جەس ورنالاسقان ءوڭىر ەنەرگياعا تاپشى. الماتى جەو-لارى, قاپشاعاي جانە الماتى سەس كاسكادتارى, ەسىك سەس-ءى, مويناق سەس-ءى, قاراتال سەس-ءى وڭىردەگى ەلەكتر ەنەرگياسىنىڭ نەگىزگى كوزدەرى بولىپ تابىلادى.
بۇگىنگى تاڭدا ءوزىنىڭ قۋات ءوندىرۋ كوزدەرى بولماعاندىقتان, الماتى وبلىسىنىڭ ەلەكتر ەنەرگياسىنا دەگەن قاجەتتىلىگىن جەرگىلىكتى قۋات كوزدەرى 50%-كە عانا قاناعاتتاندىرادى.
«شەلەك دالىزىندە جەل ەلەكتر ستانتسياسىن سالۋ ارقىلى پارنيك گازدارىن (سو2) شىعارۋ جىلىنا 206 مىڭ تونناعا ازايادى, سونداي-اق جىلىنا 89 مىڭ توننا شارتتى وتىن اۋىستىرىلادى. ونىڭ ۇستىنە, جەل ەلەكتر ستانتسياسى قورشاعان ورتاعا اسەر ەتپەي وتىرىپ, ەلەكتر ەنەرگياسىنىڭ قورىن تولىقتىرۋعا مۇمكىندىك بەرەدى», - دەدى «سامۇرىق-ەنەرگو» اق جوبالاۋ ءوفيسىنىڭ باسشىسى ەرنۇر جيەنباەۆ.
نىساننىڭ قۇرىلىسى كەزەڭىندە 300 جۇمىس ورنى اشىلىپ, ستانتسيا ىسكە قوسىلعاننان كەيىن تۇراقتى نەگىزدەگى 14 جۇمىس ورنى پايدا بولادى. جەس جىلىنا 225 750 مىڭ كۆتس ەلەكتر ەنەرگياسىن وندىرەدى دەپ كۇتىلۋدە. جوبانىڭ اياقتالۋ مەرزىمى – 2020 جىل.
اتاپ وتەيىك, ستانتسيا جيىنتىق قۋاتى 60 مۆت بولاتىن 24 جەل ەنەرگەتيكالىق قوندىرعىدان, قوسالقى ستانتسيادان جانە ەلەكتر جەلىلەرىنەن تۇرادى. نىساننىڭ اگرەگاتتارى جەل ستانتسياسىن اۆتوماتتى باسقارۋ جۇيەسىنە نەگىزدەلگەن اپپاراتتىق-باعدارلامالىق كەشەن ارقىلى رەتتەلەدى. بۇل مودەلدىڭ ارتىقشىلىعى سول, ونى سۋىق كونتينەنتالدىق كليمات (–30…+43 س), 10 بالدىق سەيسميكالىق بەلسەندىلىك جانە جەلدىڭ ەكپىنى II كلاسس جاعدايىندا پايدالانۋعا بولادى.
ەستەرىڭىزگە سالا كەتەيىك, «سامۇرىق-ەنەرگو» اق بۇعان دەيىن جەك سالاسىنداعى 2 جوبانى: قاپشاعاي قالاسىنداعى 2 مۆت كۇن ەلەكتر ستانتسياسىن («Samruk-Green Energy» جشس) جانە ەرەيمەنتاۋ قالاسىنداعى 45 مۆت جەل ەلەكتر ستانتسياسىن («بجەس» جشس) ىسكە اسىرعان بولاتىن.
