پرەزيدەنت ءبىرىنشى كەزەكتە جۇمىس ورىندارىمەن قامتاماسىز ەتۋگە ۇكىمەتتىڭ كوڭىل ءبولۋ قاجەتتىگىن اتاپ ءوتتى. ياعني, تۇراقتى جۇمىس ورىندارىنىڭ قۇرىلۋى – ەلدەگى تۇراقتىلىقتىڭ كەپىلى. پرەزيدەنت سونىمەن قاتار وكىلەتتى ورگاندارعا بيۋدجەتتىڭ الەۋمەتتىك باسىمدىقتارىنا قاتىستى ناقتى تاپسىرما بەردى. بيۋدجەتتىڭ يميدجدىك جوبالارعا ەمەس, ناتيجەلى ىستەرگە باعىتتالۋى قاجەتتتىگىنە ءمان بەرۋدى, سونداي-اق ەسەپ كوميتەتى مەن ۇكىمەتكە بيۋدجەت قورلارىن ءتيىمدى پايدالانۋعا بايلانىستى جاۋاپكەرشىلىكتى ارتتىرۋ جاعىن تاپسىردى. كۆازيسەكتور قىزمەتىندەگى الەۋمەتتىك-ەكونوميكالىق اسپەكتىلەردى باقىلاۋ بويىنشا جۇمىستار ءوز الدىنا. «قازاگرو»-نىڭ وسى جارتىجىلدىقتاعى شىعىنىن ەسكەرەتىن بولساق, وسىنداي سوراقىلىقتاردىڭ سالدارىنان ەلدەگى الەۋمەتتىك ساياساتتىڭ ءتيىمدى جۇزەگە اسۋى ءمۇمكىن بولماي وتىر. پرەزيدەنتتىڭ مەملەكەتتىك قىزمەتكەرلەردىڭ جاۋاپكەرشىلىگىنە قاتىستى ماسەلەنى كوتەرۋى ولاردىڭ جۇمىسىنا باقىلاۋدىڭ كۇشەيگەنىن كورسەتەدى. مىسالى, ارىسقا قاتىستى ناقتى قانداي جۇمىستاردىڭ اتقارىلعانىنا قاتىستى ساراپتاما جاسالىپ, 10 تامىزعا دەيىن دايىن بولۋى ءتيىس. ءارى توتەنشە جاعدايلارعا بايلانىستى جاۋاپتىلار جازالاناتىن بولادى.
پرەزيدەنت قاتىسقان ۇكىمەت وتىرىسىنان كەيىن بارلىق ءتيىستى ورگاندار باسشىلارى جۇمىس ىستەۋ تاسىلدەرىن وزگەرتىپ, ىستەرىنە جاۋاپكەرشىلىكتى سەزىنەتىن جاعداي قالىپتاسۋى ءتيىس.
يۋري بۋلۋكتاەۆ,
