اتالعان شارانىڭ ەكىنشى كەزەڭى اياسىندا, ياعني 14 شىلدە كۇنى پوليتسيا قىزمەتكەرلەرى جامبىل وبلىسىنىڭ ت.رىسقۇلوۆ اۋدانى, جاقسىلىق اۋىلىندا وزبەكستان رەسپۋبليكاسىنىڭ 31 ازاماتىن ۇستادى. ۇستالعانداردىڭ بارلىعى جەرگىلىكتى كىرپىش زاۋىتىندا رۇقسات قۇجاتىنسىز زاڭسىز ەڭبەك ەتىپ كەلگەن.
جامبىل وبلىستىق پوليتسيا دەپارتامەنتى كوشى-قون قىزمەتى باسقارماسىنىڭ باستىعى, پوليتسيا پودپولكوۆنيگى ارمان تۇرداليەۆتىڭ ايتۋىنشا, قازىرگى تاڭدا وزبەكستان رەسپۋبليكاسىنىڭ ازاماتتارىنا قاتىستى اكىمشىلىك-قۇقىق بۇزۋشىلىق تۋرالى كودەكستىڭ 517-بابى 5-بولىگى بويىنشا اكىمشىلىك ماتەريالدار جيناقتالىپ, شەشىم قابىلداۋ ءۇشىن ت.رىسقۇلوۆ اۋدانىنىڭ سوتىنا جىبەرىلگەن. سونىمەن قاتار, شەتەل ازاماتتارىن رۇقساتسىز ەڭبەك قىزمەتىنە زاڭسىز تارتقانى ءۇشىن جۇمىس بەرۋشى دە قازاقستان رەسپۋبليكاسى اكىمشىلىك-قۇقىقبۇزۋشىلىق كودەكسىنىڭ 519-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتىلعان.
سونداي-اق 17 شىلدە كۇنى دە بايزاق اۋدانىنىڭ بۋرىل اۋىلىنداعى دۇكەندەردىڭ ءبىرىنىڭ ءۇي-جايىندا جامبىل وبلىسىنىڭ پوليتسيا دەپارتامەنتى زاڭسىز كوشى-قونعا قارسى كۇرەس جونىندەگى ارنايى جەكە روتاسىنىڭ قىزمەتكەرلەرى قازاقستاندا زاڭسىز جۇرگەن جانە نان ونىمدەرىن پىسىرۋمەن اينالىسقان وزبەكستان رەسپۋبليكاسىنىڭ جەتى ازاماتىن انىقتاعان. «ۇستالعان ەڭبەك ميگرانتتارىنا قاتىستى قازاقستان رەسپۋبليكاسى اكىمشىلىك-قۇقىقبۇزۋشىلىق كودەكسىنىڭ 517-بابىنىڭ 5-بولىگى بويىنشا اكىمشىلىك ماتەريال حاتتاما تولتىرىلدى. ال شەتەلدىك جۇمىس كۇشىن تارتۋ ەرەجەسىن بۇزعانى ءۇشىن نان پىسىرەتىن تسەحتىڭ يەسىنە قاتىستى اكىمشىلىك-قۇقىقبۇزۋشىلىق كودەكسىنىڭ 519-بابى بويىنشا اكىمشىلىك جازا تاعايىندالدى. بارلىق ىستەر بايزاق اۋدانىنىڭ اكىمشىلىك سوتىنا جولداندى», دەيدى, اتالعان باسقارمانىڭ باستىعى, پوليتسيا پودپولكوۆنيگى ارمان تۇرداليەۆ.
