2012 جىلدان باستاپ جالدامالى پاتەردە جۇرگەن اسكەريلەرگە وتەماقى تولەنىپ كەلسە, ەندى ول تۇرعىن ءۇي تولەمدەرىنە اۋىستىرىلعان. ياعني, قاراجات ەكىنشى دەڭگەيلى بانكتەردە اشىلعان ارنايى جەكە شوتتارعا اۋدارىلادى. وسى اۋدارىمداردى ءار اسكەري قىزمەتشى «اسكەري باسپانا», «7-20-25» جانە «نۇرلى جەر» باعدارلامالارى ارقىلى باسپانا الۋعا جۇمساي الادى. نەسيەنىڭ مولشەرلەمەسى جىلىنا 7%-دان اسپايدى جانە تولەۋ مەرزىمى دە ءتيىمدى.
«مۇنىڭ ءبارى اسكەري قىزمەتشىلەردىڭ ءال-اۋقاتىن جاقسارتۋعا باعىتتالعان», دەيدى قورعانىس ىستەرى دەپارتامەنتى باستىعىنىڭ ورىنباسارى داۋلەت تولىباي.
بيىل پەتروپاۆل اسكەري گارنيزونىنىڭ 20 اسكەري قىزمەتشىسى جايلى پاتەرگە قول جەتكىزدى. سولاردىڭ ءبىرى – ءبولىم باستىعى ءانۋار يبراەۆ. ول ءۇي كەزەگىندە 10 جىل تۇرعان. وعان دەيىن وتباسىمەن پاتەر جالداپ كەلگەن. ەندى 3 بولمەلى پاتەرگە جايعاستى. «تۇرعىن ءۇي-قۇرىلىس جيناق بانكىندە» جيناعان قاراجات باستاپقى جارنا رەتىندە قۇيىلىپ,زەينەتكە شىققانعا دەيىن تولەم جاسالادى. سوسىن بۇل پاتەر وتباسىنىڭ اتىنا اۋدارىلادى.
ءباسپاسوز قىزمەتىنىڭ جەتەكشىسى ايمان ءابجاپپاروۆا ءوز سوزىندە باسپاناسى جوق اسكەري قىزمەتشىلەردىڭ بارلىق ساناتتاعىلار ءۇشىن بىرىڭعاي تۇرعىن ءۇي تولەمى جاسالاتىنىن جەتكىزدى. سونىمەن قاتار اسكەري سالادا 20 جانە ودان كوپ جىل ەڭبەك ەتكەن اسكەريلەرگە قىزمەتتىك ءۇيدى وتەۋسىز جەكەشەلەندىرۋ قۇقىعى قايتارىلدى. ال قىزمەتتىك تۇرعىن ۇيلەرمەن قامتاماسىز ەتىلگەن اسكەري قىزمەتكەرلەرگە ەكىنشى دەڭگەيلى بانكتەردەگى جەكە ارنايى شوتتارىنا تۇرعىن ءۇي تولەمدەرىنىڭ 50 پروتسەنتى اۋدارىلادى. تۇرعىن ۇيلەرمەن قامتاماسىز ەتىلمەگەن اسكەري قىزمەتشىلەرگە ەكىنشى دەڭگەيلى بانكتەردەگى جەكە ارنايى شوتتارىنا تۇرعىن ءۇي تولەمدەرىنىڭ 100 % -ى سالىنادى.
40-قا جۋىق اسكەري قىزمەتشىگە تۇرعىن ءۇيدى جالداپ تۇرعانى ءۇشىن اقشالاي وتەماقى تولەنەدى.
