قازاق جەرىنە جاڭالىق بولىپ كەلگەن الىپ تەمىرجولدىڭ قۇرىلىسى جىلدارعا سوزىلدى. ارقاسىن ات تۇياعىنان باسقا تاپتاماعان سالقار مەكەندى سان كۇيگە بولەگەن بۇل شويىنجولعا مىڭداعان ەڭبەك ادامدارىنىڭ تەرى ءسىڭدى. مۋزەي قابىرعاسىنان ورىن العان مىنا ءبىر ەكسپوزيتسياعا ەڭبەككەرلەردىڭ قۇرىلىس كەزىندە قولدانعان تەمىر شامدارى قويىلىپتى. وسىناۋ ايرىقشا بۇيىمدار الىپ قۇرىلىستىڭ تاريحىنا قىزىققان جاندى بىردەن ەلەڭ ەتكىزەدى. وعان قوسا العاشقى رەلس رەتىندە توسەلگەن شويىن تەمىردىڭ بولشەگى دە تاريحقا اينالعان وتكەن كەزەڭدەردىڭ جارقىن كورىنىسىنە ساپار شەكتىرەدى. مۋزەي قىزمەتكەرى ابادان تلەۋبەرگەنوۆا بۇل بۇيىمدارعا كەلۋشىلەردىڭ ىنتا-ىقىلاسى ەرەكشە ەكەنىن ايتادى.
«تۇركىستان-ءسىبىر تەمىرجولى ورتالىق ازيا مەن ءسىبىردى بايلانىستىرۋ ءۇشىن سالىنعان كسرو-نىڭ ءىرى قۇرىلىستارىنىڭ ءبىرى. تەمىر جول قۇرىلىسى ءبىر مەزەتتە سولتۇستىكتە سەمەي ءجانە وڭتۇستىكتە لۋگوۆوي بەكەتتەرىنەن باستالىپ, 1442 شاقىرىمدىق جول 1930 جىلى اينابۇلاق بەكەتىندە ءتۇيىستى. تۇركسىب تەمىرجولىنىڭ جولاۋشىلار تاسىمالدايتىن باعىتتارى بويىنشا بەلگىلەنگەن كەستەگە ءسايكەس, الماتى-1 تەمىر جول بەكەتىنىڭ كاسساسى دا ارنايى ينستاللياتسيا ارقىلى كورەرمەنگە ۇسىنىلعان. دالا ءوركەنيەتىندەگى ايتۋلى وزگەرىس ءبىرقاتار شىعارماشىلىق يەلەرىن تەرەڭ شابىتقا بولەدى» دەيدى ول.
قازاق بەينەلەۋ ونەرىنىڭ زاڭعارى ءابىلحان قاستەەۆ تە العاشقى ەڭبەك جولىن ءداپ وسى تەمىر جول قۇرىلىسىنىڭ اينابۇلاق بەكەتىندە جەر قازۋشى بولىپ باستادى. كۇندەردىڭ كۇنى توسىن سىيى كوپ تىرشىلىك كوكىرەگىندە قايناپ جاتقان تالانت بۇلاعىنىڭ باعىتىن ۇلكەن ارناعا بۇرىپ, ۇلى دارىن تۋعان توپىراعىنا قۇبىلىس بولىپ كەلگەن الىپ تەمىرجولدى كۇرەكپەن ەمەس, قىلقالاممەن سالىپ شىقتى. كەيىن ونىڭ ايگىلى «تۇركسىب» شىعارماسى قازاق تەمىرجولىنىڭ پاسپورتىنا اينالدى. تۇركسىب تەمىرجولىنىڭ قۇرىلىسىنا قاتىستى كوپتەگەن قىزىقتى دەرەكتەر بار. ون مىڭنان استام ادام جىلدار بويى تىنىمسىز ەڭبەك ەتكەن تەمىر جول قۇرىلىسىندا تۇرار رىسقۇلوۆ جاردەم كوميتەتىنىڭ توراعاسى بولدى.
الماتى
