فەدەرالدىق ساۋدا كوميسسياسى (FTC) سونداي-اق Facebook ديرەكتورلار كەڭەسىندە قولدانۋشىلاردىڭ جەكە دەرەكتەرىن قورعاۋدى باقىلايتىن كوميسسيا قۇرۋدى تالاپ ەتىپ وتىر. تاۋەلسىز ساراپشىلاردان تۇراتىن كوميسسيا كومپانيا باسشىسى مارك تسۋكەربەرگكە باعىنبايدى.
Facebook-كە سالىنعان ايىپپۇل سومماسى تاريحتا اقش ۇكىمەتى قولدانۋشىلاردىڭ جەكە اقپاراتىن ساقتاۋ ەرەجەلەرىن بۇزعانى ءۇشىن جاۋاپقا تارتقان كەز كەلگەن كومپانيامەن سالىستىرعاندا رەكوردتىق بولىپ وتىر.
وتكەن جىلى كومپانيا Facebook الەۋمەتتىك جەلىسىنە تىركەلگەن قولدانۋشىلاردىڭ جەكە مالىمەتتەرىن زاڭسىز تاراتقانى ءۇشىن داۋعا قالعان ەدى. قۇپيا مالىمەتتەرگە قول جەتكىزگەن Cambridge Analytica ساياسي كونسالتينگتىك فيرماسى دەرەكتەردى ساياسي ناۋقانداردا قولداندى دەپ ايىپتالعان. جالپى 87 ميلليونعا جۋىق اككاۋنتتىڭ جەكە دەرەگى تارالعان. اقش تۇتىنۋشىلاردىڭ قۇقىعىن قورعاۋ بيۋروسىنىڭ تەرگەۋىنە سايكەس, دەرەكتەر ونلاين-ساۋالنامالار ارقىلى زاڭسىز جينالىپ, Cambridge Analytica-عا ساتىلعان.
Cambridge Analytica پايدالانۋشىلاردىڭ قۇپيا دەرەكتەرىنە قول جەتكىزگەن جالعىز فيرما ەمەس – ودان وزگە دە ۇيىمدار رۇقساتسىز پايدالانعان دەلىنگەن.
Facebook باسشىسى مارك تسۋكەربەرگ ءوزىنىڭ مالىمدەمەسىندە كومپانيا قولدانۋشىلارىنىڭ جەكە مالىمەتىن قورعاۋدى كۇشەيتەتىنىن جەتكىزدى. «فيرما ادامداردىڭ جەكە باسىنىڭ قۇپياسىن ساقتاۋعا جاۋاپتى بولعاندىقتان, الداعى ۋاقىتتا ءوز ونىمدەرىندە قۇپيا اقپارات تاراماس ءۇشىن قولدانىلاتىن تەحنيكالىق جۇيەلەردى قايتا قاراستىرادى. بۇل جۇمىستى اتقارۋ ءۇشىن جۇزدەگەن ينجەنەر مەن مىڭنان استام ادام جۇمىلدىرىلادى دەپ كۇتەمىز», دەدى.
