«استانا وپەرا» سيمفونيالىق وركەسترىنە ەۋروپاداعى ەڭ ءىرى ونەر وشاقتارىنىڭ ءبىرى سانالاتىن «كارلو فەليچە» تەاترىنىڭ ديرەكتورى دجۋزەپپە اكۋاۆيۆا جەتەكشىلىك ەتتى, ول – پۋچچيني وپەرالارىنىڭ بىلىكتى مامانى ءارى ورىندالۋى جاعىنان وتە كۇردەلى جانردى ەگجەي-تەگجەيلى مەڭگەرگەن تۇلعا.
تۇرمىستىق شىندىقتىڭ شىرعالاڭى شىنايى بەينەلەنگەن بۇل وپەرانى دج.ءپۋچچينيدىڭ ءوزى دە كەزىندە وتە جوعارى باعالاپ, قايتا-قايتا تىڭداۋدان جالىقپاعان كورىنەدى. كىشكەنە گەيشانىڭ قايعىلى وقيعاسى تاشكەنتتىك ونەرسۇيەر قاۋىمدى بەيجاي قالدىرمادى.
– اسىرەسە «اباي» وپەراسىنىڭ ورىندالۋىنا ءتانتى بولدىق. نەتكەن دياپازونى شالقىعان كەڭ داۋىس! سپەكتاكلدىڭ كيىمدەرى قانداي ادەمى! ساحنانى بەينەبىر نۇرلى شۋاققا تولتىرىپ جىبەرگەندەي جانىمىز راحات كۇي كەشتى. مۇنداي ستسەنوگرافيا وتە سيرەك, ءتىپتى ەشبىر تەاتردا جوق دەسەك, ارتىق ايتپايمىز. سپەكتاكلدىڭ ىشىندە ءومىر سۇرۋگە بولادى دەگەن ءسوز ءسىرا, وسىندايدا ايتىلسا كەرەك. تاشكەنت تەاترىنىڭ زالى كوپتەن بەرى ءدال مۇنداي كەرەمەت ءساتتى باستان كەشپەگەن ەدى. ال «مادام باتتەرفلياي» وپەراسىنىڭ دەكوراتسياسى كىسىنى الاپات سەزىممەن باۋرادى. سپەكتاكلدىڭ باسىنداعى حور ورىنداۋشىلاردىڭ ءۇنى عاجاپ! جارقىراپ تۇرعان باسسەين دە اسەرلى. رەجيسسەردىڭ, كوستيۋمدەر بويىنشا سۋرەتشى مەن ستسەنوگرافتىڭ شەبەرلىگى ايقىن سەزىلىپ تۇردى, – دەيدى وزبەكستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى, مۋزىكاتانۋشى, وزبەكستان مەملەكەتتىك كونسەرۆاتورياسى مۋزىكا جانە سىن تاريحى كافەدراسىنىڭ دوتسەنتى ينەسسا گۋلزاروۆا.
بۇل ورايدا مادام باتتەرفلياي پارتياسىن ورىنداۋشى, قازاقستاننىڭ ەڭبەك سىڭىرگەن ءارتىسى جاننات باقتايدىڭ شەبەرلىگىن ايرىقشا اتاپ وتكەن ءجون. كورەرمەندى تاپجىلتپاي ءبىر ورىندا ۇستاپ وتىرۋ اسىرەسە, باس كەيىپكەردىڭ ءرولىن سومداۋشىنىڭ شەبەرلىگىنە تىكەلەي بايلانىستى ەكەنى ايان. سپەكتاكلدىڭ سوڭىندا كورەرمەننىڭ كوزىنە جاس ءۇيىرىلدى. كوپشىلىك تولقىدى, كەيىپكەر الەمىنە ەندى. جالپى باتتەرفلياي بەينەسى پۋچچيني بەينەلەگەن ايەلدەر گالەرەياسىنداعى ەڭ كۇردەلى دە سان قىرلى وبراز سانالادى. قورعانسىز, ادال, ىشكى كۇش-قۋاتقا يە, وزگەلەردەي ىمىراعا كەلىپ تىرشىلىك كەشۋ ونىڭ قولىنان كەلە بەرمەيدى. چيو-چيو-ساننىڭ سىرلى دراماسى وپەرادا تەرەڭ ءارى جان-جاقتى اشىلادى, كوڭىل كۇيدىڭ بارلىق قىرى كورىنىس تابادى. وقيعا جەلىسى ارقىلى ۆوكالدىق قانا ەمەس, سونداي-اق اكتەرلىك شەبەرلىكتىڭ دە ماڭىزدىلىعى ايقىن سەزىلەدى. كۇردەلى پارتيانى ج.باقتاي وتە جوعارى دەڭگەيدە ورىنداپ شىقتى دەۋگە تولىق نەگىز بار. باتتەرفليايدىڭ جانىندا ۇنەمى ونىڭ ادال قىزمەتشىسى سۋزۋكي جۇرەدى. جاعدايدىڭ تىعىرىققا تىرەلگەنىن تۇسىنە وتىرىپ, ول پينكەرتونمەن كەزدەسۋدى ۇزاق كۇتىپ, بار اۋىرتپالىقتى حانىممەن بىرگە بولىسەدى. قازاقستاننىڭ ەڭبەك سىڭىرگەن قايراتكەرى عاجايىپ مەتستسو-سوپرانو يەسى دينا حامزينا سومداعان بۇل بەينە دە كورەرمەننىڭ ىستىق ىقىلاسىنا يە بولدى. شىتىرمان وقيعانى جاقسى كورەتىن بەيقام پينكەرتوندى قازاقستاننىڭ ەڭبەك سىڭىرگەن قايراتكەرى مەدەت چوتاباەۆ ورىندادى. يتاليالىقتار ونى بەلكانتو ءداستۇرىن جالعاستىرۋشىلاردىڭ ءبىرى دەپ ەسەپتەيدى. وپەرا ونەرىندەگى زور جەتىستىگى ءۇشىن مەدەت چوتاباەۆ يتاليا جۇلدىزى وردەنىمەن ماراپاتتالعان. ال پاراساتتى امەريكالىق كونسۋل شارپلەستىڭ بەينەسىن قازاقستاننىڭ ەڭبەك سىڭىرگەن قايراتكەرى تالعات مۇساباەۆ سومداسا, تاتيانا ۆيتسينسكايا امەريكالىق كەيىپكەرى – كەتتى اسەرلى جەتكىزدى. سونىمەن قاتار رامزات بالاكيشيەۆ, تالعات عالەەۆ, جانات شىبىقباەۆ, ءومىرجان قادىروۆ, شىڭعىس راسىلحان, سامات جارىلقاسىنوۆ, ەلەنا گانجا, ءمادينا يسلاموۆا, نازىم ساعىنتاي مەن سارسەنباي ارنۇر ورىنداعان بەينەلەر ولاردىڭ اكتەرلىك شەبەرلىگى مەن ۆوكالدىق قابىلەتتەرىن ءمىنسىز پاش ەتتى. قازاقستاننىڭ ەڭبەك ءسىڭىرگەن قايراتكەرى ەرجان ءداۋىتوۆتىڭ جەتەكشىلىگىندەگى حورعا دا كوپشىلىك ەرەكشە قوشەمەت كورسەتتى.
سپەكتاكلدىڭ جاپوندىق ناقىشقا نەگىزدەلگەن ستسەنوگرافياسى – زامانىمىزدىڭ كورنەكتى سۋرەتشىسى ەتسيو فريدجەريونىڭ ەڭبەگى. وندا كىشكەنتاي گەيشا وقيعاسىنىڭ تەرەڭ پسيحولوگيزمى كورىنىس تاپقان. سپەكتاكل باسىندا چيو-چيو-ساننىڭ ءۇيى جالاۋلارمەن بەزەندىرىلىپ, الۋان ءتۇرلى نازىك گۇلدەرمەن كومكەرىلگەن, اينالاسىن سۇلۋ تابيعات قورشاعان, بۇل پينكەرتونمەن بىرگە باقىتتى دا باياندى عۇمىر كەشۋدى ارمان ەتكەن كەيىپكەردىڭ ءۇمىتىن بەينەلەيدى. يەسىز قالعان ءۇي, سولعان گۇلدەر سپەكتاكل سوڭىنداعى باتتەرفليايدىڭ جان دۇنيەسىمەن ۇندەسىپ, بولاشاققا سەنىمىن جوعالتقان جاننىڭ ىشكى ارپالىسىن ءدال بەرە الادى. سونداي-اق كورەرمەن الدىندا ىسىرىلىپ اشىلعان پانەلدەر توبەدەن جايىلا ورىن تەپكەن قالا بەينەسىن تاماشالاۋعا مۇمكىندىك تۋعىزادى. بۇعان ءجانە جارىقتى ويناتۋ مەن 3D-اسەرلەردى قوسقاندا, قويىلىمنىڭ كوركەمدىك دەڭگەيى ارتا ءتۇستى. باتتەرفلياي ءۇيىنىڭ الدىنداعى كول سۋىنىڭ شاعىلىسۋى كوپشىلىكتى تامساندىردى. بۇل ءۇشىن بىرەگەي تولىق كولەمدى قۇرىلىمدار – كۇننىڭ دە, جۇلدىزداردىڭ دا ساۋلەسىن كورۋگە مۇمكىندىك بەرەتىن 18 مەترلىك باسسەين قولدانىلدى. تاعى ءبىر ايتا كەتەتىن جايت, قويىلىمداعى ءار كوستيۋم ناعىز ونەر تۋىندىسى ەدى. بۇلار وسكار سىيلىعىنىڭ يەگەرى فرانكا سكۋارچاپينونىڭ ەسكيزدەرى بويىنشا جاسالعان. باس كەيىپكەردىڭ كوستيۋمى – قولمەن تىگىلگەن ناعىز جاپوندىق كيمونو, ونىڭ ءوزى وراسان زور قۇندىلىق سانالادى. ءبىر عاجابى, مۇنى «استانا وپەرا» تەاترىنا جاپونيانىڭ قازاقستانداعى ەلشىلىگى سىيعا تارتقان ەكەن.
سپەكتاكلدى مادەنيەت پەن ونەر قايراتكەرلەرى, ارداگەرلەر, سونداي-اق وزبەكستانداعى قازاق دياسپوراسىنىڭ وكىلدەرى كەلىپ تاماشالادى.
