ول - حالىقشىل! جاستاردىڭ تاربيەسى مەن بىلىمىنە قىراعىلىق تانىتىپ, مۇمكىندىگىنشە ۇلتتى تاربيەلەۋ كەرەكتىگىنە كوپ كوڭىل بولەتىن. قازاق ءوز بالاسىن دارىپتەۋگە كەلگەندە الدىنا جان سالماي تىم اسىرا ماقتايتىنىن جاقتىرا دا بەرمەيتىن. ۇلتتى قانداي كاسىپكە بەيىمدەۋ كەرەكتىگىن, قانداي ماماندىقتى تاڭداۋعا ءمان بەرۋ كەرەكتىگىنە دامىعان ەلدەردىڭ تاجىريبەسىمەن ءبولىسىپ, كەڭەس قۇرۋدى قۇپتايتىن.
ول – جاڭاشىل! الەمدەگى ەڭ ۇزدىك جەتىستىكتەردەن قازاق قوعامىنىڭ قالىس قالماۋىن ەسكەرتىپ وتىراتىن. عىلىمداعى, ەكونوميكاداعى, مادەنيەتتەگى تاڭقالارلىق جاڭالىقتارعا قىزىعىپ, ەرەكشە دەن قويىپ, ادامزات يگىلىگى جولىندا جاسالعان الەمدىك جاڭالىقتارعا بالاداي قۋانا الاتىن تازالىعى قايران قالدىراتىن.
ول – قاراپايىم! قاراپايىمدىلىق ادام بالاسىنىڭ ءبارىنىڭ بويىنان تابىلا بەرمەيتىن ۇلى قاسيەت.
ول – وتە ءبىلىمدى! بۇل ءسوزدى ق.ك. توقاەۆتىڭ باسشىلىعىندا بەس جىل قىزمەتتە بولعاندىقتان ايتىپ وتىرمىن.
2011 جىلى ق.ك. توقاەۆتىڭ بىرىككەن ۇلتتار ۇيىمىنا جاۋاپتى قىزمەتكە تاعايىندالۋىنا بايلانىستى ەلىمىزدىڭ اقپارات قۇرالدارى تولاسسىز حابارلاپ جاتتى. وسى جاڭالىقتى ەستىگەن كەزدە ءوز ەركىممەن ارىز بەرىپ مەملەكەتتىك قىزمەتتەن كەتكەنىم بار. سەبەبى بۇرىن-سوڭدى كورمەگەن ق.ك. توقاەۆ باسشىلىق ەتكەن ۇلكەن مەكتەپتى كوردىم. مەملەكەتشىلدىكتى, ەڭبەكقورلىقتى, ادالدىقتى, ادامگەرشىلىكتى كوردىم. ءاربىر مەملەكەتتىك قىزمەتكەر توقاەۆتىڭ دەڭگەيىندە قاجىرلى جۇمىس ىستەي الۋى مۇمكىن بە دەپ ويلادىم. مۇمكىن بولماسا مەملەكەتتىك قىزمەت اتقارۋعا حاقىسى بار ما؟..
ول – مەيىرىمدى! قر پارلامەنت سەناتىنىڭ توراعاسى قىزمەتىندە جوعارى لاۋازىمداعى شەندىلەرمەن قاتار زيالى تۇلعالاردى, قاراپايىم قىزمەتكەرلەردى دە جەكە قابىلداۋىنا شاقىراتىن. قاراپايىم ادامداردىڭ ويىن تىڭداپ, ءجيى پىكىرلەسەتىن. بيلىكتەگى شەندىلەر مۇنداي قادامعا اياق باسپاۋشى ەدى.
جيىرما جىل مەملەكەتتىك قىزمەتتە جۇمىس ىستەگەن كەزىمدە بىردە-ءبىر ءمينيستردىڭ, ۆيتسە-ءمينيستردىڭ, دەپارتامەنت ديرەكتورىنىڭ بويىنان مۇنداي تاربيەنى بويىنا سىڭىرگەن مەملەكەتتىك قىزمەتتەگى تۇلعانى كەزدەستىرگەن ەمەسپىن. ولار جوعارعى جاقتان بۇيرىق بولسا عانا نەمەسە وزىنەن دارەجەسى, داڭقى ارتقانداردى عانا قابىلداۋشى ەدى. قىزمەتتەن باس تارتىپ, ءوز ەركىممەن ارىز بەرۋىمنىڭ باستى سەبەبى دە ەندى توقاەۆتاي باسشىنىڭ بولۋى نەعايبىل ەكەنىن ۇعىنۋىم بولدى.
