پرەزيدەنت ەڭ الدىمەن ەلدى يندۋستريالاندىرۋ ماسەلەسىنە كوڭىل ءبولدى. يندۋستريالاندىرۋ جىلدارى ەلدە 1250 كاسىپورىن اشىلىپ, 120 مىڭنان استام ادام جۇمىس ورنىن تاپتى. بۇل سالاداعى بيىك بەلەس ەدى. قايتا وڭدەۋ سەكتورىنىڭ ۇلەسى كوبەيدى. قوستانايدا دا قايتا وڭدەۋ كاسىپورىندارى اشىلدى. مىسالى, وسى جىلدىڭ ءبىرىنشى جارتىسىندا وبلىس ەكونوميكاسىنىڭ نەگىزگى سالالارىن دامىتۋدا جاقسى ءناتيجەلەر بار. ونەركاسىپ ءوندىرىسىنىڭ ناقتى كولەم يندەكسى 112,3 پايىزعا, نەگىزگى كاپيتالعا سالىنعان ينۆەستيتسيالار كولەمى 117,5 پايىزعا ارتقان. وڭدەۋ ونەركاسىبىنىڭ كاسىپورىندارى ماشينا جاساۋ ءوندىرىسىن 64,9, مەتاللۋرگيانى 25,4, دايىن مەتالل بۇيىمدارىن ءوندىرۋدى 17,1, جەڭىل ونەركاسىپتى 8,7, سۋسىندار شىعارۋدى 7,7 پايىزعا ۇلعايتۋ ەسەبىنەن 18,5 ءوسىمدى قامتاماسىز ەتكەنىن ءبىلىپ وتىرمىز.
وبلىسقا ينۆەستيتسيا تارتۋ ءىسى جاقساردى. قوستاناي قالاسىندا يندۋستريالىق ايماق سالىندى. بىراق پرەزيدەنت قازاقستانداعى ەكونوميكالىق سالالاردىڭ سىرتقى جانە ىشكى باسەكەگە توتەپ بەرۋى تومەن ەكەنىن بەكەر ايتىپ وتىرعان جوق. قوستانايدا ماشينا قۇراستىرۋ زاۋىتتارى بار, ءبىر ەمەس ەكەۋ. وندا كورەيالىق Ssang Yong, جاپوندىق Toyoto برەندتەرى قۇراستىرىلدى. بىراق كوپ ۇزاماي ولاردىڭ ءوندىرىلۋى توقتادى. وزگەنىڭ ءوندىرىسىن وزىمىزگە اكەلمەس بۇرىن ونى ءوندىرۋدىڭ ءتيىمدىلىگىن بارىنشا ەسەپتەۋ كەرەك ەدى. بىزدە وندىرىسكە حالىقتىق باقىلاۋ جوق. وندىرىسكە ءبولىنەتىن بيۋدجەت قارجىسى ءتيىمدى جۇمسالا ما؟ ول شاعىن جانە ورتا بيزنەستى باستاپ جاتقاندارعا بەرىلەتىن گرانتتاي ءبىر-ەكى ميلليون تەڭگە ەمەس قوي, اۋقىمدى قارجى جەلگە ۇشقانداي بولماي ما؟ شەت ەلدىك برەندتەردى قۇراستىرعاندا قازاقستاندىق ۇلەستى بارىنشا كوبەيتپەي بولمايدى. ال قازاقستاندىق تەحنيكالاردىڭ ءوندىرىلۋى بولاشاقتىڭ ارمانى بولىپ تۇر, ارينە.
تاعى ءبىر ايتارىم, حالىقتىڭ اۋىلدان قالاعا اعىلۋى قاشان توقتار ەكەن؟ قالالار وسۋدە, ال اۋىلعا بارساڭ جۇرەك سىزدايدى. شاعىن فەرمەرلەردى قالىپتاستىرۋ يندۋستريا دارەجەسىندە قولعا الىنسا دەپ ويلايمىن. سوندا اۋىل دا, اۋىل شارۋاشىلىعى دا داميدى. جۇمىس بار جەردەن ەشكىم دە كەتپەيدى.
سەرگەي بوگاتىرەۆ,
وبلىستىق مەدياتورلار قاۋىمداستىعىنىڭ پرەزيدەنتى
قوستاناي
