءۇش جىلدىق كەزەڭگە 22,5 ملرد تەڭگە قاراستىرىلعان, وسى قاراجاتتى قالا توڭىرەگىندە ءومىر سۇرەتىن ازاماتتاردىڭ تۇرمىس ساپاسىن ارتتىرۋعا جۇمساۋ قاجەت», — دەپ اسقار مامين باسا ايتتى.
ۇكىمەت باسشىسى كەڭەس قورىتىندىسىن شىعارا وتىرىپ, بىرقاتار ناقتى تاپسىرمالار بەردى.
ەلوردا اكىمدىگىنە مۇددەلى مەملەكەتتىك ورگاندارمەن بىرلەسىپ, كەشەندى جوسپاردىڭ ءىس-شارالارىن ۋاقىتىلى ءارى ساپالى ىسكە اسىرۋ, ەلوردا توڭىرەگىندە نىساندار سالۋدىڭ جسق ازىرلەۋ بويىنشا قاجەتتى شارالاردى قابىلداۋ, ۇلەستىك قۇرىلىستاعى پروبلەمالىق نىسانداردىڭ قۇرىلىسىن اياقتاۋدى جەدەلدەتۋ تاپسىرىلدى.
قر پرەمەر-ءمينيسترى نۇر-سۇلتان قالاسى اكىمدىگىنىڭ نەگىزگى جۇمىسى گازبەن جابدىقتاۋ, كوشەنى جارىقتاندىرۋ, نوسەر كاناليزاتسياسى, الەۋمەتتىك نىساندار سالۋ, اباتتاندىرۋ, كولىك جەلىلەرىن دامىتۋ ماسەلەلەرىن جەدەل تۇردە شەشۋ ەكەنىن ايتتى.
